ދިވެހި ދަޢުލަތަށް 45 އަހަރަށްވުރެ ދިގުމުއްދަތެއްގައި ޚިދުމަތްކުރައްވާފައިވާ ބޭފުޅުންގެ ރެކޯޑްތައް ރައީސް އޮފީހުން ހޯދުމަށްފަހު ޤައުމީ އިނާމާ ބެހޭ ކޮމިޓީއަށް ހުށައަޅާ އެމީހުންގެ ޚިދުމަތުގެ އަގުވަޒަން ކުރުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ނިންމަވައިފިއެވެ.
ދިވެހި ދަޢުލަތަށް ޚިދުމަތް ކުރުމުގެ އިނާމް ދިނުމަށް ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވީ މިހާތަނަށް 309 ބޭފުޅަކަށް މިޝަރަފު އަރުވާފައިވާކަމަށެވެ. އެހެން ނަމަވެސް، ދައުލަތަށް ވަރަށް ދިގު މުއްދަތެއްގައި ޚިދުމަތް ކުރެއްވި ބޭފުޅުން އަދިވެސް އެބަތިބިކަމަށާއި 45 އަހަރަށްވުރެ ދިގު މުއްދަތެއްގައި ދައުލަތަށް ޚިދުމަތް ކުރެއްވި ބޭފުޅުންގެ ތެރެއިން، މި ޝަރަފު ނޭރުވޭ ގާތްގަޑަކަށް 70 މީހުން އެބަތިބި ކަމަށް ރައީސް ވިދާޅުވިއެވެ.
"އެބޭފުޅުންގެ ނަން، އިނާމަށް ހުށަހެޅުއްވުމުގައި ދިމާވާ އެންމެ ބޮޑު ދައްޗަކީ، ބައެއް ބޭފުޅުންގެ އަތްޕުޅުގައި ޚިދުމަތާބެހޭ ރެކޯޑުތައް ނެތުން. އަދި އޭގެ ތެރެއިން ގިނަ ބޭފުޅުން ޚިދުމަތް ކުރައްވަން ފެށްޓެވީ މީގެ އެތައް އަހަރެއް ކުރިން." ރައީސުލްޖުމްހުރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
މިދިޔަ އަހަރުތަކުގައި ސަރުކާރުގެ ވަރަށް ގިނަ އޮފީސްތަކެއް އުވާލާފައިވާކަން ފާހަގަކުރައްވާ ރައީސް ވިދާޅުވީ އެފަދަ ބައެއް އޮފީސްތައް އުވާލެވިގެން ދިޔައިރު، އެ ބޭފުޅުން ކުރެއްވި މަސައްކަތްތަކުގެ މަޢުލޫމާތު ފަސޭހައިން ލިބޭނެ ގޮތްވެސް ނެތްކަމަށެވެ. އެކަމުގެ ސަބަބުން އެ ބޭފުޅުންގެ ނަން، އިނާމަށް ހުށައެޅުމަށް ދައުލަތުގެ މުއައްސަސާތަކަށްވެސް ވަރަށް ގިނަ ދަތިތައް ކުރިމަތިވާ ކަމަށް ރައީސް ވިދާޅުވިއެވެ. އަދި ބައެއް ބޭފުޅުން އަމިއްލަފުޅަށް އިނާމަށް ނަން ހުށަހެޅުއްވުމަށް ބޭނުންފުޅުނުވުމަކީވެސް، ޤައުމީ އިނާމު ކޮމިޓީއާ ހިސާބަށްވެސް ހުށަހެޅޭ މައްސަލައެއް ކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ އެކި ސަބަބުތަކާ ހުރެ އިނާމަށް ނަން ހުށަނޭޅުނު ނަމަވެސް އެފަދަ ބޭފުޅުންނަށްވެސް އަދި ދިގު މުއްދަތެއްގައި ޚިދުމަތްކޮށް ވަކިވެފައިވާ އެހެން ބޭފުޅުންނަށްވެސް، މިޝަރަފު އަރުވަންޖެހޭކަމަށެވެ. އެކަން ފެށުމުގެ ގޮތުން، 45 އަހަރަށްވުރެ ދިގު މުއްދަތެއްގައި ޚިދުމަތް ކުރައްވާ ވަކިވެވަޑައިގެންފައިވާ ބޭފުޅުންގެ ރެކޯޑުތައް، ރައީސުލްޖުމްހޫރިއްޔާގެ އޮފީހުން ހޯދުމަށްފަހު، ޤައުމީ އިނާމާ ބެހޭ ކޮމިޓީއަށް ހުށަހަޅައިގެން، އެކަން ކުރިއަށް ގެންދަން ނިންމާވަފައިވާ ކަމަށް ރައީސް ވިދާޅުވިއެވެ. އަދި މިގޮތަށް ހުށަހެޅޭ ބޭފުޅުންނާވެސް ކޮމިޓީން ބައްދަލުކުރައްވައި، އިތުރު މަޢުލޫމާތު ހޯދާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
މިއަހަރުގެ ދިވެހި ދަޢުލަތަށް ޚިދުމަތް ކުރުމުގެ އިނާމް 86 ބޭފުޅަކަށް ވަނީ އަރުވާފައެވެ. މީގެ ތެރޭގައި ބައި ޤަރުނަށްވުރެ ދިގު މުއްދަތެއްގައި ދައުލަތަށް ޚިދުމަތް ކުރެއްވި ބޭފުޅަކާއި، ބައި ޤަރުނާ ކައިރިވާ މުއްދަތަށް ޚިދުމަތް ކުރެއްވުމަށްފަހު ރިޓަޔަރ ކުރެއްވި ބޭފުޅަކުހިމެނެއެވެ.