ކިއުއާރު ކޯޑު ވަގަށް ބޭނުންކޮށްގެން 2 ލައްކައަށްވުރެ ގިނަ ރުފިޔާގެ ވިޔަފާރިކުރި 2 މީހުން ހައްޔަރުކޮށްފި
ވަގަށް ކިއުއާރު ކޯޑު ބޭނުންކޮށްގެން 2 ލައްކައަށްވުރެ ގިނަ ރުފިޔާގެ ވިޔަފާރިކޮށްފައިވާ 2 މީހަކު ހައްޔަރުކޮށް ބަންދަށް 15 ދުވަސް ޖަހައިފިއެވެ.
ފުލުހުން ވިދާޅުވީ އިންޓަރނެޓް ބޭންކް ކްރެޑެންޝިއަލް ކޮމްޕްރަމައިޒްކުރުމަށްފަހު އިންޓަރނެޓް ބޭންކިން އެޕްލިކޭޝަން ބޭނުންކޮށްގެން ކިއު.އާރު ކޯޑް ސްކޭން މެދުވެރިކޮށް 2ލައްކައަށް ވުރެ ގިނަ ރުފިޔާގެ މުދާ ގަނެފައިވާ މައްސަލައެއްގައި މިމަހުގެ 18 ވަނަ ދުވަހު ދިވެހި 2 ފިރިހެނުން ހައްޔަރުކޮށްފައިވާކަމަށެވެ. އެއީ 25 އަހަރުގެ މީހަކާއި 27 އަހަރުގެ މީހެއްކަމަށް ފުލުހުން ވިދަޅުވެއެވެ. އަދި އެ ދެމީހުންގެ ބަންދަށް ކުރިމިނަލް ކޯޓުން 15 ދުވަސް ޖަހާފައިވާކަމަށް ފުލުހުން ވިދާޅުވެއެވެ.
މި މައްސަލަ ފުލުހުންގެ އިކޮނަމިކް ކްރައިމް ޑިޕާޓްމަންޓުން ގެންދަނީ ތަޙްޤީގުކުރަމުންނެވެ.
ކިއުއާރު ކޯޑު ނުވަތަ ސްކޭންކޮށްގެން ކުރާ މުއާތްމަލާތްތަކުން އޮޅުވާލައިގެން ފައިސާ ހޯދާ މައްސަލައަކީ މިދުވަސްވަރު އާއްމުވެފައިވާ މައްސަލައެކެވެ. މިކަމާއި ގުޅިގެން އާންމުންގެ ކަންބޮޑުވުމާއި ޝަކުވާ ވަނީ ބޮޑުވެފައެވެ.
މިމައްސަލަ ހައްލުކޮށްދިނުމުގެ ގޮތުން ބީއެމްއެމްއިން މިހާރު ވަނީ ކިއުއާރު ކޯޑު ބޭނުންކުރެވޭ މިންގަނޑުތަކަށް ބަދަލުގެނެސްފައެވެ. އެގޮތުން، މިހާރު ކިއުއާރު ކޯޑު ބޭނުންކޮށްގެން އެންމެ ގިނަވެގެންވެސް ކުރެވޭނީ 750 ރުފިޔާގެ މުއާމަލާތްކަމަށް ބީއެމްއެލްއިން ވިދާޅުވެއެވެ. އަދި ދުވާލެއްގެ މައްޗަށް ކޮންމެ ފަރާތަކަށްވެސް ކިއުއާރު ކޯޑު ބޭނުންކުރެވޭނީ ގިނަވެގެން 10 ފަހަރުކަމަށް އެބޭންކުން ވިދާޅުވެއެވެ.