ގަވާއިދަށް އިސްލާހުތަކެއް ގެނެސް، ކުރިއަށް އޮތް ތިންމަސް ދުވަސްތެރޭ ޓެކްސީތަކުގައި ކެމެރާ ހަރުކުރަން ޖެހޭ ގޮތަށް ކަނޑައަޅައިފިއެވެ.
ޓެކްސީތަކުގައި ޑޭޝް ކެމެރާ ހަރުކުރާގޮތަށް ކަނޑައަޅާ ރާއްޖޭގައި ޓެކްސީ ކުރުމުގެ ގަވާއިދު ޢާއްމުކުރީ މިދިޔަ އޮގަސްޓުމަހުއެވެ. އޭރު ނިންމާފައިވަނީ އެ ގަވާއިދަށް 6 މަސްދުވަސްތެރޭ އަމަލުކުރަން ޖެހޭނެ ކަމަށެވެ. އެހެން ނަމަވެސް މިހާރު މިގެނައި އިސްލާހުތަކާއެކު ޓެކްސީތަކުގައި ކެމެރާ ހަރުކުރުމުގެ ގަވާއިދަށް އަމަލުކުރުން ވަނީ 3 މަސް ދުވަހަށް ފަސްކޮށްފައެވެ.
ޓްރާންސްޕޯޓު މިނިސްޓްރީން ވިދާޅުވީ، ގަވާއިދަށް އިސްލާހުތަކެއް ގެނެސްފައި މިވަނީ އިތުރަށް ފުރިހަމަ އަދި ލުއި ގޮތްތަކެއް ޓެކްސީ ޑްރައިވަރުންނަށް ހޯދައިދިނުމަށް ކަމަށެވެ.
ޓެކްސީ ގަވާއިދަށް ގެނެސްފައިވާ އިސްލާޙުގައިވާގޮތުން، ޓެކްސީތަކުގެ އެތެރޭގައި ތިބޭ ފަސިންޖަރުންނާއި، ޑްރައިވަރާއި، ޓެކްސީގެ ބޭރު ފެންނަން ހުންނާނޭހެން ކެމެރާ ހަރުކޮށް، ޓެކްސީގެ ޚިދުމަތް ފޯރުކޮށްދޭ ހުރިހާ ވަގުތެއްގައި އެ ކެމެރާތަކުން ރިކޯޑު ކުރެވެންޖެހެއެވެ. މިގޮތަށް ކޮށްފައިވާ ރިކޯޑިންގތައް، އެ ރިކޯޑުކުރެވޭ ތާރީޚުން ފެށިގެން މަދުވެގެން 7 ދުވަހުގެ މުއްދަތަށް، އެ ޓެކްސީއެއްގެ ޓެކްސީ ސެންޓަރުން ބަލަހައްޓަންޖެހެއެވެ.
ޓެކްސީގައި ހަރުކޮށްފައިވާ ކެމެރާތަކުގައި، ހުންނަންޖެހޭ މިންގަނޑުތަކުގެތެރޭގައި، ޓެކްސީގައި ހަރުކޮށްފައިވާ ކެމެރާގެ ހާޑް ޑްރައިވްގައި ވީޑިއޯ އެންކްރިޕްޓްކޮށް ރައްކާކުރެވޭނޭހެން ހުރުމާއި، ޓެކްސީއަށް އަރާ ފަސިންޖަރުންގެ ރައްކާތެރިކަމަށްޓަކައި، ޓެކްސީގައި ހަރުކޮށްފައިވާ ކެމެރާގެ ވީޑިއޯތައް އެހެން އެއްވެސް ޑިވައިސްއަކަށް އެޅުމާއި، ވީޑިއޯ ރިކޯޑިންތައް އެއްވެސް ހާލަތެއްގައި އެއްވެސް ފަރާތަކާ ހިއްސާ ކުރުމަކީ މަނާކަމެކެވެ.
ޓެެކްސީ ދުއްވަމުންދާއިރު، އެ ޓެކްސީއެއްގައި ކެމެރާ ހަރުކޮށްފައިވާކަމާއި، އެ ކެމެރާއިން ރިކޯޑު ކުރަމުންދާކަން، ފަސިންޖަރުންނަށް، ޓެކްސީ ޑްރައިވަރު އަންގަން ޖެހެއެވެ. ޓެެކްސީތަކުގައި ހަރުކޮށްފައިވާ ކެމެރާތަކުން ރިކޯޑުކުރާ ދުވަހުން ފެށިގެން ގިނަވެގެން 7 ދުވަހުގެ ތެރޭގައި ވީޑިއޯ ރިކޯޑިންގތައް އޯވަރރައިޓް ކޮށް، އިންސްޓޯލްކޮށްފައިވާ ސިސްޓަމް ސްޓޯރޭޖް ޑިވައިސްގެ ތެރޭގައި ރައްކާކުރަންޖެހޭނެ ކަމަށްވެސް އިސްލާޙުގައި ބުނެފައިވެއެވެ.
މީގެއިތުރުން ޓެކްސީތަކުގެ ބިއްލޫރި ކަޅުކުރެވޭނެ މިންގަނޑެއްވެސް ޓްރާންސްޕޯޓުންވަނީ ކަނޑައަޅާފައެވެ. އެގޮތުން ޓެކްސީގެ ބިއްލޫރި ކަޅުކުރެވޭނީ، މަގެއްގެ އަރިމަތީގައި ހުންނަ މީހަކު އުޅަނދަކަށް ބަލާއިރު، އެ އުޅަނދުން ދަތުރުކުރާ ފަސިންޖަރުން ފެންނަން ހުންނަ ވަރަށް ކަމަށް ޓްރާސްޕޯޓު މިނިސްޓްރީން ވިދާޅުވެއެވެ.
ޓެކްސީ ގަވާއިދަށް ގެނެސްފައިވާ 1ވަނަ އިސްލާ ޓްރާންސްޕޯޓް މިނިސްޓްރީންވަނީ ގެޒެޓުކޮށްފައެވެ. މި ގަވާއިދަށް އަމަލުކުރަން ފަށާނީ ޤަވާއިދު ގެޒެޓުގައި ޝާއިޢުކުރާތާ، ތިން މަސްދުވަސް ހަމަވާ ތާރީޚުން ފެށިގެންނެވެ.