ހިޔާ ފްލެޓްތަކުގައި ދިރިއުޅެމުން ގެންދާ ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ތަރައްޤީކޮށް ފެންވަރު ރަނގަޅުކުރުމަށްޓަކައި ދިރާސާއެއް ކުރުމަށް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ނިންމައިފިއެވެ.
ހިޔާ ފުލެޓްތަކުގައި ދިރިއުޅޭ މީހުންގެ ޚިޔާލު ހޯދުމަށް މިދިރާސާ ކުރުމަށް ހަމަޖެހިފައިވަނީ މާދަމާއިން ފެށިގެން އަންނަ މަހުގެ 6 ވަނަ ދުވަހުގެ ނިޔަލަށެވެ.
އެޗްޑީސީން ވިދާޅުވީ މިދިރާސާގެ މަޢުލޫމާތު އެއްކުރުމަށް ހަމަޖެހިފައިވަނީ ފްލެޓްތަކަށް ޒިޔާރަތްކޮށް އޮންލައިން ފޯމެއް ފުރައިގެންކަމަށެވެ. ނަމަވެސް މި ދިރާސާގައި އާމްދަނީ، ޚަރަދު، ކޭޝް ކާޑް އަދި ބެންކު އެކައުންޓް ފަދަ މަޢުލޫމާތުތައް ނާހާނެ ކަމަށް އެޗްޑީސީން ވިދާޅުވެއެވެ. އަދި މިދިރާސާއަށް ބޭނުންވާ އިތުރު މަޢުލޫމާތު ސާފުކުރަން ޖެހިއްޖެ ހާލަތެއްގައި ގުޅާނީ އެ ކޯޕަރޭޝަންގެ ރަސްމީ ނަންބަރުން ކަމަށް އެޗްޑީސީން ވިދާޅުވެއެވެ.
މިމަސައްކަތް ކުރާ އެޗްޑީސީގެ މުވައްޒަފުން ތިބޭނީ އެކޯޕަރޭޝަންގެ މުވައްޒަފެއްކަން އަންގައިދޭ ކާޑު އަޅައިގެންނެވެ. މިދިރާސާއާ ގުޅިގެން އެއްވެސް ޝަކުވާއެއް ނުވަތަ މަޢުލޫމާތެއް ބޭނުންވާނަމަ އެކޯޕަރޭޝަންގެ ކޯލް ސެންޓަރ 1516 އަށް ގުޅުމަށް އެޗްޑީީސީން އިލްތިމާސްކުރެއެވެ.
ހިޔާ ފްލެޓްގައި މިވަގުތުވެސް ގިނަ ބަޔަކު ދިރިއުޅެމުން އަންނައިރު އެތަނުން ލިބެންޖެހޭ ޚިދުމަތްތައް ފޯރުކޮށްދިނުމަށް އެޗްޑީސީން އަންނަނީ މަސައްކަތް ކުރަމުންނެވެ. މިގޮތުން މިހާރުވެސް އެ ސަރަޙައްދުގައި ފިހާރަތަކާއި ކްލިނިކެއްވެސް ވަނީ ހުޅުވާފައެވެ. އަދި މިނޫނަސް ކޮންމެހެން ބޭނުންވާ ޒަރޫރީ ޚިދުމަތްތައް އަންނަނީ ފޯރުކޮށްދެމުންނެވެ.