ކުރިއަށް އޮތް ރިޔާސީ އިންތިޚާބަށް، މޯލްޑިވްސް ރިފޯމް މޫވްމަންޓް (އެމްއާރުއެމް)އާއި ޖުމްހޫރީ ޕާޓީ (ޖޭޕީ)އިން އެމްޑީޕިއާއެކު ކޯލިޝަން ހަދާނެކަމުގެ ޔަޤީންކަން އެބައޮތްކަމަށް އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ތ.ހިރިލަންދޫގައި އެމްޑީޕީގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
ތ.ހިރިލަންދޫއަށް ވަޑައިގެން އެރަށުގެ ރައްޔިތުންނާއި އެމްޑީޕީގެ މެންބަރުންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވަނީ، ކުރިއަށް އޮތް ރިޔާސީ އިންތިހާބު ކާމިޔާބުކުރުމަށް އޮތް ފޯމިއުލާއަކީ ކޯލިޝަން ކަމަށް ގަބޫލުފުޅުކުރައްވާ ކަމަށް ވިދާޅުވާ ވާހަކަފުޅު ތަކުރާރު ކުރައްވާފައެވެ. އެމްޑީޕީ ޕްރައިމަރީގައި އެމަނިކުފާނާ އެކު ވާދަކުރެއްވި ޕާޓީގެ ރައީސްމުޙައްމަދު ނަޝީދު އެމްޑީޕީއަށް ކޯލިޝަނާ ނުލައި އިންތިޚާބު ކާމިޔބާކުރެވޭނެކަމަށް ވިދާޅުވެފައި ވީނަމަވެސް ނަމަވެސް ރައީސް ނަޝީދުގެ އަރިސް ބޭފުޅުން ޖުމްހޫރީ ޕާޓީއާއި ކޯލިޝަން ހަދައިގެން އިންތިޚާބަށް ނިކުމެވަޑައިގަންނަވާނެކަމަށް ދެކެވޭ ވާހަކަތަކަށް އިޝާރާތްކުރައްވަމުން ރައީސް ވިދާޅުވީ، ކޯލިޝަނާއި ދެކޮޅު ހެއްދެވި ބޭފުޅުންވެސް މިހާރު ދައްކަމުން އަންނަނީ ކޮންމެވެސް އެއް ޕާޓީއަކާއެކު ކޯލިޝަން ހެދުމުގެ ވާހަކަތައްކަމަށެވެ.
ރައީސް ވިދާޅުވީ އެމަނިކުފާނާއެކު މިހާރު ކޯލިޝަންގައި ތިއްބެވި ހުރިހާ ޕާޓީތަކަށް ކުރިއަށް އޮތް ރިޔާސީ އިންތިޚާބަށްވެސް ކޯލިޝަން ހެދުމަށް ދައުވަތު ދެއްވާފައިވާ ކަމަށެވެ. ރައީސް ވިދާޅުވީ ކޯލިޝަނަކާއި ނުލައި އިންތިހާބެއް އެއް ބުރުން ކާމިޔާބު ނުކުރެވޭނެ ކަމަށާއި, ކޯލިޝަންގައި މިހާރު ތިއްބެވި ބޭފުޅުން ގޮތް ނިންމަވާނީ ރައްޔިތުންނަށް އެންމެ ފައިދާހުރި ގޮތަށް ކަމަށް އުއްމީދު ކުރައްވާކަމަށެވެ. އެގޮތުން އެބޭފުޅުން ވިސްނުންތެރިކަމާއެކު ގޮތް ނިންމަވާނެކަމަށް ގަބޫލުކުރައްވާ ކަމަށާއި، އެގޮތުން އެމްއާރުއެމާއި ޖޭޕީންވެސް އެމްޑީޕީއާއެކު ކޯލިޝަން ހަދާނެކަމުގެ ޔަޤީންކަން އެބައޮތްކަމަށް ރައީސް ވިދާޅުވިއެވެ.
"އަޅުގަނޑު ހިތުން މިކަމާ ދެކޮޅު ހެއްދެވި ބޭފުޅުންވެސް އެ މަސައްކަތް ކުރަނީ ކޮންމެސް ބަޔަކާ އެކީ ކޯލިޝަން ހަދަން. އޭރަކު އެ މަންޒަރެއް ނުފެނޭ. އަޅުގަނޑު އެދުވަހު އެދެންނެވި ގޮތަށް އެ މަސައްކަތް ފަށައިގެން އަޅުގަނޑު ކުރިއަށް މިދަނީ. އަޅުގަނޑުގެ ކޯލިޝަންގައި މިވަގުތު ތިބި ހުރިހާ ޕާޓީތައް، އަދާލަތަށާ، ޖުމްހޫރީ ޕާޓީއަށާއި އަދި އެމްއާރްއެމްއަށް އަޅުގަނޑު ވާނީ ދައުވަތު ދީފަ. އިރާދަ ކުރެއްވިއްޔާ މިކަމުގެ ރަނގަޅު ނަތީޖާއެއް ތިބޭފުޅުންނަށް ވަރަށް އަވަހަށް ފެނިގެންދާނެ.” ރައީސުލްޖުމްހޫރިއްޔާ ވިދާޅުވިއެވެ.
ރައީސް މިހެން ވިދާޅުވެފައިވާއިރު، އެމަނިކުފާނު ވަނީ މިދިޔަ ބުރާސްފަތި ދުވަހު ޖުމުހޫރީ ޕާޓީގެ ލީޑަރ ޤާސިމް އިބްރާހިމާއި ބައްދަލުކުރައްވާފައެވެ. ނަމަވެސް އެޕާޓިން ރިޔާސީ އިންތިޚާބުގައި ވާދަކުރުން ނުވަތަ ކޯލިޝަނަކާއެކު ކުރިއަށް ދާނެގޮތަކާއި މެދު ގޮތެއް ނިންމާނީ އެޕާޓިގެ ކައުންސިލުންކަމަށް ޤާސިމް އިބްރާހީމް ވަނީ ވިދާޅުވެފައެވެ.
ކުރިއަށް އޮތް ރިޔާސީ އިންތިޚާބުގައި އެމްޑީޕީން ކޯލިޝަން ހެދުމުގެ ބާރު އެޕާޓިގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް އެޕާޓީ ޤައުމީ މަޖިލީހުން ވަނީ ދީފައެވެ. މިއާއެކު ރައީސުލްޖުމްހޫރިއްޔާ ވަނީ ކޯލިޝަން ހެދުމަށް ސަރުކާރުގެ ކޯލިޝަންގައި މިހާރުވެސް ހިމެނޭ ޖުމްހޫރީ ޕާޓީ އާ ބައެއް އެހެން ޕާޓީތަކަށް ދަޢުވަތު ދެއްވާފައެވެ.
ރިޔާސީ އިންތިޚާބުގެ ވާދަވެރިކަން ބޮޑުވެފައިވާއިރު، ރައީސް ދެއްވި ދަޢުވަތު ޤަބޫލުކޮށް އެމްޑީޕީއާއެކު ކޯލިޝަން ހަދަން ޢަދާލަތު ޕާޓީއާއި، އެމްޑީއޭ ނިންމާ އެ ދެޕާޓީން އެކަން ވަނީ އިއުލާންކޮށްފައެވެ.