ބ. އަތޮޅު ފަރެސްގައި ތަރައްޤީކުރާ ރިސޯޓް އަންނަމަހުގެ ފުރަތަމަ ދުވަހު ހުޅުވުމަށް ނިންމައިފިއެވެ.
70 މިލިއަން ޑޮލަރުގެ މަޝްރޫއުގެ ދަށުން، ބ.އަތޮޅު ފަރެސްގައި 176 ކޮޓަރީގެ ރިސޯޓެއް ދަނީ ތަރައްޤީކުރަމުންނެވެ. މި ރިސޯޓުގައި ސްޓޫޑިއޯ، ބީޗު ވިލާ އަދި އޯވަރ ވޯޓަރ ވިލާތައް ހުންނާނެއެވެ. އަވާނީ ހޮޓެލްސް އެންޑް ރިސޯޓްސްއިން މަޢުލޫމާތުދޭގައި މި ރިސޯޓުގައި ތަފާތު ކެއުންތައް ލިބޭ ރެސްޓޯރެންޓަކާއި، އަވާނީ ސްޕާއެއްގެ އިތުރުން ބޮޑު ސްވިމިންގ ޕޫލެއް ހުންނާނެއެވެ.
އަވާނީ ހޮޓެލްސް އެންޑް ރިސޯޓްސްއަކީ ރާއްޖޭގައި މިހާރުވެސް ރިސޯޓްތައް ހިންގަމުން އަންނަ އަނަންތާރާ ހޮޓެލްސް އެންޑް ރިސޯޓްސް ބްރޭންޑުގެ މައި ކުންފުނި ކަމަށްވާ ތައިލޭންޑުގެ މައިނަރ ހޮޓެލްސްގެ ބުރޭންޑެކެވެ. އެކުންފުނިން މިހާރުވެސް ދަނީ ރާއްޖޭގައި އަނަންތާރާ ބުރޭންޑުގެ ތިން ރިސޯޓު ހިންގަމުންނެވެ.
ތައިލޭންޑުގެ ކުންފުންޏެއް ކަމަށްވާ މައިނަރ ހޮޓެލްސްއިން ދަނީ ދުނިޔޭގެ އެކި ހިސާބުތަކުގައި އަވާނީ ހޮޓެލްސް އެންޑް ރިސޯޓްސް ބްރޭންޑުގެ ރިސޯޓް ހުޅުވުމަށް މަސައްކަތްކުރަމުންނެވެ.