ބަންދުގައި ތިބޭ މީހުންނާއި ދޭތެރޭ އަނިޔާވެރި، ލާއިންސާނީ އަމަލުތައް ހިންގާތޯ ބެލުމުގެ މަޤްޞަދުގައި ހިއުމަން ރައިޓްސް ކޮމިޝަންގެ ނޭޝަނަލް ޕްރިވެންޓިވް މެކޭނިޒަމްއިން ހދ. ކުޅުދުއްފުށި ޕޮލިސް ސްޓޭޝަން މޮނިޓަރކޮށްފިއެވެ.
މި މޮނިޓަރިން ކުރިއަށް ގެންގޮސްފައިވަނީ މިމަހުގެ 5 އިން 6 އަށެވެ.
އެޗްއާރްސީއެމްއިން ވިދާޅުވީ މި ޒިޔާރަތުގެ މަޤްޞަދަކީ ހދ. ކުޅުދުއްފުށި ޕޮލިސް ސްޓޭޝަނުގައި ތަހުޤީޤަށް ބަންދުކުރެވޭ މީހުން ބަންދުގައި ބައިތިއްބާއިރު އެ މީހުންނާއި ދޭތެރޭ އަނިޔާވެރި، ލާއިންސާނީ ނުވަތަ ދަށުދަރަޖައިގެ ޢަމަލެއް ހިނގާތޯބެލުމަށާއި ރާއްޖޭގައި ލިބިދީފައިވާ އިންސާނީ ހައްޤެއް ގެއްލޭފަދަކަމެއް ހިނގާތޯބެލުންކަމަށެވެ. އަދި ކުޅުދުއްފުށި ޕޮލިސް ސްޓޭޝަނުގައި ބަންދުގައިތިބޭ 18 އަހަރުން ދަށުގެ ކުދިންނާމެދު ޢަމަލުކުރަމުންދާގޮތާއި، އަނިޔާވެރި، ލާއިންސާނީ ނުވަތަ ދަށުދަރަޖައިގެ ޢަމަލެއް ހިނގާތޯބެލުމަކީވެސް މި ޒިޔާރަތުގެ މަޤްޞަދެކެވެ. މީގެ އިތުރަށް ރާއްޖޭގައި ލިބިދީފައިވާ އިންސާނީ ހައްޤެއް ގެއްލޭފަދަކަމެއް ހިނގާތޯބެލުމާއި ބަންދުގައި ތިބޭ ފަރާތްތަކާއި މުވައްޒަފުންނަށް ޤާނޫނު އަސާސީއާއި، ޤާނޫނުތަކާއި ބައިނަލްއަޤްވާމީ މިންގަނޑުތަކުން ލިބިދޭންޖެހޭ ޙައްޤުތައް ކަށަވަރުކުރެވިފައިވާ މިންވަރު ދެނެގަތުމަކީވެސް މި ޒިޔާރަތުގެ މަޤްޞަދެއްކަމަށް އެޗްއާރްސީއެމުން ވިދާޅުވެއެވެ.
މީގެއިތުރުން ހދ. ކުޅުދުއްފުށި ޕޮލިސް ސްޓޭޝަނުގައި މަސައްކަތްކުރާ މުވައްޒަފުންގެ ޙާލަތު ދެނެގަތުމާއި، މުވައްޒަފުންނަށް މަސައްކަތްކުރުމަށް ދިމާވާ ދަތިތައް ދެނެގަނެ ޕޮލިސް ސްޓޭޝަނުގެ މާއްދީ ޙާލަތާއި ޢާއްމު ޙާލަތު ދެނެގަތުންވެސް މި ޒިޔާރަތުގެ މަޤްސަދުގެ ތެރޭގައި ހިމެނެއެވެ.
މި ޒިޔާރަތުގައި ފާހަގަކުރެވުނު ކަންތައްތައް ހިމެނޭ ރިޕޯޓެއް ދިވެހި ފުލުހުންގެ ޚިދުމަތަށާއި ހދ.ކުޅުދުއްފުށި ޕޮލިސް ސްޓޭޝަނަށް ހިއްސާކުރުމަށް ހަމަޖެހިފައިވާ ކަމަށް އެޗްއާރްސީއެމުން ވިދާޅުވެއެވެ. އަދި ރިޕޯޓުތަކުގައި ފާހަގަކޮށްފައިވާ ކަންކަމާއި، ހުށަހަޅާފައިވާ ހުށަހެޅުންތަކާއި ގުޅޭގޮތުން މަޝްވަރާކުރުމަށް ކަމާގުޅޭ އެންމެހައި އިދާރާތަކާއެކު ބައްދަލުވުންތައް ބާއްވައި ރިޕޯޓުތަކުގެ ހުށަހެޅުންތައް ތަންފީޛުވަމުންދާ މިންވަރު ދެނެގަތުމަށް، ލިޔުމުން ޤަވާއިދުން ފޮލޯ-އަޕް ހެދުމަށް ވެސް ހަމަޖެހިފައިވާ ކަމަށް އެޗްއާރްސީއެމްއިން ވިދާޅުވެއެވެ.
ހދ. ކުޅުދުއްފުށީ ޕޮލިސް ސްޓޭޝަނަށް އެން.ޕީ.އެމްއިން މިހާތަނަށް 4 ޒިޔާރަތްކޮށްފައިވެއެވެ. އެގޮތުން، 2012، 2014، 2015 އަދި 2017 ވަނަ އަހަރު ޒިޔާރަތްކޮށްފައިވާއިރު، މީގެ ތެރެއިން 3 ޒިޔާރަތަކީ މޮނިޓަރިންގ ޒިޔާރަތެވެ. އަދި 1 ޒިޔާރަތަކީ (2014 ވަނަ އަހަރުގެ ޒިޔާރަތް) ފޮލޯ-އަޕް ޒިޔާރަތެކެވެ.