ކުރިއަށްއޮތް ރިޔާސީ އިންތިޚާބު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އެއްބުރުން ކާމިޔާބު ކުރައްވާނެކަމަށް ހޯމް މިނިސްޓަރ އަދި ސަރުކާރު ކޯލިޝަންގައި ހިމެނޭ ޢަދާލަތު ޕާޓީގެ ރައީސް، އައްޝައިޚް ޢިމްރާން ޢަބްދުﷲ ވިދާޅުވެއްޖެއެވެ.
ހޯމް މިނިސްޓަރ މިހެން ވިދާޅުވެފައި މިވަނީ ކުރިއަށްއޮތް ރިޔާސީ އިންތިޚާބުގައި ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ، ޖޭޕީއިން ވަކިން ވާދަކުރުމަށް ނިންމުމާއި ގުޅިގެން ކުރެއްވި ޓުވީޓެއްގައެވެ. ޖޭޕީއިން މިގޮތަށް ނިންމާފައި މިވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއެކު ކުރިއަށް އޮތް ރިޔާސީ އިންތިޚާބުގައި ކޯލިޝަން ހަދަން ދައުވަތު ދީފައި ވަނިކޮށެވެ.
ހޯމް މިނިސްޓަރ ވިދާޅުވީ، އެމް.ޑީ.ޕީއާއި ޢަދާލަތު ޕާޓީއާއި އެމް.ޑީ.އޭ އެކުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދެވަނަ ދައުރަކަށް ހޮވުމަށް މަސައްކަތްކޮށްފިނަމަ ސެޕްޓެމްބަރު 9 ގައި ނަގާ ވޯޓުން %51.2 އަށްވުރެ މަތިން ކާމިޔާބުކުރާނެކަމަށެވެ.
Varah hisaabu jahaifin.
— Imran Abdulla (@ShimranAb) March 15, 2023
Maaiy Allah iraadhakurehviyyaa,
@MDPSecretariat aa @AdhaalathOffice adhi @MDAmaldives ekugai Raees @ibusolih 2 vana dhaurakah hovumah hiyvaraa eku masahkaiy kohfinama, 9 September 2023 gai nagaa vote in 51.2% ah vure mathin kaamiyaabu kuraane.ان شاءالله
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ލީޑަރޝިޕާއެކު ކުރިއަށްއޮތް ރިޔާސީ އިންތިޚާބު ފަސޭހައިން ކާމިޔާބުކުރެވޭނެކަމަށް ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލްއުސްތާޛު ޢަލީ ޒާހިރުވެސް ވަނީ ވިދާޅުވެފައެވެ.
ރައީސް އޮފީހުގެ ޗީފް އޮފް ސްޓާފް ޢަލީ ޒާހިރު ކުރެއްވި ޓުވީޓެއްގައި ވިދާޅުވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ލީޑަރޝިޕްގައި އެމް.ޑީ.ޕީ އިސްވެ އޮވެ އަދާލަތު ޕާޓީއާއި، މޯލްޑިވްސް ޑިވެލޮޕްމަންޓް އެލަޔަންސް، އެމް.ޑީ.އޭ ހިމެނޭ ކޯލިޝަނާއެކު މަސައްކަތްކޮށްގެން 2023 ވަނަ އަހަރުގެ ރިޔާސީ އިންތިޚާބު ފަސޭހަކަމާއެކު ކާމިޔާބުކުރެވޭނެކަމުގެ ޔަޤީންކަން އެބައޮތްކަމަށެވެ.
Raees @ibusolih ge leadership ga @MDPSecretariat isve ove @AdhaalathOffice adhi @MDAmaldives himeney coalition ekuga masaikai kohggen 2023 vana aharuge riyaasi inthikhaab faseyhakamaaeku kaamiyaab kureveynekan yageen. In Sha Allah #ibusoalih2023 #MDVElection2023
— Ali Zahir (alipi) (@alixahir) March 14, 2023
ސަރުކާރު ކޯލިޝަންގައި ހިމެނޭ ޕާޓީތަކުގެ ތެރެއިން ޖޭޕީއިން މިފަހަރުގެ އިންތިޚާބަށް ވަކިން ނިކުތުމަށް ނިންމާފައިވާއިރު، ކޯލިޝަނާއެކު ކުރިއަށްދިއުމާމެދު ވަކިގޮތެއް މިހާތަނަށް ނިންމާފައި ނުވަނީ މޯލްޑިވްސް ރިފޯމް މޫވްމަންޓް، އެމް.އާރް.އެމްއިން އެކަންޏެވެ.
މިއަހަރުގެ ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރައްވާނެކަން މިހާތަނަށް އިޢުލާންކޮށްފައިވަނީ އެމްޑީޕީގެ ރިޔާސީ ކެނޑިޑޭޓް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް އަބްދުﷲ ޔާމީނާއި އެމް.އެން.ޕީގެ ރައީސް މުޙައްމަދު ނާޒިމްއެވެ.