ތިލަފުށިން އެއް މިލިއަން ރުފިޔާއަށް ބިމެއް ވިއްކާލިކަމަށް ބުނެ ދެކެވޭ ވާހަކަތައް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީއިން ދޮގުކޮށްފިއެވެ.
އެޗް.ޑީ.ސީއިން މިގޮތަށް ވިދާޅުވެފައިވަނީ އެޗް.ޑީ.ސީގެ ބިމެއް އޮޅުވާލައިގެން ވިއްކާލާފައިވާކަމަށްބުނެ ބައެއް މީޑިއާތަކުން ޚަބަރު ފަތުރާފައިވާތީ، އެކަމާއި ގުޅިގެން ނެރުނު ބަޔާނެއްގައެވެ.
އެޗް.ޑީ.ސީއިން ވިދާޅުވީ، އެ ކޯރަޕރޭޝަންގެ މުވައްޒަފަކު ހެދިފައިވާ އުޞޫލުތަކާއި ޚިލާފަށް އޮޅުވާލައިގެން އަމިއްލަ ފަރާތަކަށް ބިމެއް ދޭނެކަމަށްބުނެ މަންފާއެއް ހޯދުމަށް މަސައްކަތް ކުރާކަން ފާހަގަކުރެވުނު ހިސާބުން އެ މައްސަލަ ބަލާ، އެ މުވައްޒަފު ވަގުތީގޮތުން ސަސްޕެންޑްކޮށްފައިވާކަމަށެވެ. އަދި ކަސްޓަމަރަށް އޮޅުވާލައިގެން ފައިސާގެ މުޢާމަލާތެއްކޮށް އެ މުވައްޒަފުގެ އަމިއްލަ ބޭންކު އެކައުންޓަށް ފައިސާ ޖަމާކޮށްފައިވާކަން މި މައްސަލައިގެ ތަޙުޤީޤުގައި ފާހަގަކުރެވިފައިވާކަމަށް އެޗްޑީސީން ބުނެއެވެ.
މި މައްސަލާގައި އެއް މިލިއަން ރުފިޔާގެ ބިމެއް ވިއްކާފައިވާކަމަށް މީޑިއާގައި ޝާއިއުކޮށްފައިވާ މައުލޫމާތަކީ ތެދު މަޢުލޫމާތެއް ނޫންކަމަށް އެޗް.ޑީ.ސީން ވިދާޅުވެއެވެ. އަދި އެ މުވައްޒަފަށް ބިމެއް ވިއްކުމުގެ ފުރުޞަތެއް އެޗް.ޑީ.ސީގެ އުޞޫލުތަކުގެ ތެރެއިން ލިބިފައެއް ނުވާނެކަމަށާއި، އެ ކޯރޕަރޭޝަންގެ ބިން ވިއްކުމުގެ އުޞޫލުތަކާއި، ހަމަތައް ކަނޑައެޅިފައި ވަނީ ހަރުދަނާ ދެފުއް ފެންނަ ހަމަހަމަ އުސޫލެއްގެމަތިންކަމަށް އެޗް.ޑީ.ސީން ވިދާޅުވެއެވެ.
އެގޮތުން އާއްމުކޮށް ހުޅުވާލައިގެން ގެޒެޓުގައި އިޢުލާންކުރުމަކާ ނުލާ، އަދި އެޗް.ޑީ.ސީގެ ބިޑް ޕޯރޓަލްގައި ރެޖިސްޓަރ ނުވާ އެއްވެސް ފަރާތަކަށް ބިމެއް ނުވިއްކާނެކަމާއި، އަދި ބިން ވިއްކުމަށް ހުޅުވާނުލާނެކަމަށްވެސް އެޗް.ޑީ.ސީން ވިދާޅުވެއެވެ. އަދި މި އަމަލަކީ އެންމެ ހަރުކަށި އިބާރާތުން އެ ކޯޕަރޭޝަނުން ކުށްވެރި ކުރާ އަމަލެއްކަން ފާހަގަކޮށް، އަދި، މިފަދަ އަމަލުތައް ހިންގާ މުވައްޒަފުންނާ މެދުގައި ވަގުތުން ހަރުކަށި ފިޔަވަޅު އަޅާނެ ކަމަށްވެސް އެ ކޯރޕަރޭޝަނުން ވިދާޅުވެއެވެ.
އެޗް.ޑީ.ސީގެ ފަރާތުން ފައިސާގެ އެއްވެސް މުޢާމަލާތެއް އަމިއްލަ މުވައްޒަފެއްގެ ބޭންކު އެކައުންޓެއް މެދުވެރިކޮށް ނުކުރާނެކަން ފާހަގަކުރައްވާ، މިކަމަށް އާއްމު ރައްޔިތުން ސަމާލުވުމަށް އެޗްޑީސީގެ ބަޔާނުގައި ވަނީ ނަސޭހަތްތެރިވެފައެވެ. އަދި މިގޮތަށް ޤައިރު ޤާނޫނީގޮތުން، އާންމުކޮށް އިޢުލާން ކުރުމަކާއި ނުލާ އަދި އަމިއްލަ އެކައުންޓް ބޭނުންކޮށް ހިންގޭ މުޢާމާލާތުތަކަށް އާއްމުން ސަމާލުވެ، މިފަދަ އަމަލެއް ހިންގާކަން ފާހަގަކުރެވިއްޖެނަމަ ލަސްނުކޮށް އެންގުމަށްވެސް އެޗް.ޑީ.ސީން ވަނީ އިލްތިމާސްކުރައްވާފައެވެ.