ގަލޮޅު ޕޮލިސް ސްޓޭޝަނުގެ ޚިދުމަތް، ކުރިން އެންސްޕާ ހިންގި ޢިމާރާތަށް ބަދަލުކޮށް, އެ ޢިމާރާތް ރަސްމީކޮށް ހުޅުވައި ޚިދުމަތް ދޭން ފަށައިފިއެވެ. ގަލޮޅު ޕޮލިސް ކުރިން ހިންގަމުންދިޔައީ އަމީނީމަގުގައި ހުންނަ މާލެހިޔާގައެވެ.
ގަލޮޅު ޕޮލިސް ސްޓޭޝަނުގެ އައު ޢިމާރާތް ރަސްމީކޮށް ހުޅުވައިދެއްވީ އެކަމަށްޓަކާ މިއަދު ބޭއްވި ޚާއްސަ ރަސްމިއްޔާތުގައި ކޮމިޝަނަރ އޮފް ޕޮލިސް މުޙައްމަދު ޙަމީދުއެވެ.
މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް އަލީ ރަޝީދާއި، ފުލުހުންގެ އެގެޒެކެޓިވް އޮފިސަރުންނާއި، ކޮމިޝަންޑު އޮފިސަރުން އަދި ގަލޮޅު ޕޮލިސް ސްޓޭޝަނުގެ އިސްވެރިން ބައިވެރިވެވަޑައިގަތެވެ.
ކުރިން އެންސްޕާ ހިންގި ޢިމާރާތުގައި ގަލޮޅު ޕޮލިސް ސްޓޭޝަން ހިންގުމަށް ހަމަޖެއްސީ މާލެހިޔާގައި ހިންގަމުން ދިޔަ ގަލޮޅު ޕޮލިސް ޢިމާރާތް ވަރަށް ބޮޑަށް ބައުވެ، އެތަނަކީ ރައްޔިތުންނަށް ފުރިހަމަ ޚިދުމަތެއް ދިނުމަށް އެކަށީގެންވާ ތަނަކަށްނުވާތީ، ގަަލޮޅު ޕޮލިސް ހިންގުމަށް މާލެއިން އެކަށީގެންވާ ޢިމާރާތެއް ހޯދުމަށް އިޢުލާނުކުރުމުން ކުރިމަތިލީ ފަރާތްތަކުގެ ތެރެއިންނެވެ. މި ޢިމާރާތް ކުއްޔަށް ހިފާފައިވަނީ ދެ އަހަރާއި ބައިގެ މުއްދަތަކަށްކަމަށް ފުލުހުން ވިދާޅުވެއެވެ.
މި ޢިމާރާތުގައި ފުލުހުންގެ ޚިދުމަތް ދޭން ފެށުމުން ގަލޮޅު ޕޮލިސްގެ ރެސްޕޯންސް އޮފިސަރުންނާއި، އިންވެސްޓިގޭޝަން އޮފިސަރުން އަދި ނެއިބަރހުޑް އޮފިސަރުން އެެއް އިމާރާތަކުން މަސައްކަތްކުރަން ވަނީ ފަށާފައެވެ. އަދި މިއީ ގަލޮޅު ސަރަޙައްދުގެ ރައްޔިތުންނަށް ދެވޭ ޚިދުމަތް އިތުރަށް ފުރިހަމަވެގެންދާނެ ކަމެއްކަމަށް ފުލުހުންގެ ޚިދުމަތުން ވިދާޅުވެއެވެ.
މީގެ ކުރިން މާފަންނު ޕޮލިސްވެސް ވާނީ މި މޮޑެލްއަށް ބަދަލުކޮށް، މަސައްކަތްކުރަމުން ދިޔަ ޢިމާރާތް މާފަންނު ވެސްޓްޕާކު ސަރަހައްދުގައި ހުރި ޢިމާރާތަށް ބަދަލުކޮށްފައެވެ.