ނަހަމަގޮތުގައި ބޭނުންކުރަމުން އަންނަ ސިމްކާޑްތައް ބްލޮކްކޮށް އެކަކަށް މޯބައިލް ސިމް ނެގޭ މިންވަރު ކަނޑައެޅުމަށް ކުރަންޖެހޭ މަސައްކަތްތައް އަންނަ މެއި މަހުގެ ތެރޭގައި ފަށާނެކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސްއިން ވިިދާޅުވެއްޖެއެވެ.
އޮޅުވާލައިގެން އެކިގޮތްގޮތުން ފައިސާ ހޯދާ މައްސަލަތައް ފަހަކަށް އައިސް ވަނީ އިތުރުވެފައެވެ. އެކަން ކުރުމަށް މައިގަނޑުގޮތެއްގައި ބޭނުންކުރަނީ އެހެން މީހެއްގެ ނަމުގައި ނަގާފައިވާ ސިމް ކާޑު ނުވަތަ ބިދޭސީންގެ ނަމުގައި ނަގާފައިވާ ސިމް ކާޑެވެ. ރާއްޖޭގައި މޮބައިލް ސިމް ކާޑު ގަނެފައިވާ މީހުންގެ ތެރޭގައި އެންމެ ގިނައީ ބިދޭސީންކަމަށް ފުލުހުންގެ ތަފާސް ހިސާބުތަކުން ދައްކައެވެ. ރާއްޖޭގައި ނޫޅޭ ބިދޭސީން، ކޮންމެ މީހަކަށް އެވްރެޖްކޮށް 5،000 ސިމް ކާޑު ނަގާފައިވާކަމަށް ފުލުހުން ހާމަކުރައްވާފައިވެއެވެ.
މުއާސަލާތީ ވަސީލަތްތައް ބޭނުންކޮށްގެން ކުރާ ނޭދެވޭ އަމަލުތައް ދުވަހުން ދުވަހަށް އިތުރުވަމުން ދިއުމާއެކު، މިފަދަ އަމަލުތައް ހުއްޓުވުމަށްޓަކައި އަޅާ ފިޔަވަޅުތައް ސާފުކުރުމަށްޓަކައި ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމެޓީގައި ކޮމިއުނިކޭޝަން އޮތޯރިޓީ އޮފް މޯލްޑިވްސްގެ ޗީފް އެގްޒެކެޓިވް އިލްޔާސް އަހުމަދު ވިދާޅުވީ އެކަކަށް ނެގޭ ސިމް ކާޑުގެ މިން ކަނޑައެޅުމުގެ މަސައްކަތް އެންމެ ލަސްވެގެން މެއި މަހުގެ ތެރޭގައި ފެށިގެންދާނެ ކަމަށެވެ.
އެގޮތުން އެކެއްގެ ނަމުގައި ގިނަ ސިމްތަކެއް ނަގާފައިވާ ނަމަ އެ ސިމްތައް ވެރިފައިކޮށް އެ ފަރާތުގެ އައިޑެންޓިޓީ ވެރިފައި ކުރުމަށްފަހު އެ ލިސްޓުން ނަމްބަރުތައް ކެނޑުމުގެ މަސައްކަތްވެސް މެއި މަހު ފަށްޓަވާނެކަމަށް އިލްޔާސް ވިދާޅުވިއެވެ. އިލްޔާސް ވިދާޅުވީ އެ މަސައްކަތަށް ހޭދަވާނެ ކަމަށް ބެލެވެނީ ތިން މަސް ދުވަހުގެ މުއްދަތެއް ކަމަށެވެ.
"ގާތްގަނޑަކަށް ތިން މަސްދުވަހުގެ ތެރޭގައި މިހެން ގިނައިން ހުރި ނަމްބަރުތައް ހަމައަކަށް އަޅުވާލާ، އަލަށް އަޅުގަނޑުމެން ހަމަޖައްސާ އުސޫލެއް، އެއީ ކޮންމެ މީހަކަށްވެސް ވަކި ވަރަކަށް ސިމް ލިބޭ އުސޫލަށް އަމަލުކުރަން ފެށުން" ކޮމިއުނިކޭޝަން އޮތޯރިޓީގެ ޗީފް އެގްޒެކެޓިވް އިލްޔާސް އަހުމަދު ވިދާޅުވިއެވެ.
ކޮމިޓީގައި ވާހަކަދައްވަމުން މިނިސްޓަރ އޮފް ސްޓޭޓް ފޮރ އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ މުޙައްމަދު ޝަރީފް ވިދާޅުވީ ޑިޖިޓަލް އައިޑެންޓިޓީ ނިޒާމްގެ ތެރެއިން ސިމް ދޫކުރެވޭނެ އިންތިޒާމް ހަމަޖެއްސުމުގެ މަސައްކަތްވެސް އަންނަ ކުއަރޓާގެ ތެރޭގައި ނިންމާލެވޭނެކަމަށެވެ. މިގޮތުން މިހާރުވެސް އެ މަސައްކަތް ފެށި އޫރިދޫ އަދި ދިރާގާއެކު ޓެސްޓް ކުރަން ފަށާފައިވާކަމަށާއި، މުސްތަގުބަލުގައި ސިމްކާޑްއާއި ޑިޖިޓަލް އައިޑީ ގުޅުވާލެވޭނެކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ޑިޖިޓަލް އައިޑީގެ ނިޒާމްއަކީ އޯޓީޕީ ނައްތާލުމަށް ތަޢާރަފްކުރާ ނިޒާމެއްކަމަށެވެ. އަދި މި ނިޒާމް ފުޅާވެގެން ދިޔުމުން އޯޓީޕީއަށް ބަރޯސާވުން ކުޑަކުރެވިގެންދާނެކަމަށާއި، މީގެ ސަބަބުން ސައިބަރ ސެކުއިޓީގެ މައްސަލަތަކައް ހައްލު ލިބޭނެކަމަށް ޝަރީފް ވިދާޅުވިއެވެ.
"އަޅުގަނޑުމެން މި ބޭނުންކުރަނީ 3 ފެކްޓަރ އޯތަންޓިފިކޭޝަން. އަޅުގަނޑުމެން އެބަ ބަލަން ޔޫސަރ ނޭމްއާއި، ޕާސްވޯޑާއި، އެއީ އޭނަތޯވެސް ކަށަވަރުކުރަން. ފޭސް އޯތަންޓިފިކޭޝަންއެއް ހަދާފައި ޑިޖިޓަލް އައިޑީ ދޫ ކޮށްލަނީ" ޝަރީފް ވިދާޅުވިއެވެ.
ސްކޭމްތައް އިތުރުވުމާ ގުޅޭގޮތުން އެސްއޯއީ ކޮމިޓީގެ އެދުމަށް ފުލުހުން ހުށަހެޅި ރިޕޯޓުގައިވެސް ފާހަގަކޮށްފައިވާ އެންމެ ބޮޑު މައްސަލައަކީ އެކެއްގެ ނަން މަތީގައި ގިނަ ސިމް ނެގޭ ގޮތަށް އޮތުމެވެ. ރައްޔިތުންގެ މަޖިލީހުގެ އެސްއޯއީ ކޮމެޓީއަށް ފުލުހުން ފޮނުވި ރިޕޯޓުގައިވާގޮތުން އެކަކުގެ ނަމުގައި 800 ސިމް ކާޑު ނަގާފައިވެއެވެ. އަދި 2 ބިދޭސީއެއްގެ ނަމުގައި 24،000 ސިމް ކާޑު، 12 ބިދޭސީއެއްގެ ނަމުގައި 38،000 ސިމް ކާޑު ނަގާފައިވާކަންވެސް ފުލުހުންގެ ރިޕޯޓުގައިވެއެވެ. މިޢާއެކު ޖުމްލަ 14 ބިދޭސީއެއްގެ ނަމުގައި 62،000 ސިމް ކާޑު ވަނީ ނަގާފައެވެ.
ފުލުހުންގެ ރިޕޯޓުގައިވާގޮތުން އޮޅުވާލައިގެން ފައިސާ ހޯދާ މައްސަލަތަކުގެ ތެރެއިން 305 ނަންބަރަކީ މާފުށި ޖަލުގައި ތިބި ގައިދީން ބޭނުންކޮށްފައިވާ ނަންބަރުތަކެވެ. އެހެންކަމުން މާފުށީ ޖަލުގައި ޖޭމަރު ހަރުކޮށްގެން ކޯލް ނުކުރެވޭނެ ގޮތްތަކެއް ހެދުމުގެ މަސައްކަތް ކުރަމުން އަންނަކަމަށް ފުލުހުން ވިދާޅުވެފައިވެއެވެ.
އެކި ނަންބަރުތަކުން ގުޅައިގެން އޮޅުވާލައިގެން ފައިސާ ހޯދުމަށް އެންމެ ގިނައިން ފޯން ކޯލްތައް އަންނަ މާފުށީ ޖަލުންކަމަށް ތުހުމަތުކުރެވޭ މައްސަލާގައި އެސްއޯއީ ކޮމިޓީއަށް ވަނީ މޯލްޑިވްސް ކަރެކްޝަނަލް ސާރވިސް ވެސް ޙާޒިރުކޮށްފައެވެ. ނަމަވެސް ކަރެކްޝަނަލް ސާރވިސްގެ ބޭފުޅުން ހާޒިރުކުރި ބައި ކޮމިޓީން ވަނީ ސިއްރުކޮށްފައެވެ.