ރާއްޖެއަށް އެތެރެކުރުން މަނާ ބާވަތުގެ ފަސްލައްކައަށްވުރެ ގިނަ ޕްލާސްޓިކް ކޮތަޅު މޯލްޑިވްސް ކަސްޓަމްސް ސަރވިސްއިން ނައްތާލައިފިއެވެ.
ކަސްޓަމްސްއިން ނެރުނު ބަޔާނެއްގައި ބުނީ ނައްތާލާފައިވަނީ ރާއްޖެއަށް އެތެރެކުރުން މަނާ ޕްލާސްޓިކްގެ ގޮތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ކަނޑައަޅާފައިވާ ބާވަތްތައް ކަމަށެވެ. ކުޅުދުއްފުށީ ކަސްޓަމްސް އިން ހިފެހެއްޓި މި ތަކެތި ނައްތާލާފައިވަނީ އެ ރަށުގެ ކުނި ނައްތާލާ ސަރަހައްދުގައެވެ.
ކަސްޓަމްސްއިން އާންމުކޮށްފައިވާ މައުލޫމާތަށް ބަލާއިރު، މި މަހުގެ 16 ވަނަ ދުވަހު ވަނީ އެކި ސައިޒުގެ ޖުމްލަ 535،000 ޕްލާސްޓިކް ކޮތަޅު އެ ރަށުން ނައްތާލާފައެވެ. އަދި، މި އަހަރު މިހާތަނަށް ކުޅުދުއްފުށީ ކަސްޓަމްސްއިން ޖުމްލަ 5،018،500 ޕްލާސްޓިކް ކޮތަޅު ނައްތާލާފައިވާ ކަމަށް ކަސްޓަމްސްއިން ބުނެއެވެ.
އެއްފަހަރު ބޭނުންކުރެވޭ ޕްލާސްޓިކް ބޭނުންކުރުން 2023 ވަނަ އަހަރާއި ހަމަޔަށް ހުއްޓާލާ ގައުމަކަށް ދިވެހިރާއްޖެ ހެދުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރުގެ ވަރަށް ބޮޑު އަމާޒެކެވެ.
މި އަމާޒު ހާސިލްކުރުމަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނަށް ގެނެސްފައިވާ އިޞްލާޙުގެ ދަށުން ތިމާވެއްޓަށް ގެއްލުން ދޭ އެއްޗެތީގެ ތެރެއިން، ރައީސުލްޖުމްހޫރިއްޔާ ކަނޑައަޅާ ސިންގަލް-ޔޫސް ޕްލާސްޓިކްގެ ބާވަތްތައް، ދިވެހިރާއްޖެއަށް އެތެރެކުރުމާއި އުފެއްދުމާއި ބާޒާރަށް ނެރުމަކީ މަނާކަމެއްގެ ގޮތުގައިވަނީ ކަނޑައަޅާފައެވެ. އެކި މަރުޙަލާތަކަކަށް ބަހާލައިގެން މިތަކެތި ކަނޑައެޅުމުގެ އިޚްތިޔާރު ރައީސުލްޖުމްހޫރިއްޔާއަށް ދެއްވާފައިވާއިރު ފުރަތަމަ ލިސްޓު މިދިޔަ އަހަރުގެ ޖެނުއަރީމަހުގެ 1 ވަނަ ދުވަހު ވަނީ އާއްމުކުރައްވާފައެވެ.
އެގޮތުން ދިޔާތަކެތި ބުއިމަށް ބޭނުންކުރާ އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ހޮޅިއާއި ޕްލާސްޓިކް ތަށި، ސަމްސާ، ވަޅި، އޫ، ދިޔާތަކެތި ގިރަން ބޭނުންކުރާ ޕްލާސްޓިކް ދަނޑިކޮޅާއި ކާބޯތަކެތި ބަންދުކުރާ ސްޓައިރަފޯމް ފޮއްޓާއި ބާޒާރުކުރަން ބޭނުންކުރާ 30 ސެންޓިމީޓަރަށް ވުރެ ކުޑަ ޕްލާސްޓިކް ކޮތަޅު ހިމެނެއެވެ. ސަރުކާރުން މިހާރު ވަނީ ވިޔަފާރިތަކުން ކަސްޓަމަރުންނަށް ވިއްކާ ނުވަތަ ފޯރުކޮށްދޭ ކޮންމެ ޕްލާސްޓިކް ކޮތަޅަކަށް، ޓެކުހުގެ ގޮތުގައި ކަސްޓަމަރުންގެ އަތުން 2 ރުފިޔާ ނެގޭގޮތަށް ހަމަޖައްސާފައެވެ.