ކުނި ބިލު، ކަރަންޓް ބިލުގައި ހިމެނުމަށް މީޓަރުތަކުގެ މައުލޫމާތު މިމަހުގެ 13ގެ ކުރިން ދޭންޖެހޭނެ
ކުނި ނެގުމުގެ ހިދުމަތަށް ނަގާ ފީ ކަރަންޓް ބިލުގައި ހިމެނުމަށްޓަކައި، ގޭބީސީތަކުގެ ކަރަންޓް މީޓަރުތަކުގެ މައުލޫމާތު މިމަހުގެ 13 ވަނަ ދުވަހުގެ ކުރިން ފޯރުކޮށްދޭން ވެމްކޯއިން އެދިއްޖެއެވެ.
ވެމްކޯއިން ފޯރުކޮށްދޭ ކުނި ނެގުމުގެ ހިދުމަތަށް ނަގާ ފީ މިމަހުގެ 1 ވަަނަ ދުވަހުން ފެށިގެން ސްޓެލްކޯގެ ކަރަންޓް ބިލުގައި ހިމަނަން ވަނީ ނިންމާފައެވެ.
ކަރަންޓް ބިލުގައި ކުނި ބިލު ހިމަނަން ނިންމާފައިފާތީ ވެމްކޯއިން ވަނީ މީޓަރުތަކުގެ މަޢޫލޫމާތު މިމަހުގެ 6 ވަނަ ދުވަހުގެ ކުރިން ފޯރުކޮށްދޭން މީގެކުރިން އަންގާފައެވެ. އެހެންނަމަވެސް އެ މުއްދަތު މިހާރު ވަނީ މި މަހުގެ 13 ވަނަ ދުވަހާއި ހަމައަށް އިތުރުކޮށްފައެވެ.
ވެމްކޯއިން ބުނީ އާންމު ގޭބީސީތަކުގެ ކަރަންޓް މީޓަރުތަކުގެ ތެރޭގައި، ގޭބީސީގައި ނުހިމެނޭ ލިފްޓް ނުވަތަ މެއިންޓަނަންސް މީޓަރެއްވާނަމަ އެފަރާތްތަކުން "ޔޫޓިލިޓީ މީޓަރ އެކްސްކްލޫޝަން ފޯމް" ފުރިހަމަކޮށް، އެ ކޯޕަރޭޝަނަށް ހުށަހެޅުމަށް އެދިފައެވެ. މީގެ އިތުރުން ކޮމަރޝަލް ރެޒިޑެންޝަލް ކޮމްޕްލެކްސްތައް ނުވަތަ ފްލެޓްތައް ބަލަހައްޓާ ފަރާތްތަކުން "ޕްރައިމަރީ މީޓަރ އައިޑެންޓިފިކޭޝަން އެންޑް ގްރޫޕިންގ ފޯމް" ފުރިހަމަކޮށް ހުށަހެޅުމަށް ވެމްކޯއިން އެދިފައެވެ.
މީގެއިތުރން ވެމްކޯގެ ހިދުމަތް ހޯދާ އެކިއެކި މުއައްސަސާތަކާއި ވިޔަފާރިތަކާއި ހިއްސާކޮށްފައިވާ "އިންފޮމޭޝަން އަޕްޑޭޓް ފޯމް"ވެސް ފުރިހަމަ ކުރުމަށްފަހު 13 އެޕްރީލްގެ ކުރިން ހުށަހެޅުމަށް ވެމްކޯއިން ވަނީ އެދިފައެވެ.
ވެމްކޯއިން ވިދާޅުވީ މި މުއްދަތުގައި ފޯމް ހުށަނާޅާ މުއައްސަސާތަކާއި ވިޔަފާރިތަކަށް އަންނަ މަހުން ފެށިގެން ޚިދުމަތް ދިނުން މެދުކެނޑޭނެ ކަމަށެވެ. އަދި އާއްމު ފަރާތްތަކުންވެސް ވީ އެންމެ އަވަހަކަށް "ޔޫޓިލިޓީ މީޓަރ އެކްސްކްލޫޝަން ފޯމް" އާއި "ޕްރައިމަރީ މީޓަރ އައިޑެންޓިފިކޭޝަން އެންޑް ގްރޫޕިންގ ފޯމް" ފުރިހަމަކުރުމަށްފަހު ހުށަހެޅުމަށް އެކޯރޕަރޭޝަނުން ވަނީ އިލްތިމާސްކުރައްވާފައެވެ.
ކަރަންޓް ބިލުގައި ކުނި ބިލު ހިމަނަން ސަރުކާރުން ނިންމީ ވެމްކޯގެ ބިލަށް ގިނަ ބަޔަކު ފައިސާ ނުދައްކާތީއެވެ. އެކަމުގެ ސަބަބުން ކުންފުނީގެ އޮޕަރޭޝަންތަކަށް ބުރޫ އަރާކަމަށާއި ކަރަންޓު ބިލާއެކު ވެމްކޯގެ ބިލު ހިމެނުމުން ފައިސާ ނުދައްކާ މައްސަލަ ހައްލުވާނެވެސް ވެމްކޯއިން ބުނެއެވެ.