ބޯޑަރ ސެކިއުރިޓީގެ ވަރުގަަދަކުރުމަށް ޖަޕާނުން ރާއްޖެއަށް ފޯރުކޮށްދިން އެހީގެ ތަކެއްޗާއެކު ކުއްލި ހާލަތްތަކުގައި މަސައްކަތްކުރުމަށް ފަސޭހަވެ، ބޯޑަރުގެ ރައްކާތެރިކަން ކަށަވަރުކުރެވިގެންދާނެކަމަށް މިނިސްޓަރ އޮފް ޑިފެންސް މާރިޔާ އަޙްމަދު ދީދީ ވިދާޅުވެއްޖެއެވެ.
ޑިފެންސް މިނިސްޓަރ މިހެން ވިދާޅުވީ ޖަޕާނުން މޯލްޑިވްސް ކަސްޓަމްސް ސަރވިސަސްގެ އޮޕަރޭޝަންތައް ފުޅާކުރުމަށް ބޭނުންވާ ބައެއް ސާމާނާއި ވެހިކަލްތައް ހަވާލުކުރުމަށް ބޭއްވި ރަސްމިއްޔާތުގައެވެ.
ބޯޑަރ ސެކިއުރިޓީގެ މަސައްކަތަށް ބޭނުންވާ ސާމާނާއި ވެހިކަލްތައް ހަވާލުކުރުމަށް ކަސްޓަމްސް ބިލްޑިންގައި ބޭއްވި ރަސްމިއްޔާތުގައި މިނިސްޓަރ އޮފް ޑިފެންސް މާރިޔާ އަޙްމަދު ދީދީ ވިދާޅުވީ ޖަޕާނު ސަރުކާރުން ކަސްޓަމްސްއަށް ފޯރުކޮށްދިން އެހީގެ ސަބަބުން ބޯޑަރ ބެލެހެއްޓުމުގެ މަސައްކަތްތަކަށް އިތުރު ކުރިއެރުންތަކެއް އަންނާނެކަމަށް ޤަބޫލުފުޅު ކުރައްވާކަމަށެވެ. އެގޮތުން ކުއްލި ހާލަތްތަކުގައި މަސައްކަތްކުރުމަށް ކަސްޓަމްސްގެ އޮފިސަރުންނަށް ފަސޭހަވެގެން ދާނެކަމަށާއި ރާއްޖެއަށް އެތެރެކޮށް ބޭރުކުރާ މަނާތަކެތި އަތުލައިގަތުމަށް މިހާރަށްވުރެ ފަސޭހަވެގެންދާނެކަމަށްވެސް މާރިޔާ ވިދާޅުވިއެވެ.
ރާއްޖެފަދަ ވަށައިގަން ކަނޑު އޮންނަ ޤައުމަކަށް ފުރިހަމަ ކަސްޓަމްސްގެ ޚިދުމަތަކީ މުހިއްމު ޚިދުމަތެއްކަން ފާހަގަކުރައްވާ މިނިސްޓަރ ވިދާޅުވީ ރާއްޖޭގެ ބޯޑަރުތަކުގެ ސަލާމަތާއި ރައްކާތެރިކަން ކަށަވަރުކުރުމަށް ކަސްޓަމްސްއިން ގިނަ މަސައްކަތްތަކެއް ކުރަމުން އަންނަކަމަށެވެ.
މިނިސްޓަރ ވަނީ މަސްތުވާތަކެއްޗާއެކު ދަތުރުކުރާ ބޭރު ޤައުމުތަކުގެ މީހުންގެ ޓްރާންސިޓް މަންޒިލަކަށް ރާއްޖެވުމަކީ ކަންބޮޑުވާކަމެއްކަން ފާހަގަކުރައްވާފައެވެ.
"ރާއްޖެއަށް އެތެރެވެވޭ ކޮންމެ ބަނދަރެއްގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ޤައުމީ ދިފާޢީ ބާރާއި ކޯސްޓްގާޑައި ކަސްޓަމްސްއާއި އެހެނިހެން އިދާރާތައްވެސް ގުޅިގެން މަސައްކަތްކުރުމަށް ދައުރެއް އޮންނާނެ. ބޯޑަރު ރައްކާތެރިކުރުމަށް މި އިދާރާތަކަށް ޖަޕާނު ސަރުކާރުން އަންނަނީ އެހީތެރިކަން ފޯރުކޮށްދެމުން." މާރިޔާ ވިދާޅުވިއެވެ.
މި ރަސްމިއްޔާތުގައި ކޮމިޝަނަރ ޖެނަރަލް އޮފް ކަސްޓަމްސް އަބްދުﷲ ޝަރީފް ވިދާޅުވީ ޖަޕާނުން ފޯރުކޮށްދިން އާލާތްތައް މާލެ ސަރަޙައްދުގައި އިތުރަށް އަތޮޅުތެރޭގައިވެސް ބޭނުން ކުރުމަށް ފޮނުވާނެކަމަށެވެ. އަދި މި ވެހިކަލްތަކާއި އިކުއިޕްމަންޓްތައް ބޭނުންކުރާނެ ގޮތުގެ ތަމްރީންތައް ފޯރުކޮށްދިނުމަށް ހަމަޖެހިފައިވާކަމަށްވެސް ޝަރީފް ވިދާޅުވިއެވެ.
"މި ވެހިކަލްތަކާއި އިކުއިޕްމަންޓްތައް ބޭނުންކުރާނެ ގޮތުގެ ތަމްރީން ދިނުމަށް އަންނަ މަހު ޖަޕާނުގެ ޓީމެއް އައުމަށް ވަނީ ހަމަޖެހިފައި. މިއާއެކު ކަސްޓަމްސްގެ އޮފިސަރުންނަށްވެސް ވަރަށްބޮޑަށް ފަސޭހަވެގެންދާނެ." ކޮމިޝަނަރ ޖެނަރަލް އޮފް ކަސްޓަމްސް އަބްދުﷲ ޝަރީފް ވިދާޅުވެއެވެ.
ޖަޕާނުން ރާއްޖެއަށް ކަނޑައަޅާފައިވާ ސަފީރު ޓެކްއުޗި މިޑޯރި ވިދާޅުވީ ފަތުރުވެރިކަމަށް ބަރޯސާވާ ރާއްޖޭގެ ބޯޑަރުތައް ރައްކާތެރިކުރުމަކީ ވަރަށް މުހިއްމު ކަމެއްކަމަށެވެ. އަދި ކަނޑާއި އެއްގަމާއި ވައިގެ ދަތުރުފަތުރުގެ ރައްކާތެރިކަން ކަށަވަރުމަށް މީގެ ކުރިންވެސް ޖަޕާނުން އެހީތެރިކަން ފޯރުކޮށްދީފައިވާކަން ސަފީރު ފާހަގަކުރެއްވިއެވެ.
"މިދިޔަ އަހަރުތަކުގައި ޖަޕާނުން ވަނީ ވައިގެ ބަނދަރުތަކާއި ކަނޑާއި އެއްގަމުގެ ރައްކާތެރިކަން ކަށާވަރުކުރުމަށްޓަކައި އެކި އިދާރާތަކަށް އެހީތެރިކަން ފޯރުކޮށްދީފައި. މިވާ އެހީތެރިކަމުންދިވެހިންގެ ސަލާމަތާއި ރައްކަތެރިކަން ކަށަވަރުކުރުމަށް މަސައްކަތް ކުރާނެކަމަށް އުއްމީދު ކުރަން. ޖަޕާނުން ކުރިއަށް އޮތްތަނުގައިވެސް މި އެހީތެރިކަން ފޯރުކޮށްދެމުންދާނެ" ޖަޕާނުން ރާއްޖެއަށް ކަނޑައަޅާފައިވާ ސަފީރު ޓެކްއުޗި މިޑޯރި ވިދާޅުވިއެވެ.
ޖަޕާނު ސަރުކާރުން މޯލްޑިވްސް ކަސްޓަމްސް ސަރވިސަސްއަށް އެއްގަމުގައި ދުއްވާނެ 4 އުޅަނދަކާއި ބައެއް އުޅަނދުތަކުގެ ސްޕެއަރ ޕާޓްސްތަކާއި ކެމިކަލްއާއި ގޮވާ ޒާތުގެ ތަކެއްޗާއި މަސްތުވާތަކެތި ދެނެގަންނާނެ 8 ސްޕެކްޓްރޮ މީޓަރ ހަދިޔާކޮށްފައެވެ. މީގެއިތުރުން ވަގު ނޫޓް ދެނެގަންނާނެ 4 ޑިޓެކްޓަރާއި 2 މޯބައިލް އެކްސްރޭ މެޝިންވެސް ޖަޕާނުން ވަނީ ހަދިޔާކޮށްފައެވެ.
ޖަޕާނުން ހަދިޔާ ކުރެއްވި ރަމްޒީގޮތުން ހަވާލުކޮށްދެއްވީ އެ ޤައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޓެކްއުޗި މިޑޯރިއެވެ. އަދި ރާއްޖެއިން އެތަކެއްޗާއި ހަވާލުވެވަޑައިގަތީ މިނިސްޓަރ އޮފް ޑިފެން މާރިޔާ އަޙްމަދު ދީދީއެވެ.
ޖަޕާނު ސަރުކާރުން ހަދިޔާކުރި ތަކެއްްޗަކީ 2020 ވަނަ އަހަރު ރާއްޖެއާއި ޖަޕާނާއި ދެމެދު ސޮއިކޮށްފައިވާ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމްގެ ދަށުން ހަދިޔާކުރި ތަކެއްޗެވެ.
މި ޕްރޮގްރާމްގެ ދަށުން ކަސްޓަމްސްއާއި އިމިގްރޭޝަންގެ ޚިދުމަތްތައް ފުޅާކުރުމަށް 4.68 މިލިއަން ޑޮލަރު ނުވަތަ 72.6 މިލިޔަން ރުފިޔާގެ ތަކެތީގެ އެހީތެރިކަން ފޯރުކޮށްދޭންވެސް ނިންމާފައިވެއެވެ.