މި އަހަރުގެ ސެކަންޑަރީ ސްކޫލް ސެޓިފިކެޓު، އެސްއެސްސީ އިމްތިހާން މިއަދު ފަށްޓަވައިފިއެވެ.
ރާއްޖޭގައި ޖުމުލަ 244 ސެންޓަރެއްގައި އެސްއެސްސީ އިމްތިހާން ފަށްޓަވާފައި ވަނީ މިއަދު ހެނދުނު 09:00 ގައެވެ. މިއަދު އޮތީ އިސްލާމް މާއްދާގެ ޕޭޕަރު އެކެކެވެ. ހުރިހާ ސެންޓަރުތަކަކުން ވެސް ވަނީ ގަޑިއަށް އިމްތިޙާނު ފަށްޓަވާފައެވެ..
މި އަހަރުގެ އެސްއެސްސީ އިމްތިހާނުގައި ޖުމުލަ 6،107 ދަރިވަރުން ބައިވެރިވެއެވެ. އެއީ މިދިޔަ އަހަރާ އަޅާބަލާއިރު، 444 ދަރިވަރުންގެ އިތުރުވުމެކެވެ.
އެސްއެސްސީ އިމްތިހާނަށް ފަހު އަންނަ މަހުގެ ދެ ވަނަ ދުވަހު ކެމްބްރިޖް އޯލެވެލް އިމްތިހާން ފަށްޓަވާނެއެވެ. އެ އިމްތިޙާނުގައި ޖުމުލަ 6،698 ދަރިވަރުން ބައިވެރިވެއެވެ. އެއީ މިދިޔަ އަހަރާއި އަޅާބަލާއިރު 759 ދަރިވަރުންގެ އިތުރުވުމެކެވެ.
އޯލެވެލް އިމްތިޙާން ނިމޭނީ ޖޫން މަހުގެ އަށް ވަނަ ދުވަހުއެވެ.
އެހެން އަހަރުތަކާ ޚިލާފަށް މި އަހަރުގެ އިމްތިޙާނަށް ވަނީ މައިގަނޑު ދެ ބަދަލެއް ގެންނަވާފައެވެ. އެގޮތުން ކުރީގައި އެންމެ ފުރަތަމަ ބާއްވަނީ އިސްލާމް މާއްދާގެ ޕޭޕަރު ދޭއް ނަމަވެސް މިފަހަރު އެންމެ ފުރަތަމަ އޮތީ އިސްލާމް ޕޭޕަރު އެކެކެވެ. މީގެ އިތުރުން، ފާއިތުވި އަހަރުތަކުގައި އަތުކުރި ގަޑި އަޅައިގެން އިމްތިހާނުގައި ބައިވެރިވެވުނު ނަމަވެސް މިފަހަރަަކު ގަޑި އަޅައިގެން އިމްތިޙާންގައި ބައިވެރިއެއް ނުވެވޭނެއެވެ.
އެގޮތުން އާދައިގެ އަތުކުރި ގަޑިއެއް އިމްތިހާން ހޯލަށް ވެއްދުނު ނަމަވެސް، އެ ބާއްވަން ޖެހޭނީ އިންވިޖިލޭޓަރަށް ފެންނަ ގޮތަށް މޭޒުމަތީގައެވެ. އެ ބަދަލު ގެންނަން ނިންމީ ކޭމްބްރިޖުން ފޯރުކޮށްދޭ ހުރިހާ އިމްތިޙާނެއްގެ މައި އިދާރާ ޖޭސީކިޔުގެ ލަފާގެ މަތިންނެވެ.
އެޑިއުކޭޝަން މިނިސްޓްރީން ވަނީ އިމްތިޙާނުގައި ދަރިވަރުންގެ ނަތީޖާ ރަނގަޅުކުރުމަށް މުދައްރިސުންނާއި ބެލެނިވެރިން އެންމެ ފަހުވަގުތާ ޖެހެންދެންވެސް މަސައްކަތްކުރެއްވުމަށް އެދިވަޑައިގެންފައެވެ.