ގދ. ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލްގައި ލެޕްރޯސްކޮޕިކް ސާޖަރީތަކެއް ކުރިއަށްގެންދިއުމަށް ހަމަޖެހިފައިވާކަމަށް އެ ހޮސްޕިޓަލުން ބުނެފިއެވެ.
ލެޕްރޯސްކޮޕިކް ސާޖަރީއަކީ ކެފުމުގެ ބަދަލުގައި ބަނޑުގައި ކުދި ލޯވަޅުތަކެއް އަޅައިގެން ހަދާ ސާޖަރީއެކެވެ. ކެމަރާއާއި ކުދިކުދި ތަފާތު އާލާތްތަކެއް ބޭނުންކޮށްގެން ހަދާ މިފަދަ ސާޖަރީތަކާއި ގުޅިގެން ބަލި މީހާ އުފުލަންޖެހޭ ވޭން ކުޑަވެ، ފަސޭހަވުންވެސް އަވަސްވެއެވެެ.
7500 މީހުންގެ އާބާދީއެއް އޮންނަ ތިނަދޫގައި ޤާއިމްކޮށްފައިވާ ޑރ.އަބްދުއްސަމަދު މެމޯރިއަލް ހޮސްޕިޓަލްގެ ޚިދުމަތް ފެށީ 2000 ވަނަ އަހަރުއެވެ. ތިނަދޫގެ ބޮޑު އާބާދީގެ އިތުރުން، އެ ސަރަޙައްދުގެ ގިނަ ރަށްތަކެއްގެ ރައްޔިތުންވެސް ސިއްޙީ ޚިދުމަތަށް ބަރޯސާވަނީ ޑރ.އަބްދުއްސަމަދު މެމޯރިއަލް ހޮސްޕިޓަލަށެވެ. މި ސަބަބުތަކާއި ހުރެ ސަރުކާރުން ވަނީ ގދ. ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްޤީކުރެއްވުމަށް ނިންމަވާ، އެމަސައްކަތް ފަށްޓަވާއައެވެ.
ޓާޝަރީ ފެންވަރަށް ތަރައްޤީކުރަން ފެށުމާއެކު އެ ހޮސްޕިޓަލުން ކުރިން ނުލިބޭ އެތައް ހިދުމަތްތަކެއް މިއަދު ދަނީ ލިބެމުންނެވެ. އަދި އިތުރު ހިދުމަތްތައް ދަނީ ތައާރަފްކުރަމުންނެވެ. އެގޮތުން އެ ހޮސްޕިޓަލުން މިހާރު ތައްޔާރުވަމުންދަނީ ލެޕްރޯސްކޮޕިކް ސާޖަރީގެ ޙިދުމަތް ފެށުމަށެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ޑރ.އަބްދުއްސަމަދު މެމޯރިއަލް ހޮސްޕިޓަލްގެ މެނޭޖަރ ޝާހިދު މުޙައްމަދު ވިދާޅުވީ މިމަހުގެ 5 ވަނަ ދުވަހާއި ހަމައަށް އެ ހޮސްޕިޓަލަށް ޑޮކްޓަރަށް ދައްކާ މީހުންގެ ތެރެއިން ލެޕްރޯސްކޮޕިކް ސާޖަރީ ހަދަންޖެހޭ މީހުންނަށް ސާޖަރީ ހެދޭނެ އިންތިޒާމް ހަމަޖައްސާފައިވާކަމަށެވެ. އަދި އެ ސާޖަރީތައް ކުރިއަށްގެންދާނީ އައިޖީއެމްއެޗާއި ގުޅިގެންކަމަށްވެސް އޭނާ ވިދާޅުވިއެވެ.
ޝާހިދު ވިދާޅުވީ ޑރ.އަބްދުއްސަމަދު މެމޯރިއަލް ހޮސްޕިޓަލްގައި ދާއިމީ ގޮތެއްގައި ލެޕްރޯސްކޮޕިކް ސާޖަރީ ހެދޭނެ އިންތިޒާމް ހަމަޖެއްސުމަށްޓަކައި އައިޖީއެމްއެޗްއާ ގުޅިގެން މަސައްކަތްތަކެއް ކުރަމުންދާކަމަށެވެ.
ލެޕްރޯސްކޮޕިކް ސާޖަރީގެ ޚިދުމަތް ފެށުމަށް ބޭނުންވާ ސާމާނު މިދިޔަ އަހަރުގެ ފަހުކޮޅު ތިނަދޫއަށް ގޮންގޮސް ވަނީ އިންސްޓޯލްކޮށްފައެވެ.
ލެޕްރޯސްކޮޕިކް ސާޖަރީގެ ޚިދުމަތާއެކު އެޑްވާންސް ވޫންޑް ކެއާގެ ހިދުމަތްވެސް އަންނަ ބުދަ ދުވަހު ފެށުމަށް ވަނީ ހަމަޖެހިފައެވެ. އެޑްވާންސް ވޫންޑް ކެއާގެ ޚިދުމަތަކީ ފަސޭހަ ނުވެ ގިނަ ދުވަސްވެފައި ހުންނަ ފާރުގަނޑުތައް ޒަމާނީ ވަސީލަތްތައް ބޭނުންކޮށްގެން އަވަހަށް ފަސޭހަކުރުމުގެ ފަރުވާއެކެވެ. އެޑްވާންސް ވޫންޑް ކެއާގެ ހިދުމަތް ދިނުމަށް ހާއްސަ ކްލިނިކެއްވެސް އެ ހޮސްޕިޓަލްގައި މިހާރު ވަނީ ޤާއިމްކިށްފައެވެ. މީގެއިތުރުން ކެމެރާ ލައްވައިގެން ކުރަންޖެހޭ އަންހެނުންގެ ހާއްސަ އޮޕަރޭޝަންތަކާއި ހުޅުތެރެއަށް ކެމެރާ ލައްވައިގެން ކުރަމުންދާ ކަށީގެ އޮޕަރޭޝަންތައް ފެށުމަށްވެސް ހޮސްޕިޓަލުން ދަނީ ތައްޔާރުވަމުންނެވެ.
ޑރ.އަބްދުއްސަމަދު މެމޯރިއަލް ހޮސްޕިޓަލުން މިހާރުވެސް އެކި ދާއިރާތަކުގެ ސްޕެޝަލިސްޓް ޑޮކްޓަރުންގެ ޚިދުމަތްދެމުން އަންނަނީ ދެމުންނެވެ. އެގޮތުން އަންހެނުންގެ ބަލިތަކާއި، ކުޑަކުދިންގެ ޚާއްސަ ބަލިތަކާއި، ކަށީގެ ބަލިތަކާއި، ހަމުގެ ބަލިތަކާއި، ކަރުންމަތީގެ ބަލިތައް އަދި ދަތުގެ ފަރުވާވެސް އެ ހޮސްޕިޓަލުން ލިބެއެވެ. މީގެއިތުރަށް އެކްސްރޭއާއި އެކި ކހަލަ ޓެސްޓުތައް ހެދުމުގެ ޚިދުމަތްވެސް ލިބެއެވެ.
އެ ހޮސްޕިޓަލަށް ދިމާވެފައިވާ ޖާގައިގެ ދަތިކަމަށް ހައްލެއްގެނައުމުގެ ގޮތުން މުޅިން އައު ދެ އިމާރާތް ތަރައްޤީކުރުމަށް ނިންމައި، އޭގެތެރެއިން އެއް އިމާރާތުގެ މަސައްކަތް ނިންމައި، ވަނީ ހުޅުވާފައެވެ.
އަތޮޅުތަކުގެ ސިއްޙީ ޚިދުމަތް ފުޅާކުރުމަށް ފަށާފައިވާ ބޮޑެތި މަޝްރޫޢުތަކަކީ އެ ޚިދުމަތް ހޯދުމަށް މާލެއަށް ބަރޯސާވާންޖެހޭޖެހުން ކުޑަކުރުމަށް ސަރުކާރުން ފަށްޓަވާފައިވާ މަސައްކަތެކެވެ. އެގޮތުން އަތޮޅުތަކުގެ 5 ހޮސްޕިޓަލެއް ޒަމާނީ ޚިދުމަތްތަކާއެކު ޓަރޝަރީ ފެންވަރަށް ތަރައްޤީކުރުމަކީ ސަރުކާރުގެ ވަޢުދެކެވެ.