ރާއްޖޭގެ ދެކުނުގައި އީއީޒެޑް، ނުވަތަ ދިވެހިރާއްޖެއަށް ޚާއްޞަ އިޤްތިޞާދީ ސަރަޙައްދު ކަނޑައަޅާފައިވާ ގޮތުން ރާއްޖޭގެ މަސްވެރިކަމުގެ ސިނާއަތަށް ގެއްލުމެއް ކުރިމަތިނުވާނެކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން ފިޝަރީޒް މިނިސްޓަރ ވަނީ ދިވެހިރާއްޖެއަށް ޚާއްޞަ އިޤްތިޞާދީ ސަރަޙައްދު ކަނޑައެޅިގެން ދިއުމުގެ ސަބަބުން މަސްވެރިންނަށް ލިބޭނެ ފައިދާތަކުގެ މައްޗަށް ބައްލަވާލައްވާފައެވެ.
ކަނޑުގެ ބޯޑަރު ކަނޑައެޅިގެންދިޔަގޮތުން ރާއްޖޭގެ ދެކުނުގެ މަސްވެރިންނަށް އެކަމުގެ ސަބަބުން ގެއްލުންތަކެއް ކުރިމަތިވެދާނެކަމަށް ބުނެ ބައެއް ފަރާތްތަކުން ދައްކާ ވާހަކަތަކަށް ރައްދު ދެއްވަމުން ފިޝަރީޒް މިނިސްޓަރ ވިދާޅުވީ އިޓްލޮސްގެ ނިންމުމުގެ ސަބަބުން ރާއްޖޭގެ މަސްވެރިންނަށް ނުވަތަ މަސްވެރިކަމަށް ކުރާނެ އެއްވެސް އަސަރެއް ނޯންނާނެކަމަށެވެ.
އިޓްލޮސްގެ ނިންމުމާއި ރާއްޖެގެ ދެކުނުން މަދުވެގެން 142 ނޯޓިކަލް މޭލުގެ ސަރަހައްދަކީ ރާއްޖޭގެ ސިޔާދަތީ ބާރު ހިނގާ ސަރަހައްދެއްގެ ގޮތުގައި ވަނީ ކަނޑައަޅާފައެވެ. މީގެކުރިން ބޭރުގެ ބައެއް ބޯޓު ފަހަރުތައް އެ ސަރަހައްދަށް ވަދެ މަސްވެރިކަން ކުރިޔަސް ރާއްޖެއަށް އެޅޭނެ މާބޮޑު ފިޔަވަޅެއް ނެތްނަމަވެސް އިޓްލޮސްގެ ނިންމުމާއެކު ދެކުނުގައި ކަނޑައެޅުނު އީއީޒެޑްގައި ދިވެހި ސަރުކާރުގެ ހުއްދަ ނެތި އެއްވެސް އިޤްތިޞާދީ މަސައްކަތެއް ނުކުރެވޭނެއެވެ.
މިނިސްޓަރ ވިދާޅުވީ ރާއްޖޭގެ އެއްވެސް ހިސާބަކުން 200 ނޯޓިކަލް މޭލު ބޭރަށް މަސްވެރިކަން ކުރުމަށް އުޅަނދުތައް ނުކުމެފައިވާކަން ރެކޯޑްތަކުން ނުދައްކާކަމަށެވެ. އެހެންކަމުން އިން ވަކިކުރުމާއެކުވެސް ރާއްޖޭގެ މަސްވެރިން މިހާރުވެސް މަސްވެރިކަން ކުރަން ނިކުންނަ ސަަރަހައްދުތަކަށް މަހަށް ނިކުތުމަށް އެއްވެސް ހުރަހެއް ނޯންނާނެކަމަށްވެސް މިނިސްޓަރ ވިދާޅުވިއެވެ. އަދި ރާއްޖެއިން ބޭރުގެ ބޯޓުތަކަށް ރާއްޖޭގެ އިޤްތިޞާދީ ސަރަޙައްދުގައި ދާ އަޅައިގެން މަސްހިފުމުގެ ފުރުޞަތުވެސް ނުލިބޭނެކަމަށް މިނިސްޓަރ ވިދާޅުވިއެވެ.
"ރާއްޖޭގެ މަސް އުޅަނދުތައް އިންޑިއާގެ ވަކި ސަރަހައްދަކަށް ވަދެ ހުއްދައާ ނުލާ މަސްވެރިކަން ކުރާނަމަ ޤާނޫނާ ޚީލާފު އެބަވޭ. ހަމަ އެގޮތަށް އިންޑިއާގެ އުޅަނދުފަހަރު އަޅުގަނޑުމެންގެ ސަރަޙައްދަށް ވަނީމާ ޤާނޫނާ އެބަ ޚިލާފުވޭ. މިހާރު ހުރޭ ބައެއް ދޯނި ފަހަރުތަކުގައި ޓްރެކިން ޑިވައިސް ހަރުކޮށްފައި. އެހެންވީމަ އެ ދޯންޏަކުން މަސްބޭނި ސަރަހައްދު އަޅުގަނޑުމެންނަށް އެބަ އިނގޭ. ނަމަވެސް ރާއްޖޭގެ ދެކުނުގައި އޮތް ސަރަޙައްދުން އުޅަނދު ފަހަރުތައް އެހާ ބޭރަށް ނުކުމެ މަސް ބާނާކަމަކަށް ޓްރެކިންއިން ރެކޯޑެއް ނުކުރެވޭ." ފިޝަރީޒް މިނިސްޓަރ ޑރ.ހުސައިން ރަޝީދު ހަސަން ވިދާޅުވިއެވެ.
އިޓްލޮސްގެ ނިންމުމާއެކު ދާ އަޅައިގެން ރާއްޖޭގެ އިޤްތިޞާދީ ސަރަހައްދުގައި މަސްވެރިކަންކުރާ ފަރާތްތައް ހުއްޓުވުމުގެ ބާރު ސަރުކާރަށް ލިބިގެންދާނެއެވެ. ފިޝަރީޒް މިނިސްޓަރ ވިދާޅުވީ ދާ އެޅުމުގެ މައްސަލަ ބޮޑުވެފައިވާކަމަށާއި މިހާރުވެސް އިންޑިއާ ކަނޑުގައި ރީނދޫ އުރަހަ ބާނަމުން އަންނަނީ ކަނޑައެޅިފައިވާ ކޯޓާއަށްވުރެ އިތުރަށްކަމަށެވެ. އަދި މަހުގެ ސްޓޮކް ދެމެހެއްޓެނިވި މިންވަރަކަށް ހިފެހެއްޓުމަށް ރީނދޫ އުރަހަ ކަންނެލި ބާނާ މިންވަރު 22 އިންސައްތަ މަދުކުރަންޖެހޭކަންވެސް މިނިސްޓަރ ފާހަގަކުރެއްވިއެވެ.
"2020 ވަނަ އަހަރު 42000 ޓަނުގެ ރީނދޫ އުރަހަ ކަންނެލި ބޭނި. 2021 ވަނަ އަހަރު 24000 ޓަނުގެ މަސް ބޭނި. މަސް ގިނައިން ބޭނުމާ މަދުން ބޭނުންމަކީ ޗާގޯސްގެ މައްސަލައަށް ގުޅޭ ކަމެއް ނޫން. ދާ ޖަހައިގެން މަސް ހިފާކަމުގައި ވާނަމަ ސްޓޮކަށް ގެއްލުންވާނެ. މިއައި ބަދަލާއި ގުޅިގެން މާގިނަ ބޯޓު ފަހަރު ރާއްޖޭގެ ދެކުނުން އައިސް ރާއްޖޭގެ އިޤްތިޞާދީ ސަރަޙައްދުން ދާ ޖަހައިގެން މަސް ނަގާތަނެއް ނުފެނޭ." ފިޝަރީޒް މިނިސްޓަރ ޑރ.ހުސައިން ރަޝީދު ހަސަން ވިދާޅުވިއެވެ.
ރާއްޖެއަށް މިނިވަންކަން ލިބިގެން މިހާތަނަށް އައިއިރު ރާއްޖޭގެ އުތުރުން އީއީޒެޑް ކަނޑައެޅުނަސް، ދެކުނުން އީއީޒެޑް ނުވަތަ ރާއްޖެއަށް ޙާއްސަ އިޤްތިޞާދީ ސަރަހައްދު ކަނޑައެޅިފައެއް ނުވެއެވެ. ނަމަވެސް ޗާގޯސް އައިލެންޑްސް އާއި ރާއްޖެއާ ދެމެދުގެ ކަނޑުގެ ބޯޑަރު ކަނޑައަޅަން މޮރިޝަސްއިން، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް)އަށް ހުށަހަަޅާފައިވާ މައްސަލަ ނިމުމާއެކު ރާއްޖޭގެ ދެކުނުން އީއީޒެޑް ނުވަތަ ރާއްޖެއަށް ޙާއްސަ އިޤްތިޞާދީ ސަރަހައްދު ވަނީ ކަނޑައެޅިގެން ގޮސްފައެވެ. އަދި އެކަން ހާސިލުވެގެންދިޔައީ ރާއްޖެއިން ބޭނުންވި ގޮތަކަށް، ރާއްޖޭގެ ސަރަހައްދެއް ނުގެއްލި، އިތުރު ސަރަޙައްދެއްވެސް ހޯދައިގެނެވެ.