އިނގިރޭސިވިލާތުގެ ރަސްގެފާނު ޗާލްސް 3 ގެ ކޮރޮނޭޝަން ނުވަތަ ތަޚުތުގައި ވެޑުވުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ބައިވެރިވެވަޑައިގަންނަވާނެކަމަށް ރައީސް އޮފީހުން ވިދާޅުވެއްޖެއެވެ.
އިނގިރޭސިވިލާތުގެ ރަސްގެފާނު ޗާލްސް (ތިނެއް) ތަހުތުގައި ވެޑުވުމުގެ ރަސްމިއްޔާތު އޮންނާނީ އަންނަ ހޮނިހިރު ދުވަހުއެވެ.
ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވީ ރަސްގެފާނު ޗާލްސްގެ ކޮރޮނޭޝަން ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ މިރޭ ލަންޑަނަށް ފުރާވަޑައިގަންނަވާނެކަމަށެވެ.
މިއުވާން ވިދާޅުވީ ރައީސްގެ މި ދަތުރުފުޅުގެ ތެރެއިން ކޮމަންވެލްތުގެ ލީޑަރސް އިވެންޓާއި, ގައުމުތަކުގެ އިސްވެރިންނާއެކު ބާވަވާ ރިސެޕްޝަނެއްގައިވެސް ބައިވެރިވެވަޑައިގަންނަވާނެ ކަމަށެވެ.
އިނގިރޭސިވިލާތުގެ ރަސްގެފާނުގެ އިތުރުން ޗާލްސްއަަކީ ކޮމަންވެލްތުގެވެސް ވެރިޔާއެވެ. އެއީ 2.4 ބިލިއަން މީހުން ހިމެނޭ 56 މިނިވަން ގައުމުގެ ޖަމްޢިއްޔާއެކެވެ. އޭގެ ތެރެއިން 14 ދައުލަަތެއްގެ އެންމެ އިސްވެރިޔަކީ ޗާލްސްއެވެ.
ރަސްގެފާނު ޗާލްސް ތަޚުތުގައި ވެޑުވުމުގެ ރަސްމިއްޔާތު ވެސްޓް މިނިސްޓަރ އަބޭގައި އޮންނަ ހަފުލާގައި 2000 އަށްވުރެ ގިނަ މެހެމާނުން ބައިވެރިވާނެއެވެ.
ޗާލްސްއަށް އިނގިރޭސި ތަހުތަށް އިސްކުރެވުނީ، އިނގިރޭސިވިލާތުގެ ރާނީ އަދި ޗާލްސްގެ މަންމާފުޅު މިދިޔަ ސެޕްޓެމްބަރުމަހު އަވަހާރަވުމާއި ގުޅިގެންނެވެ.