ނޫސްވެރިކަމުގެ މިނިވަންކަމުގެ ދުވަހާގުޅޭ ގޮތުން ޢާއްމުކޮށް ހުޅުއްވައިލައްވައިގެން ޚާއްޞަ ފޯރަމެއް ބާއްވަވައިފިއެވެ.
މި ފޯރަމްއަކީ ދިވެހި ރާއްޖޭގެ އިސްލާމީ ޔުނިވަސިޓީ އާއި މިނިސްޓްރީ އޮފް ހޯމް އެފެއާޒާއި ޕަބްލިކް ސަރވިސް މީޑިއާ، ޕީއެސްއެމް ގުޅިވަޑައިގެން ބޭއްވެވި ފޯރަމްއެކެވެ.
"ޤައުމު ބިނާކުރުމުގައި ނޫސްވެރިންގެ ދައުރު"ގެ ނަމުގައި ކުރިއަށްގެންދިޔަ މި ފޯރަމްގައި ވަނީ ޕެނަލް ޑިސްކަޝަންއެއް ކުރިއަށް ގެންގޮސްފައެވެ. މި ޕެނަލް ޑިސްކަޝަންގައި މަޢުލޫމާތު ދީފައިވަނީ ނޫސްވެރިކަމުގެ ދާއިރާގައި ތަޖުރިބާކާރު ދެ ބޭފުޅުންކަމަށްވާ ޝައްމާން ޝާކިރު އާއި އަލީ ޝާމިންގެ އިތުރުން ޔުނިވަސިޓީގެ ކުއްލިއްޔާ އޮފް ޤުރުއާން އެންޑް ސުންނަގެ ޑީން މުޙައްމަދު މަންޞޫރުއެވެ.
މި ޕެނަލް ޑިސްކަޝަންގައި މައިގަނޑު ގޮތެއްގައި ވާހަކަ ދައްކާފައިވަނީ ރާއްޖޭގެ ނޫސްވެރިންނަށް ދިމާވާ ގޮންޖެހުންތަކާއި މީޑިއާތަކުގައި ރަނގަޅު ކުރަން ހުރި ކަންތައްތަކާއި ދިމާވާ ދަތިތަކުގެ މައްޗަށެވެ. އަދި ޚަބަރާއި މަޢުލޫމާތު ގެނެސްދޭއިރު އިސްލާމްދީނުގައި ބާރުއަޅުއްވާފައިވާ ކަންތައްތަކަށް ބެލުމަށްފަހު ދީނީ ހަމަތަކުގެ މަތިން މަޢުލޫމާތު ފެތުރުމުގެ މުހިއްމުކަމުގެ މައްޗަށްވެސް އަލިއަޅުވާލެއްވިއެވެ. މީގެއިތުރުން މިހާރު ހުރި ދަތިތަކަކާއި ހުރަސްތައް ހައްލުކުރުމަށް ކުރެވިދާނެ ކަންތައްތަކާއި ގުޅޭގޮތުންވެސް ޕެނަލް ޑިސްކަޝަންގައި ވާހަކަދެއްކިއެވެ.
މި ފޯރަމް ކުރިއަށްދިޔައީ ބައިވެރިވި އާއްމުންގެ ސުވާލުތަކަށް ޖަވާބުދިނުމުގެ ސެޝަނަކާއެކުއެވެ.
1993 ވަނަ އަހަރުން ފެށިގެން، ކޮންމެ އަހަރެއްގެ މެއި މަހުގެ 3 ވަނަ ދުވަސް ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ގޮތުގައި އަންނަނީ ފާހަގަކުރަމުންނެވެ.
މި ދުވަސް ފާހަގަކުރުމުގެ ގޮތުން މޯލްޑިވްސްމީޑީއާ ކައުންސިލާއި ބްރޯޑް ކާސްޓިން ކޮމިޝަނާއި މޯލްޑިވްސް ޖާނަލިޒަމް އެސޯސިއޭޝަނުން ގުޅިގެން ނޫސްވެރިންގެ ސައްލާގެ ނަމުގައި ހަރަކާތެއް ފަށާފައެވެ. މި ސައްލާ މާދަމާގެ ނިޔަލަށް ކުރިއަށް ދާނެއެވެ.