ކައްދޫ އެއަރޕޯޓް ކޮމްޕެނީ ލިމިޓެޑްގެ ޑިރެކްޓަރުންގެ ބޯޑުގެ ޗެއަރމަނަކަށް ބްރިގޭޑިއަރ ޖެނެރަލް (ރިޓަޔަރޑް) ޒަކަރިއްޔާ މަންޞޫރު ޢައްޔަންކުރައްވައިފިއެވެ.
ކައްދޫ އެއަރޕޯޓް ހިންގާ ކުންފުނީގެ ޑިރެކްޓަރުންގެ ބޯޑުގެ ޗެއަރމަނަކަށް ޒަކަރިއްޔާ މަންޞޫރު ޢައްޔަންކުރައްވައި ޕްރައިވެޓައިޒޭޝަން އެންޑް ކޯޕޮރަޓައިޒޭޝަން ބޯޑް (ޕީސީބީ) އިން ނެރުއްވި ބަޔާނުގައި ވިދާޅުވީ އެ މަޤާމަށް ޒަކަރިއްޔާ މަންޞޫރު ޢައްޔަންކުރެއްވީ ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި މޮނިޓަރކޮށް އިވެލުއޭޓްކުރުމުގެ ޤާނޫނުގެ ދަށުންކަމަށެވެ. އޭނާއަކީ އެ ކުންފުނީގެ އެންމެ ފުރަތަަމަ މެނޭޖިންގ ޑިރެކްޓަރުކަމުގެ މަޤާމުވެސް ފުރުއްވައިފައިވާ ބޭފުޅެކެވެ.
ޒަކަރިއްޔާ މަންޞޫރު ވަނީ ސިފައިންގެ ޚިދުމަތުގައި 39 އަހަރު އަހަރު ހޭދަކުރައްވައިފައެވެ. އޭނާ ވަނީ ޤައުމީ ދިފާއީ ބާރުގެ ލީޑަޝިޕްގެ ގިނަ މަގާމުތަކެއް ފުރުއްވައިފައެވެ. ނެޝަނަލް ކައުންޓަރ ޓެރަރިޒަމް ސެންޓަރުގެ ޑައިރެކްޓަރ ޖެނެރަލަކީ ވެސް ޒަކަރިއްޔާ މަންޞޫރެވެ.