މި ސަރުކާރު އާއިރު ފަޔަރ ފައިޓަރުންނަށް ބޭނުންވާ ތަމްރީނު ދެމުންއައީ ހަމައެކަނި ރާއްޖެއިން ކަމަށާއި، ނަމަވެސް މިހާރު ދުނިޔޭގެ އެކި ކަންކޮޅުތަކުން ފަޔަރަ ފައިޓަރުންނަށް ތަމްރީނާއު ހުނަރު ފޯރުކޮށްދެއްވަމުން އަންނަކަމަށް މިނިސްޓަރ އޮފް ޑިފެންސް މާރިޔާ އަޙްމަދު ދީދީ ވިދާޅުވެއްޖެއެވެ. މިނިސްޓަރ މިފަދައިން ވިދާޅުވީ އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ކުރިޔަށް ގެންދިޔަ ފަޔަރ ފައިޓަރ ޓްރޭނިންގ ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.
މި ރަސްމިއްޔާތުގައި މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީ ވަނީ ސިފައިންގެ ޤާބިލްކަން އިތުރުކޮށް، ސިފައިން ޕްރޮފެޝަނަލް ބަޔަކަށް ހެދުމަކީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ އިބްރާހީމް މުޙައްމަދު ޞާލިޙްގެ ވަޢުދުފުޅެއްކަން ފާހަގަކުރައްވާފައެވެ. އަދި އެމަގަށް ވާޞިލުވުމަށްޓައި އެންމެ މުހިއްމުކަމަކީ ސިފަންނަށް ބޭނުންވާ ތަމްރީނާއި ހުނަރުކަމަށް މިނިސްޓަރ ވިދާޅުވިއެވެ.
މިނިސްޓަރގެ ވާހަކަފުޅުގައި މި ސަރުކާރުއާއިރު، ފަޔަރ އެންޑް ރެސްކިއު ސަރވިސްގެ ފަޔަރ ފައިޓަރުންނަށް ލިބެނީ ހަމައެކަނި ދިވެހިރާއްޖެއިން ދެވޭ ތަމްރީންކަމަށާއި، މިހާރު ފަޔަރ އެންޑް ރެސްކިއު ސަރވިސްއަށް ބޭނުންވާ އެކި ލެވެލްގެ ތަމްރީނުތައް ރާއްޖެއިން ބޭރުން ހޯދައި، ތަމްރީންކުރަމުން އަންނަކަމަށެވެ. މިނިސްޓަރ ވިދާޅުވީ ވޭތުވެދިޔަ 2 އަހަރު އިންޑިއާ އިން 41 ފަޔަރ ފައިޓަރުން އެކި ދާއިރާތަކުން ތަމްރީނު ކޮށްފައިވާކަމަށާއި، މިދިޔަ އަހަރު ޔޫއޭއިން 16 ފަޔަރ ފައިޓަރުން ތަމްރީން ކޮށްފައިވާކަމަށެވެ. މީގެ އިތުރުން އިނގިރޭސިވިލާތުގެ ފަޔަރ ސަރވިސް ކޮލެޖާއި ގުޅިގެން ތަފާތު 6 ދާއިރާއަކުން 64 ފަޔަރ ފައިޓަރުންނަށް ޝޯރޓް ޓްރޭނިންގތައް ކުރިއަށް ގެންގޮސްފައިވާކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ މިހާތަނަށް އެހެން އެއްވެސް ސަރުކާރަކުން ސަމާލުކަން ނުދޭވަރަށް، ފަޔަރ އެންޑް ރެސްކިއު ޚިދުމަތަށް އަހަންމިއްޔަތުކަންދީ، މިޚިދުމަތް ތަރައްޤީ ކުރުމަށް މި ސަރުކާރުން މަސައްކަތް ކުރައްވާކަމަށެވެ.
"ސަބް އޮފިސަރ ކޯސްތަކުން ފެށިގެން ޑިވިޝަނަލް އޮފިސަރ ކޯސްތަކާ ހިސާބަށް 2021 ވަނަ އަހަރުން ފެށިގެން ފަޔަރ އެންޑް ރެސްކިއު ސަރވިސްގެ ފަޔަރ ފައިޓަރުން އިންޑިއާ އަށް ފޮނުވައިގެން މިގެންދަނީ ތަމްރީން ކުރަމުން. ރާއްޖޭގެ އާރބަން ސަރަޙަދުތަކަށް އަންނަމުންދާ ބަދަލުތަކަށް ރިޢާޔަތްކޮށް، ފަޔަރ ސޭފްޓީ އިން ޕަވަރ ޕްލާންޓާއި، ފަޔަރ ހެޒާޑް އިން ޕެޓްރޯކެމިކަލް އިންޑަސްޓްރީފަދަ ދާއިރާތަކުންވެސް އިންޑިއާގައި އެބަ ތަމްރީނު އެބަ ހައްދުވަން." މިނިސްޓަރ އޮފް ޑިފެންސް މާރިޔާ އަޙްމަދު ދީދީ ވިދާޅުވިއެވެ.
މިނިސްޓަރ މާރިޔާގެ ވާހަކަފުޅުގައި ރާއްޖޭގައި އުސް ޢިމާރާތްތައް އެޅުން އިތުރުވަމުން އަންނަކަން ފާހަގަކުރައްވާ ވިދާޅުވީ މިހާތަނަށްވެސް ހައިރައިޒް ފަޔަރ ފައިޓިންގެ ޤާބިލްކަމަށް މަސައްކަތެއް ކޮށްފައި ނުވާކަމަށެވެ. އެހެންނަމަވެސް މިހާރު ހައިރައިޒް ފަޔަރ ފައިޓިންގއާއި، އާރބަން ސާރޗް އެންޑް ރެސްކިއުގެ ޤާބިލްކަން ފަޔަރ އެންޑް ރެސްކިއު ސަރވިސްގައި ތަރައްޤީ ކުރުމަށްޓަކައި މަސައްކަތް ކުރައްވަމުން އަންނަކަމަށް މިނިސްޓަރ ވިދާޅުވިއެވެ.
އެމް.އެން.ޑީ.އެފް ފަޔަރ އެންޑް ރެސްކިއު ޓްރޭނިންގ ސްކޫލަކީ ސިފައިންގެ ނިސްބަތުން ކުޑަ ތަނެއްނަމަވެސް އެތަނަކީ ވަރަށް ގިނަ ތަމްރީންތައް ހިންގާތަނެއްކަމަށްވެސް މިނިސްޓަރ ވިދާޅުވިއެވެ. އެގޮތުން އިންޑަސްޓްރިއަލް ފަޔަރ ބްރިގޭޑް، ފަޔަރ ސްކޮޑް، ވޮލަންޓިއަރ ފަޔަރ ފައިޓަރ ކޯސް ފަދަ އެތަކެއް ތަމްރީނުތަކާއި ފަޔަރ އެވެއަރނަސް ޕްރޮގްރާމްތައް އެތަނުގައި ހިންގާކަންވެސް މިނިސްޓަރ ފާހަގަކުރެއްވިއެވެ.
މި ރަސްމިއްޔާތުގައި މިނިސްޓަރ ވަނީ އެމް.އެން.ޑީ.އެފް އިން ފަޔަރ ފައިޓަރ ޓްރޭނިންގ ކޯސް ހިންގަން ފެށީއްސުރެ މިހާތަނަށް އެތަމްރީނު ފުރިހަމަކުރީ 8 އަންހެން ސިފައިންކަން ފާހަގަކުރައްވާފައެވެ. އަދި އަލަށް ދަސްވެނިވި 5 އަންހެން ސިފައިންނާއިއެކު މިދާއިރާއަށްވެސް އަންހެނުން އިތުރުވަމުން އަންނަކަން ފާހަގަކުރެއްވިއެވެ. މިނިސްޓަރ ވިދާޅުވީ މިއީ މިންތީގެ ހަމަހަމަކަން ހުރިހާ ދާއިރާއެއްގައި ޤާއިމްކުރެއްވުމަށް ރައީސުލްޖުމްހުރިއްޔާ އިބްރާހީމް މުޙައްމަދު ޞާލިޙުގެ ސަރުކާރުން ކުރައްވަމުން ގެންދަވާ މަސައްކަތްޕުޅު އަސްކަރިއްޔާގެ ތެރޭގައިވެސް ކާމިޔާބުކަމާއެކު ކުރިއަށް ދާކަން ހާމަވާކަމެއްކަމަށެވެ.