ރާއްޖެއަކީ ތަފާތު ހުނަރުތަކުން ފުރިފައިވާ އެތައް ފަންނުވެރިންނެއްގެ ފާޑުވެރިކަމަށް ހެކިދޭ ދިގު ތާރީޚެއް އޮތް ޤައުމެކެވެ. ދިވެހިންގެ ފަންނުވެރި މަސައްކަތްތަކުގެ ތެރެއިން ވަޑާމުގެ މަސައްކަތްތަކާއި، އަތްތެރިކަމުގެ މަސައްކަތްތަކުންގޮސް ކުޅިވަރާއި މުނިފޫހި ފިލުވުމުގެ ފަންނުތަކަކީ މިއަދުވެސް ކުރިއަރަމުން އަންނަ ކަންތައްތަކެވެ.
ދިވެހި ކާބަފައިންގެ ފަންނުވެރިކަމާއި ހުނަރުވެރިކަން މިއަދުގެ ޖީލަށް ވާރުތަވިއިރު މިއަދުގެ ފަންނުވެރިންގެ ފަރާތުން ފެންނަނީ މުޅިން އައު ހުނަރުތަކެކެވެ. އެހެންނަމަވެސް ކަންކުރުމުގައި ދިވެހިންގެ ފާޑުވެރިކަން ކެނޑިގެން ނުދެއެވެ. އައު އުކުޅުތައް ދަސްކޮށް ހުނަރުތައް އަންނަނީ އިތުރުވަމުންނެވެ. ނަމަވެސް ދިވެހި ފަންނުވެރިންގެ ހުނަރުތައް ދައްކާލުމަށްޓަކައި އެމީހުންނަށް އޮތް އެންމެ ބޮޑު ހުރަހަކަށްވެފައި އޮތީ އެކަށީގެންވާ ޕްލެޓްފޯމެއް ނެތުމެވެ. ނަމަވެސް މިހާރު މިފަދަ ޕްލެޓްފޯމްތައް އުފެދި ދިވެހި ފަންނުވެރިންގެ ހުނަރުތައް ދައްކާލެވޭނެ އިންތިޒާމްތައް އަންނަނީ ހަމަޖައްސަމުންނެވެ.
އެފަދަ ޕްލެޓްފޯމްތަކަކީ ފަންނުވެރިންގެ ހުނަރަތައް ދެއްކޭނެ އިންތިޒާމެއްގެ އިތުރުން، އެހެން މީހުންގެ ފަރާތުންވެސް އުނގެނުމުގެ ފުރުޞަތުތައްވެސް ލިބިގެންދާ ޕްލެޓްފޯމަކަށްވެއެވެ. މިފަދަ އެއް ފުރުޞަތަކީ މިހާރު ކުރިއަށްދާ ފަރުމާ، އިންޓަރނޭޝަނަލް ޔޫތް އާރޓް ފެސްޓިވަލްއެވެ. މި ފެސްޓިވަލްއަކީ ރާއްޖޭގައި ބާއްވާ މިފަދަ ބައިނަލްއަޤްވާމީ ފުރަތަމަ ފެސްޓިވަލްއެވެ.
ފަރުމާ ފެސްޓިވަލާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން މި ފެސްޓިވަލް އިންތިމާޒް ކުރި މޯލްޑިވިސް އާރޓްސް ކޮމިއުނިޓީގެ ޗެއަރޕާސަން އަޙްމަދު އަޒްމީ ހަލީމް ވިދާޅުވީ 7 ދުވަހުގެ މުއްދަތަށް ކުރިއަށްދާ މި ފެސްޓިވަލްއަށް ކޮންމެ ދުވަހަކުވެސް އެތަކެއް މީހުން ޒިޔާރަތްކޮށް ފަންނުވެރިންގެ ހުނަރުތައް ބަލާފައިވާކަމަށެވެ. އަޒްމީ ވިދާޅުވީ ފަންނުވެރިންގެ ހުނަރު ދައްކާލުމަށް ބާއްވާ މި ފެސްޓިވަލް ކޮންމެ އަހަރަކުވެސް ކުރިއަށް ގެންދިޔުމަށް އަމާޒުކޮށްފައިވާކަމަށެވެ.
"ވަރަށް ކާމިޔާބު ފެސްޓިވަލްއެއްގެ ގޮތުގައި ފެނިގެންދަނީ. ވަރަށް ގިނަ ބައެއްގެ ތަރުހީބު އެބަލިބޭ. ހުއްޓުމެއްނެތި މީހުން ޒިޔާރަތްކުރަމުން އެބައާދެ." މޯލްޑިވިސް އާރޓްސް ކޮމިއުނިޓީގެ ޗެއަރޕާސަން އަޙްމަދު އަޒްމީ ޙަލީމް ވިދާޅުވިއެވެ.
ފަރުމާ ފެސްޓިވަލަށް ކުރި ޒިޔާރަތުގައި ދިވެހި ފަންނާނުންގެ އެތަކެއް ހުނަރުތަކެއް އަޅުގަނޑަށްވެސް ފެނިގެންދިޔައެވެ. ޚާއްސަގޮތެއްގައި ކުރެހުމުގެ އެކި ހުންރަތައް ލިބިފައިތިބި ފަންނުވެރިން އެކި ސްޓޯލްތަކުގައި ތިއްބެވެ. މީގެ އިތުރަށް އަތްތެރި މަސައްކަތް މީހުންނާއި، ހެދުންފަދަ ތަކެތި ތައްޔާރުކުރާ ފަންނުވެރިންވެސް މި ފެސްޓިވަލްގައި ބައިވެރިވެފައިވެއެވެ. މި ފެސްޓިވަލްގައި ބައިވެރިވެފައިވާ ބައެއް މީހުންނަކީ ރަށުގައި ކުޑަގޮތަކަށް ފެށި މަސައްކަތް، މިއަދު ފުޅާކޮށް އެކަން ވިޔަފާރިއަކަށްވެސް ބަދަލުކޮށްފައިވާ މީހުންނެވެ.
ޕީއެސްއެމް ނިއުސްއާއި ވާހަކަ ދެއްކި ބައެއް ފަނުންނުވެރިން ވަނީ ބައިނަލްއަޤްވާމީ ފެންވަރުގައި ރާއްޖޭގައި އެފަދަ ފެސްޓިވަލްއެއް ބޭއްވުމަކީ އެމީހުންގެ ހުނަރު ރާއްޖެއިން ބޭރަށް ދައްކާލުމަށް ލިބުނު ވަރަށް ރަނގަޅު ފުރުޞަތެއްކަމަށް ސިފަކުރައްވާފައެވެ. ޚާއްސަގޮތެއްގައި ބޭރުގެ ފަންނުވެރިންގެ ފަރާތުން މުޅި އަލަށް ކަންތައްތަކެއް ދަސްވިކަން ދިވެހި ފަންނުވެރިން ފާހަގަކުރިއެވެ.
"މިއި ވަރަށް ރަނގަޅު ފެސްޓިވަލްއެއް. މިހެން ގިނަގިނައިން ފެސްޓިވަލްތަކާއި އެގްޒިބިޝަންތައް ބާއްވަންވީ. މިފަދަ ކަންކަމުގެ ސަބަބުން އަޅުގަނޑުމެންގެ ހުނަރުތައް އިތުރު ހަރުފަތަކަށް ގެންދިޔުމަށް އިތުރު ފުރުޞަތުތަކެއް ލިބިގެންދެ." ދިވެހި ފަންނުވެރިން ބުންޏެވެ.
މި ފެސްޓިވަލްގައި ޖުމުލަ 10 ދާއިރާއަކުން ފަންނުވެރިން ބައިވެރިވެއެވެ. އޭގެ ތެރޭގައި ކުރެހުން، ޕެއިންޓިން، ފޮޓޯގްރަފީ ފުޑް އެންޑް ކަލިނަރީ މިއުޒިގެ ދާއިރާފަދަ ދާއިރާތައް ހިމެނެއެވެ. މި ފެސްޓިވަލްގައި 80 އަށްވުރެ ގިނަ ފަންނުވެރިން ބައިވެރިވާއިރު ރާއްޖެއިން ބޭރުގެ 7 ޤައުމަކުން 11 މީހުން ބައިވެރިވެއެވެ. މި ފެސްޓިވަލްގައި ބައިވެރިވި ޤައުމުތަކުގެ ތެރޭގައި އިންޑިއާ، ވިއެޓްނާމް، އުޒްބެކިސްތާނު، އީރާން ހިމެނެއެވެ. މީގެ އިތުރުން ޔުނައިޓެޑް ޢަރަބް އެމިރޭޓްސް، ސީރިއާއި ލުބުނާން ފަދަ ޤައުމުތައް ހިމެނެއެވެ.