މެލޭޝިއާގެ ބަޖެޓް އެއަރލައިން، ބަޓިކް އެއަރ އިން ރާއްޖެއަށް ދަތުރުތައް ފަށައިފިއެވެ.
ބަޓިކް އެއަރގެ ފުރަތަމަ ބޯޓު ވެލާނާ އިންޓަނޭޝަނަލް އެއަރޕޯޓުގައި ރޭ 8:30 ގައި ޖައްސާފައިވާއިރު، ބޯޓަށް މަރުޙަބާ ކިޔާފައިވަނީ ޚާއްޞަ ވޯޓަރ ސެލިއުޓްއަކުންނެވެ. ބަޓިކް އެއަރގެ ފުރަތަމަ ދަތުރުގައި، 57 ފަސިންޖަރުން ރާއްޖެ އައެވެ.
ބަޓިކް އެއަރއިން ރާއްޖެއާ ދެމެދު ކޮންމެ ދުވަހަކު ވެސް ދަތުރުތައް ބޭއްވުމަށް ހަމަޖެހިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީން ބުންޏެވެ. މިދަތުރުތައް ރާވާފައިވަނީ ރާއްޖެއިން ސްރީލަންކާއަށް، އެއަށްފަހު މެލޭޝިއާއަށް އަދި ސިދާ ރާއްޖެ އާއި މެލޭޝިއާ ދެމެދުގައެވެ.
ރާއްޖޭއާއި މެލޭޝިޔާއާ ދެމެދުގެ ސީދާ ދަތުރުތައް ފެށުމަށް ހަމަޖެހިފައިވަނީ އަންނަ ޖޫން މަހުގެ ފަހުކޮޅުގައެވެ. މީގެ ކުރިން މަލިންޑޯއެއަރގެ ނަމުގައި އޮޕަރޭޓްކުރަމުން އައި އެއަރލައިން ބަޓިކް އެއަރއަށް ބަދަލުކޮށް ގިނަ މަންޒިލްތަކަށް ދަތުރުކުރުމަށް އެއަރލައިންވަނީ ޚާއްޞާ ޕްރޮމޯޝަންތަކާއެކު ގިނަ މަސައްކަތްތަކެއް ފަށައިފައެވެ.
ރާއްޖެއަށް ކުރާ ދަތުރުތަކުގައި ބަޓިކް އެއަރއިން ބޭނުންކުރާނީ ބޮއިންގ 737 މަރުކާގެ ބޯޓެވެ. މިއީ 180 މީހުންގެ ޖާގައިގެން ބޯޓެކެވެ.
ބަޓިކް އެއަރއިން މެލޭޝިޔާ، ތައިލޭންޑް، އޮސްޓްރޭލިއާ ހިމެނޭހެން ފަންސާސް މަންޒިލަކަށް ދަތުރުތައް ބާއްވައެވެ. ރާއްޖެއަށް ދަތުރުކުރާ އެއަރެލައިންތައް އިތުރުވެގެން ދިޔުމަކި ރާއްޖޭގެ ފަތުރުވެރިކަމަށް ލިބިގެންދާ އިތުރު ކުރިއެެރުމެކެވެ.
ބަޓިކް އެއަރގެ އިތުރުން ސައުދީ އަރަބިއްޔާގެ ފްލައިނަސް އަދި އެމެރިކާގެ ވަރޖިންގ އެޓްލާންޓިކް މިއަހަރު ތެރޭގައި ވެލާނާ އިންޓަރނޭޝަނަލް އެއަރޕޯޓަށް ދަތުރުތައް ފަށާނެކަމަށް އެ ކުންފުނިން ވިދާޅުވެއެވެ.