ރާއްޖޭގެ ފުރަތަމަ ސްމާޓް ޕާކިންގ ހުޅުމާލޭގައި ޤާއިމްކޮށްފިއެވެ.
ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ތަރައްޤީކުރި މި ޕާކިން ޒޯން ޤާއިމްކޮށްފައިވަނީ ހުޅުމާލޭގެ ފެރީ ޓާމިނަލް ސަރަހައްދު ކައިރީގައިވާ ފިތުރޯނު ޕާކިން ޒޯންގައެވެ.
އެންމެފަހުގެ ޒަމާނީ ޓެކްނޮލޮޖީ ބޭނުންކޮށްގެން ފަރުމާކޮށްފައިވާ މި ސްމާޓް ޕާކިންގައި، ވެހިކަލްތަކުގެ ނަމްބަރު ބޯޑުތައް އެކަމަށް ހާއްސަ އާޓިފިޝަލް އިންޓެލިޖެންސް އައި މެޝިން ލާރނިންގ ކެމެރާއަކުން ބެލުމަށްފަހު ޕާކިންގ ގޭޓު ހުޅުވޭނެއެވެ. އޭގެ ސަބަބުން އެކަމަށް ޙާއްސަ ބަޔަކު ތިބުމުގެ ބަދަލުގައި، ޒަމާނީ ޓެކްނޮލޮޖީގެ އެހީގައި ފަސޭހަކަމާއެކު ކާރަށް ޕާކިން ޒޯނަށް ވަދެ އަދި ނިކުމެވޭ ގޮތް ހެދޭނެއެވެ.
އެޗްޑީސީން ބުނީ މި ޕާކިން ޒޯންގައި ކާރު ޕާކުކުރާނެ ޖާގަތައް ކުއްޔަށް ދޫކުރުމަށް ހުޅުވާލާނެކަމަށެވެ. އަދި މި ޒޯނުގައި ޕާކުކުރާ އުޅަނދުގެ ރައްކާތެރިކަން ކަށަވަރު ކުރުމަށްޓަކައި 24 ގަޑިއިރު ސީ.ސީ.ޓީ.ވީ ކެމެރާ މެދުވެރިކޮށް މޮނިޓަރ ކުރެވޭނެކަމަށް އެޗްޑީސީން ބުނެއެވެ.
އެޗްޑީސީން ބުނީ ހަމައެކަނި ކާރު ޕާކު ކުރުމަށް ކަނޑައެޅިފައިވާ މި ސްމާޓް ޕާކިންގ ޒޯންގައި ކުރު މުއްދަތަށް ޕާކުކުރަން އަދި ދިގު މުއްދަތަށް ޕާކުކުރަން ބޭނުންވާ ފަރާތްތަކަށް ހާއްސަ ޖާގަތަކާއި، ނުކުޅެދުންތެރިކަން ހުންނަ ފަރާތްތަކަށް ހާއްސަ ޖާގަތައް ހުންނާނެކަމަށެވެ.
އެޗްޑީސީން ބުނީ ވަކި ވަގުތުކޮޅަށް އެކަނި ޕާކުކުރަން ބޭނުންވާ ފަރާތްތަކަށް ފަސޭހަ އިންތިޒާމެއް ހަމަޖެއްސުމުގެ ގޮތުން އެޕްލިކޭޝަނެއްވެސް ތައްޔާރުކޮށްފައިވާކަމަށެވެ،
މި އެޕްލިކޭޝަން މެދުވެރިކޮށް ސްމާޓް ޕާކިން ޒޯންގައި ހުންނަ ހުސް ޕާކިން ޖާގަތަކާއި ޕާކު ކުރެވޭ އަގުތަކާއި ރިޒާވްކުރުމާއި ޖާގަ ހުސްވުމުން އެކަން އަންގައިދޭ މެސެޖުތަކާއި ޕާކިން ޖާގަ އޮތް ސަރަހައްދުވެސް ފެންނާނެކަމަށެވެ.
ހުޅުމާލެއަކީ ގިނަ ބަޔަލު އާބަދުވަމުން އަންނަ ތަނަކަށްވުމުން އެއްގަމު އުޅަނދުތައްވެސް އަންނަނީ އިތުރުވަމުންނެވެ. އެކަމުގެ ސަބަބުން ޕާކްކުރާނެ ޖާގަ ނެތުމުގެ މައްސަލައަކީ މިހާރު ބޮޑު މައްސަލައެކެވެ.
ފިތުރޯނު ޕާކިންގ ޒޯނަކީ އެންމެ ފުރަތަމަ ސްމާޓް ޕާކިން ޒޯނު ކަމުގައި ވިޔަސް ވަރަށް އަވަހަށް އިތުރު ސްމާޓް ޕާކިންގ ޒޯންތައް ހުޅުމާލޭގެ އެކި ސަރަހައްދުތަކުގައި ތައާރަފު ކުރެވި، ޕާކިންގެ ކަންކަމަށް އިންގިލާބީ ބަދަލެއް ގެނެވިގެންދާނެކަމަށް އެޗްޑީސީން ބުނެއެވެ.