ހުޅުމާލޭގައި ޤާއިމްކުރި ރާއްޖޭގެ ފުރަތަމަ ސްމާޓް ޕާކިންގައި ޕާކްކުރަން ބޭނުންވާ ފަރާތްތަކަށް ޖާގައަށް އެދުމުގެ ފުރުޞަތު ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީން ހުޅުވާލައިފިއެވެ.
އެޗް.ޑީ.ސީން ވިދާޅުވީ، ހުޅުމާލޭގައި ދިރިއުޅޭ ފަރާތްތަކަށް ޚާއްސަކޮށްގެން ވެހިކަލް ޕާކު ކުރުމަށް ތައްޔާރުކޮށްފައިވާ މި ޕާކިންއިން ޖާގައަށް އެދުމުގެ ފުރުޞަތު މިހާރު ހުޅުވާލާފައިވާކަމަށެވެ. އަދި އަންނަ މަހުގެ 7 ވަނަ ދުވަހު ބީލަން ފޯމް ބަލައިގަތުމަށް ހަމަޖެހިފައިވާކަމަށެވެ.
ހުޅުމާލެ ފިތުރޯނު މަގު، ފެރީ ޓަރމިނަލް ޕާކު ކައިރީގައި ތަރައްޤީކޮށްފައިވާ ފިތުރޯނު ސްމަރޓް ޕާކިންގ ޒޯންއިން ޕާކްކުރުމަށް ޖާގަ ކުއްޔަށް ދޫކުރުމަށް ހަމަޖެހިފައިވަނީ 3 އަހަރުގެ މުއްދަތަކަށެވެ. މި ޒޯނުން 23 ޖާގަ ކުއްޔަށް ދޫކުރުމަށް ހަމަޖެހިފައިވާކަމަށް އެޗް.ޑީ.ސީން ވިދާޅުވެއެވެ.
އެޗް.ޑީ.ސީން ވިދާޅުވީ، މަހު ކުލީގެ ގޮތުގައި ނަގާނީ ބީލަން ކާމިޔާބު ކުރާ ފަރާތުން ހުށައަޅާ އަގުކަމަށެވެ. އަދި 3 އަހަރުދުވަހުގެ ކުލި އެއްފަހަރާ ދައްކާ ފަރާތްތަކަށް %7 ގެ ޑިސްކައުންޓެއް ދިނުމަށް ހަމަޖެހިފައިވާކަމަށާއި، ކުލި ހިގަން ފަށާނީ ޖާގަ ހަވާލުކުރާ ތާރީޚުން ފެށިގެންކަމަށެވެ.
އެންމެފަހުގެ ޒަމާނީ ޓެކްނޮލޮޖީ ބޭނުންކޮށްގެން ފަރުމާކޮށްފައިވާ މި ސްމާޓް ޕާކިންގައި، ވެހިކަލްތަކުގެ ނަމްބަރު ބޯޑުތައް އެކަމަށް ޚާއްސަ އާޓިފިޝަލް އިންޓެލިޖެންސް އައި މެޝިން ލާރނިންގ ކެމެރާއަކުން ބެލުމަށްފަހު ޕާކިންގ ގޭޓު ހުޅުވޭނެއެވެ. މީގެ ސަބަބުން އެކަމަށް ޙާއްސަ ބަޔަކު ތިބުމުގެ ބަދަލުގައި، ޒަމާނީ ޓެކްނޮލޮޖީގެ އެހީގައި ފަސޭހަކަމާއެކު ކާރަށް ޕާކިން ޒޯނަށް ވަދެ އަދި ނިކުމެވޭ ގޮތް ހެދޭނެއެވެ.
އެޗް.ޑީ.ސީން ވިދާޅުވީ، މި ޕާކިން ޒޯންގައި ކާރު ޕާކުކުރާނެ ޖާގަތައް ކުއްޔަށް ދޫކުރުމަށް ހުޅުވާލާނެކަމަށެވެ. އަދި މި ޒޯނުގައި ޕާކުކުރާ އުޅަނދުގެ ރައްކާތެރިކަން ކަށަވަރު ކުރުމަށްޓަކައި 24 ގަޑިއިރު ސީ.ސީ.ޓީ.ވީ ކެމެރާ މެދުވެރިކޮށް މޮނިޓަރ ކުރެވޭނެކަމަށް އެ ކޯރޕަރޭޝަނުން ވިދާޅުވެއެވެ.
އެޗް.ޑީ.ސީން ވިދާޅުވީ، ހަމައެކަނި ކާރު ޕާކު ކުރުމަށް ކަނޑައެޅިފައިވާ މި ސްމާޓް ޕާކިންގ ޒޯންގައި ކުރު މުއްދަތަށް ޕާކުކުރަން އަދި ދިގު މުއްދަތަށް ޕާކުކުރަން ބޭނުންވާ ފަރާތްތަކަށް ޚާއްސަ ޖާގަތަކާއި، ނުކުޅެދުންތެރިކަން ހުންނަ ފަރާތްތަކަށް ޅާއްސަ ޖާގަތައް ހުންނާނެކަމަށެވެ.
ވަކި ވަގުތުކޮޅަށް އެކަނި ޕާކުކުރަން ބޭނުންވާ ފަރާތްތަކަށް ފަސޭހަ އިންތިޒާމެއް ހަމަޖެއްސުމުގެގޮތުން ޚާއްސަ އެޕްލިކޭޝަނެއްވެސް އެޗް.ޑީ.ސީން ވަނީ ތައްޔާރުކޮށްފައެވެ. މި އެޕްލިކޭޝަން މެދުވެރިކޮށް ސްމާޓް ޕާކިން ޒޯންގައި ހުންނަ ހުސް ޕާކިން ޖާގަތަކާއި، ޕާކު ކުރެވޭ އަގުތަކާއި، ރިޒާވްކުރުމާއި، ޖާގަ ހުސްވުމުން އެކަން އަންގައިދޭ މެސެޖުތަކާއި ޕާކިން ޖާގަ އޮތް ސަރަޙައްދުވެސް ފެންނާނެކަމަށެވެ.
ހުޅުމާލެއަކީ ގިނަ ބަޔަކު އާބަދުވަމުން އަންނަ ތަނަކަށްވުމުން އެއްގަމު އުޅަނދުތައްވެސް އަންނަނީ އިތުރުވަމުންނެވެ. އެކަމުގެ ސަބަބުން ޕާކްކުރާނެ ޖާގަ ނެތުމުގެ މައްސަލައަކީ މިހާރު ބޮޑު މައްސަލައެކެވެ.
ފިތުރޯނު ޕާކިންގ ޒޯނަކީ އެންމެ ފުރަތަމަ ސްމާޓް ޕާކިން ޒޯނު ކަމުގައި ވިޔަސް ވަރަށް އަވަހަށް އިތުރު ސްމާޓް ޕާކިންގ ޒޯންތައް ހުޅުމާލޭގެ އެކި ސަރަޙައްދުތަކުގައި ތައާރަފު ކުރެވި، ޕާކިންގެ ކަންކަމަށް އިންގިލާބީ ބަދަލެއް ގެނެވިގެންދާނެކަމަށް އެޗް.ޑީ.ސީން ވިދާޅުވެއެވެ.