ޔުނައިޓެޑް އަރަބް އެމިރޭޓްސް، ޔޫ.އޭ.އީއާއި ދިވެހި ސަރުކާރާ ދެމެދު ދަނޑުވެރިކަމާއި ފުޑް އެންޑް ސެކިއުރިޓީގެ ދާއިރާއިން ގުޅުން ބަދިހިކުރެއްވުމަށް ނިންމަވައިފިއެވެ.
މި ދާއިރާއިން ގުޅުން ބަދަހިކުރުމުގެ ގޮތުން އެއްބަސްވުމެއްގައި ސޮއިކުރެއްވުމަށް ނިންމަވާފައިވަނީ މިހާރު ރާއްޖެވަޑައިގެން އުޅުއްވާ ޔުނައިޓެޑް އަރަބް އެމިރޭޓްސްގެ މިނިސްޓަރ އޮފް ކްލައިމެޓް ޗޭންޖް އެންޑް އެންވަޔރަމަންޓް މަރްޔަމް ބިންތު މުޙައްމަދު އަލް މުހެއިރީ ރާއްޖެއަށް ކުރައްވަމުންދާ ދަތުރުފުޅުގެ ތެރެއިންނެވެ.
މިމަހުގެ 17 އިން 18 އަށް ޔޫ.އޭ.އީގެ އެންވަޔަރަމަންޓް މިނިސްޓަރ ރާއްޖެއަށް ކުރައްވަމުންގެންދަވާ ދަތުރުފުޅުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙާއި ބައްދަލުކުރެއްވުމަށްވެސް ވަނީ ހަމަޖެހިފައެވެ.
ޔޫއޭއީގެ އެންވަޔަރަމަންޓް މިނިސްޓަރ ރާއްޖެއަށް ކުރައްވާ މި ދަތުރުފުޅުގައި މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަންއާ ބައްދަލުކުރެއްވުމަށް ވަނީ ހަމަޖެިފައެވެ. އެގޮތުން މި ބައްދަލުކުރެއްވުމުގައި ޔޫއޭއީ އާއި ދިވެހި ސަރުކާރާ ދެމެދު ދަނޑުވެރިކަމާއި ފުޑް އެންޑް ސެކިއުރިޓީގެ ދާއިރާއިން ގުޅުން ބަދަހިކުރުމުގެ ގޮތުން އެއްބަސްވުމެއްގައި ސޮއިކުރުމަށް ވަނީ ހަމަޖެހިފައެވެ.
އެކަމަނީ ވަނީ ރާއްޖޭގެ މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާއާއި ބައްދަލުކުރައްވާފައެވެ. މި ބައްދަލުކުރެއްވުމުގައި ތިމާވެއްޓާއި މުސުމީ ގޮތުން އަންނަ ބަދަލުތަކާ ގުޅޭގޮތުން މަޝްވަރާކޮށް އެދާއިރާއިން ގުޅިގެން ކުރިވިދާނެ ކަންތައްތަކާ ގުޅޭގޮތުން މަޝްވަރާކުރެއްވިއެވެ.
އޭގެ ތެރޭގައި ތިމާވެށީގެ ގޮތުން ޚާއްސަ ސިފަތައް ލިބިފައިވާ ސަރަޙައްދުތައް ޙިމާޔަތްކޮށް ބެލެހެއްޓުމާއި، މުރަކަ ދިރުވާ އާލަކުރުމާއި ދެ ޤައުމުގެ ގުޅުން ހުރި މުއައްސަސާތަކުގެ މެދުގައި ކުޅުންބަދަހިކުރަން މަސައްކަތް ކުރުން ހިމެނެއެވެ.