ހުޅުމާލޭގައި ވޯޓަރ ސްޕޯޓްސް ހިންގުމަށް ދޫކޮށްފައިވާ ސަރަހައްދުތައްގެ ޖާގައިތުރުކޮށްފިއެވެ.
ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީއިން ބުނީ، ހުޅުމާލޭގައި ޖުމްލަ 12 ސަރަޙައްދެއްގައި ވޯޓަރ ސްޕޯޓްސްގެ ޙަރަކާތްތަަކަށް ހުއްދަދީފައެވެ. އަދި ވޯޓަރ ސްޕޯޓްސް ޚިދުމަތަށް ދޫކޮށްފައިވާ ކޮންމެ ސަރަޙައްދަކުން 20 ފޫޓު މިހާރު އިތުރުކޮށްދީފައިވާ ކަމަށެވެ. މި ޖާގަ އިތުރުކޮށްދީފައިވަނީ އެ ސަރަޙައްދުތަކުން އާންމުންނަށް ދޭ ޚިދުމަތްތައް އިތުރުކޮށްދިނުމުގެ މަޤްޞަދުގައި ކަމަށް އެޗް.ޑީ.ސީއިން ބުނެއެވެ.
އޭގެތެރޭގައި ބީޗަށް ދާ ހުރިހާ އާންމު ފަރާތްތަކަށް ވެސް ބޭނުންރެވޭނެ ޕަބްލިކް ޓޮއިލެޓަކާއި، އައުޓްޑޯރ ޝަވަރެއް ޤާއިމުކުރަން ޖެހެއެވެ. އެ ފަރާތްތަކަށް ދޫކޮށްފައިވާ ސަރަޙައްދުގެ ސެކިއުރިޓީ ބެލެހެއްޓުމާއި، ސާފުކުރުމާއި، މެއިންޓަނަންސް މަސައްކަތްތަކަކީ އެ ސަރަޙައްދު ދޫކޮށްފައިވާ ފަރާތްތަކުގެ ޒިންމާއެކެވެ.
ހުޅުމާލޭގެ ބީޗު ސަރަޙައްދުން އާންމުންނަށް ލިބޭ ޚިދުމަތްތައް އިތުރަށް ފުރިހަމަކޮށް، އާންމުން އެންމެ ބޭނުންވާނެ ޚިދުމަތްތައް އެކަށީގެންވާ ގޮތެއްގައި ފޯރުކޮށްދިނުމަށް އެޗް.ޑީ.ސީއިން އަންނަނީ މަސައްކަތްކުރަމުންނެވެ.
އެގޮތުން އެޗް.ޑީ.ސީއިން ވަނީ ވޯޓަރސްޕޯޓްސް ހިންގާ ފަރާތްތަކަށް ޓޭކްއަވޭ ޚިދުމަތްދިނުމުގެ ހުއްދަވެސް މީގެ ކުރިން ދީފައެވެ. މިކަމުގެ ސަބަބުން ބީޗަށް ދާ ފަރާތްތަކަށް ބޭނުންވާ ލުއިކާނާ ފަދަ ކާބޯތަކެއްޗާއި ފެން އަދި މި ނޫން ވެސް ބައެއް ތަކެތި އެ ސަރަޙައްދުން ލިބޭނެ މަގު ވަނީ ފަހިވެފައެވެ.
މާލެ އާއި ހުޅުމާލޭގައި ދިރިއުޅޭ ގިނަ ރައްޔިތުންތަކެއް، ހަފްތާ ބަންދާއި އެކި ޗުއްޓީތަކުގައި ހުޅުމާލެ އައިސް ހުޅުމާލޭގެ އެކި ސަރަޙައްދުތަކުގައި އުޅެމުން އަންނައިރު، ހުޅުމާލޭގެ ހުރިހާ ސަރަޙައްދަކީވެސް މުޖުތަމައުގެ ގުޅުން ބަދަހިކޮށް، ޢާއިލާތަކާއި ރަޙްމަތްތެރިންނަށް ވެސް ބޭނުންކުރެވޭނެ ފަދަ މާޙައުލަކަށް ހެދުމަކީ އަމާޒެއްކަމަށް އެޗް.ޑީ.ސީއިން ބުނެއެވެ.