މިއަހަރުގެ ފުރަތަމަ 3 މަހު 16 ކިލޯގެ މަސްތުވާތަކެތި އަތުލައިގެންފައިވާކަމަށް ފުލުހުންގެ ތަފާސް ހިސާބުން ދައްކައިފިއެވެ.
ފުލުހުންގެ އިދާރާއިން ހާމަކުރައްވައިފައިވާ މިއަހަރުގެ ފުރަތަމަ 3 މަސް ދުވަހުގެ ތަފާސްހިސާބުތަކުގައިވާ ގޮތުން މި މުއްދަތުގެ ތެރޭގައި އަތުލައިގެން 16.3 ކިލޯގެ މަސްތުވާތަކެތީގެ ތެރޭގައި އެންމެ ގިނައީ ކެނަބިސްއެވެ.
އެގޮތުން 8896 ގްރާމްގެ ކެނަބިސް އަތުލައިގެންފައިވާއިރު، މި މުއްދަތުގައި 3063 ގްރާމްގެ ކޮކެއިން ވަނީ އަތުލައިގެންފައެވެ. މީގެ އިތުރުން 2151 ގްރާމްގެ ހެރޮއިން އާއި މަސްތުވާތަކެތީގެ ގޮތުގައި ބޭނުންކުރާ އެހެނިހެން ތަކެތީގެ ގޮތުގައި 2183 ގްރާމްގެ ތަކެތި އަތުލައިގެންފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ.
މިއަހަރުގެ ފުރަތަމަ 3 މަސް ދުވަހުގެ ތެރޭގައި މަސްތުވާތަކެތީގެ މައްސަލަތަކުގެ ގޮތުގައި ފުލުހުންނަށް ރިޕޯޓްކުރި 1154 މައްސަލައިގެ ތެރެއިން 461 މައްސަލަ ލޮޖުކޮށްފައިވެއެވެ. މި މުއްދަތުގެ ތެރޭގައި މަސްތުވާތަކެތީގެ މައްސަލަތަކުގައި 331 މީހަކު ހައްޔަރުކޮށްފައިވެއެވެ. އަދި 69 މައްސަލައެއްގެ ތަޙުޤީޤު ނިންމުމަށްފަހު ދައުވާކުރަން ޕީޖީ އޮފީހަށް ވަނީ ފޮނުވާފައެވެ. މީގެ އިތުރަށް 77 މައްސަލަ ނިންމަވައި ފައިލްކުރައްވައިފައިވާކަމަށް ވެސް ފުލުހުންގެ ތަފާސްހިސާބުތަކުން ދައްކައެވެ.
މަސްތުވާތަކެތީގެ މައްސަލަތަކުގައި މިއަހަރުގެ ފުރަތަމަ 3 މަހު ހައްޔަރުކުރި 331 މީހުންގެ ތެރޭގައި ހިމެނެނީ 314 ދިވެހިންނާއި 17 ބިދޭސީންނެވެ.
ފުލުހުންގެ ތަފާސްހިސާބުތަކަށް ބަލާއިރު ފުރަތަމަ 3 މަސްދުވަހު އެންމެ ގިނަ މައްސަލަ ހުށަހަޅާފައިވަނީ މާލެ ސިޓީންނެވެ. އެގޮތުން މާލެއިން 268 މައްސަލައެއް ހުށައަޅާފައިވާއިރު، ކުޅުދުއްފުށި ސިޓީން 19 މައްސަލަ، އައްޑޫ ސިޓީން 18 މައްސަލަ އަދި ފުވައްމުލައް ސިޓީން 17 މައްސަލަ ފުލުހަށް ހުށައަޅާފައިވެވެއެވެ.
ފުލުހުން އާއްމުކުރައްވައިފައިވާ ތަފާސްހިސާބަށް ބަލާއިރު އަހަރުގެ ފުރަތަމަ 3 މަސްދުވަހުގެ ތެރޭގައި ވައްކަމާއި ފޭރުމާ ގުޅުންހުރި 2079 މައްސަލައެއް ވަނީ ރިޕޯޓްކޮށްފައެވެ. އޭގެތެރެއިން 964 މައްސަލައެއް ލޮޖްކޮށްފައިވެއެވެ. އަދި 25 މައްސަލައެއްގައި ދަޢުވާކުރައްވަން ޕީޖީ އޮފީހަށް ވަނީ ހުށައަޅުއްވައިފައެވެ. ވައްކަމާއި ފޭރުމުގެ މައްސަލަތައްވެސް އެންމެ ގިނައިން ރިޕޯޓްކޮށްފައިވަނީ މާލެ ސަރަޙައްދުންނެވެ.
މި އަހަރުގެ ފުރަތަމަ 3 މަހު 539 އެކްސިޑެންޓު މަގުމަތީގައި ހިނގައި، 77 މީހަކަށް ހާނީއްކަވެފައިވާ ކަމަށް ފުލުހުން ވިދާޅުވެފައިވެއެވެ.
ފުލުހުން އާންމުކުރެއްވި މި އަހަރުގެ ފުރަތަމަ ކުއާޓަރުގެ ތަފާސްހިސާބުތަކަށް ބަލާއިރު އެންމެ ގިނައިން އެކްސިޑެންޓު ހިނގާފައިވަނީ އެންމެ ކާރުބާރުބޮޑު މާލެ ސިޓީގައެވެ. މާލޭގައި 516 އެކްސިޑެންޓު ހިނގިއިރު އެއީ މުޅި ރާއްޖޭގައި ހިނގި އެކްސިޑެންޓުގެ ތެރެއިން 95 އިންސައްތައެވެ.
މިއަހަރު ހިނގި އެކްސިޑެންޓުތަކަށް ބަލާއިރު އެންމެ ގިނައިން އެކްސިޑެންޓުވެފައި ވަނީ ކާރެވެ. އެކްސިޑެންޓުތަކުގައި 341 ކާރު ހިމެނުނެވެ. އެކްސިޑެންޓުވި ސައިކަލުގެ އަދަދަކީ 317 އެވެ. އޭގެ އިތުރުން، 6 ހެވީ-ވެހިކަލެއް ވެސް އެކްސިޑެންޓުވެފައިވެއެވެ.
މާލެ ފިޔަވައި ދެން އެންމެ ގިނައިން އެކްސިޑެންޓު ހިނގީ ފުވައްމުލައް ސިޓީގައެވެ. އެ ސިޓީގައި 9 އެކްސިޑެންޓު ހިނގިއެވެ. އަދި އައްޑޫގައި 6 އެކްސިޑެންޓު ހިނގިއިރު ކުޅުދުއްފުށީގައި ހިނގީ އެންމެ 3 އެކްސިޑެންޓެވެ.
ފުރަތަމަ ކުއާޓަރުގައި ޓްރެފިކުގެ ގަވާއިދުތަކަށް އެންމެ ގިނަ މީހުން ޚިލާފުވީ ލައިސަންސު ނެތި ވެހިކަލް ދުއްވައިގެނެވެ. އެގޮތުން ލައިސަންސު ނުލައި ސައިކަލު ދުއްވުމުގެ 824 މައްސަލައެއް ފާއިތުވި 3 މަހު ވަނީ ރިޕޯޓްކޮށްފައެވެ. އަދި ރޯޑްވާދިނަންސް ނުހައްދައި ދުއްވުމުގެ 283 މައްސަލައެއް ފުލުހުން މި މުއްދަތުގައި ވަނީ ބައްލަވައިފައެވެ.