ބަންދުގައި ބަހައްޓައިގެން ކޯޓަށް ޙާޟިރުކުރަން ޢައްބާސް ޢާދިލް ރިޟާ ހޯދުމުގެ މަސައްކަތް ކުރައްވަމުން ގެންދަވާކަމަށް މޯލްޑިވްސް ޕޮލިސް ސަރވސިްއިން ވިދާޅުވެއްޖެއެވެ.
ޢައްބާސް ޢާދިލް ރިޟާ ހޯދަމުންދަނީ ދައުލަތުން ދަޢުވާކުރާ ފަނާކޮށްފާނެކަމުގެ ބިރު ދެއްކުމުގެ ކުށުގެ މައްސަލައާ ގުޅިގެން ކޯޓަށް ޙާޟިރުކުރަން ބޭނުންވެ ޙާޟިރުކުރެވިފައި ނުވާތީ ފުލުހުންގެ ބަންދުގައި ބަހައްޓައިގެން 23 މެއި 2023 ވަނަ ދުވަހު 14:30 އަށް ކްރިމިނަލް ކޯޓަށް ޙާޟިރުކުރުމަށް ކޮށްފައިވާ އަމުރާ ގުޅިގެންނެވެ.
މެލޭޝިއާގައިި ހުންނަ ދިވެހި އެމްބަސީގައި އިސް މަޤާމެއް މިދިޔަ ސަރުކާރުގައި އަދާކުރައްވައިފައިވާ ޢައްބާސް ޢާދިލް ރިޟާގެ މައްޗަށް ދަޢުވާ އުފުލާފައިވަނީ 22 ޑިސެންބަރު 2022 ސޯޝަލް މީޑިއާ "ކްލަބްހައުސް" ގައި އޭނާ ވާހަކަ ދައްކަމުން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ތުހުމަތުކުރެވޭ މަނީލޯންޑަރިންގެ މައްސަލައެއްގެ ޝަރީޢަތް ކްރިމިނަލް ކޯޓުގައި ކުރިއަށްދާ ގޮތާމެދު ހިތްހަމަ ނުޖެހިގެން ޕެޓްރޯލާއި، ވާބުރި ފަދަ ތަކެތި އެއްޗެހި ހޯދައި، މާލޭގެ އެކި ތަންތަނުގައި ހުޅުޖަހައި، ހަމަނުޖެހުން ހިންގުމަށް ހިތްވަރުދީފައިވާތީކަމަށް ޕްރޮސެކިއުޓަރ ޖެނެރަލްގެ އޮފީހުންވަނީ ވިދާޅުވެފައެވެ. އަދި 23 ޑިސެންބަރު 2022 ދުވަހު ޢައްބާސް ޢާދިލް ރިޟާ ބޭނުންކުރާ ޓުވިޓަރ އެކައުންޓުން ދިވެހިރާއްޖޭގައި ހުންނަ އިންޑިއާގެ ހައި ކޮމިޝަނަށް ނިސްބަތްކޮށް އިންޑިއާ އެމްބަސީގައި ހުޅުޖެހުމަށް ގޮވާލާ ޓްވީޓްކޮށްފައިވާ ކަމަށްވެސް އައްބާސްގެ މައްޗަށް އުފުލި ދަޢުވާގައިވެއެވެ.
ޢައްބާސް ޢާދިލް ރިޟާ އާބެހޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ ޕޮލިސް ކަސްޓޯޑިއަލް ޑިޕާޓްމަންޓުގެ ނަންބަރު 9991442 އަށް ގުޅައި ޙިއްޞާކުރުމަށް ފުލުހުން އެދިވަޑައިގަންނަވައެވެ.