ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލަން ދިން ބޮމުގެ ޙަމަލާގެ ތުޙުމަތު ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހްގެ އިސްތަށިފުޅުގައި އަޅުއްވާނަމަ، އެ މައްސަލަ ކަމާބެހޭ މުއައްސަސާތަކަށް ހުށަހަޅައިގެން ބައްލަވާނެކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.
ރައްޔިތުންގެ މަޖިލީހުގެ އިއްޔެ ޖަލްސާގައި ބައެއް މެމްބަރުން ވަނީ ރައީސް ނަޝީދަށް އަމާޒުކޮށް ދިން ޙަމަލާއާއި ރައީސް އިބްރާހިމް މުހައްމަދު ޞާލިޙުއާ ގުޅުވައި ސާބިތު ނުހިފޭ ވާހަކަތަކެއް ދައްކަވާފައެވެ.
ރައީސުލްޖުމްހުރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މިޢުވާން މުޙައްމަދު ވިދާޅުވީ، ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ޙަމަލާގެ ތުހުމަތު ރައީސް އިބްރާހިމް މުޙައްމަދު ޞާލިޙުގެ އިސްތަށިފުޅުގައި އަޅުވަނީ ވަކި ބަޔަކަށް ގެއްލިފައިވާ ސިޔާސީ ތާއީދު އަނބުރާ ހޯދުމުގެ ގޮތުން ކަމަށެވެ. އަދި ޙަޤީޤަތާއި ޚިލާފަށް އެ ވާހަކަ ދައްކައި ބައިބައިވުން އުފައްދާނަމަ ފިޔަވަޅު އަޅުއްވާނެނެކަމަށްވެސް މިޢްވާން ވިދާޅުވިއެވެ.
މިޢުވާން ވިދާޅުވީ، އެ ޙަމަލާއާ ގުޅިގެން ވާދަވެރި ފަރާތްތަކުން ރައީސުލްޖުމްހޫރިއްޔާގެ އިސްތަށިފުޅުގައި އަޅުއްވަނީ ކަނޑައެޅިގެން ދޮގު ތުޙުމަތުތަކެއް ކަމަށެވެ. އަދި އެ ވާހަކަ ދައްކަވަނީ ރައްޔިތުންގެ މަޖިލީހުގެ މެމްބަރުންނަށް މަޖިލީހުގެ ތަޅުމުގައި ލިބިވަޑައިގަންނަވާ އިމްތިޔާޒްގެ ބޭނުން ނަހަމަ ގޮތުގައި ހިއްޕަވައިގެން ކަމަށްވެސް އޭނާ ވިދާޅުވިއެވެ.
"ރައީސް ނަޝީދަށް ދިން ޙަމަލާ ރައީސުލްޖުމްހޫރިއްޔާއަށް ކުރިއާލައި އެނގޭ ކަމަށާއި އެކަން ކުރީ ސަރުކާރަށް އެނގިގެން ކަމަށް ބައެއް ބޭފުޅުން ދެއްކެވި ވާހަކަތަކަކީ އެއްގޮތަކަށް ވެސް އޭގެ ޙަޤީގަތެއް އެކުލެވޭ ވާހަކަތަކެއް ނޫން. ހަމަލާގެ ތުޙުމަތު ރައީސްއަށް ކުރަނީ ޤާނޫނުގެ ދަށުން ލިބިވަަޑައިގަންނަވާ އިމްތިޔާޒްގެ ބޭނުން ހިފައިގެން" މިޢްވާން ވިދަޅުވިއެވެ.
2021 ވަނަ އަހަރުގެ މެއި މަހުގެ 6 ވަނަ ދުވަހުގެރޭ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް ދިން ނުރައްކާތެރި ޓެރަރިސްޓް ހަމަލާއާ ގުޅިގެން ގިނަ އެ މައްސަލައިގައި ކުއްވެރިވާ ފަރާތްތަކާއި ދެކޮޅަށް ދަޢުވާކޮށް ޝަރީއަތް ވަނީ ފަށައިފައެވެ. މިކަމާއި ގުޅޭގޮތުން އެކި ފަރާތްތައް ހިމެނޭ ތަހުޤީޤްތައް ހިންގަވާފައިވާއިރު، ސަރުކާރުގެ އެއްވެސް އިހުމާލެއް ނުވަތަ ބައިވެރިވުމެއް މިކަމުގައި އޮތްކަމަކަށް އެއްވެސް ރިޕޯޓެއް ނުވަތަ ތަހުޤީޤަކުން ހާމަވެފައެއް ނުވެއެވެ.