ރ.އަތޮޅުގެ ވެރިކަންކުރާ ރަށް އުނގޫފާރު މަގުހެދުމުގެ މަޝްރޫޢުގެ ދެވަނަ ފިޔަވަހީގައި ހިމެނޭ މަގުތަކުގައި ތާރުއަޅަން ތައްޔާރުވެއްޖެއެވެ.
އުނގޫފާރުގެ މަގުތައް ތާރުއަޅައިގެން ޒަމާނީ ފެންވަރަށް ތަރައްޤީކުރުމުގެ ދެވަނަ ފިޔަވަހީގެ މަސައްކަތް ކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ޙަވާލުކުރައްވާފައިވަނީ 2021 ވަނަ އަހަރުގެ އޮކްޓޫބަރު މަހުގެ ތެރޭގައެވެ.
އުނގޫފާރު މަގުހެދުމުގެ މަޝްރޫޢުގެ ދެވަނަ ފިޔަވަހީގައި އެރަށުގެ 5 މަގެއްގައި ތާރުއަޅައިގެން ޒަމާނީ ފެންވަރަށް ތަރައްޤީކުރުމަށް ވަނީ ހަމަޖެހިފައެވެ. އޭގެތެރޭގައި އެރަށުގެ އެތެރޭގެ 4 މަގަކާއި ބަނދަރު މަގު ހިމެނެއެވެ. އެގޮތުން 7511.70 އަކަ މީޓަރުގެ ދުއްވާ ސަރަޙައްދެއްގައި ސަބްގްރޭޑް، ސަބްބޭސް އަދި ތާރުއަޅައި، 2291.75 އަކަ މީޓަރުގެ ސަރަޙައްދެއްގައި ދުވާރު ހެދުމަށް ވަނީ ހަމަޖެހިފައެވެ. އަދި ފެންހިންދާ ނިޒާމެއް ޤާއިމުކުރުމާއި، މަގުމަތީ ނިޝާން ހަރުކުރުމާއި މަގުބައްތި ހަރުކުރުން ވެސް މަގުހެދުމުގެ މަޝްރޫޢުގެ ދެވަނަފިޔަވަހީގެ މަސައްކަތްތަކުގެ ތެރޭގައި ހިމެނެއެވެ. މި މަޝްރޫޢަކީ 20.42 މިލިޔަން ރުފިޔާގެ މަޝްރޫޢެކެވެ. ދެވަނަ ފިޔަވަހީގެ މަސައްކަތާއެކު އެރަށުގައި ޖުމްލަ 17 މަގެއް ޒަމާނީ ފެންވަރަށް ތާރުއަޅައިގެން ތަރައްޤީ ކުރެވޭނެއެވެ.
އެމްޓީސީސީން ބުނީ އުނގޫފާރު މަގުތައް ތަރައްޤީކުރުމުގެ މަސައްކަތުގެ ދަށުން ދުވާރު ހެދުމުގެ މަސައްކަތުގެ %98 މަސައްކަތް ނިންމައިފައިވާ ކަމަށެވެ. އަދި ތާރުއެޅުމުގެ ކުރިން އަޅާ އޭބީސީ ފަށަލަ އެޅުމުގެ މަސައްކަތް ފެށިގެން ކުރިއަށްދާ ކަމަށް އެމްޓީސީސީން ބުނެއެވެ.
އުނގޫފާރު ކައުންސިލުން ފާހަގަކުރައްވާ ގޮތުގައި އެރަށުގެ މަގުތައް ކުރިން އޮތްގޮތުން ގިނަ ތަކުލީފްތަކާ ކުރިމަތިލާން ޖެހުނުކަމަށެވެ. އަދި މަގުތައް ޒަމާނީ ފެންވަރަށް ތަރައްޤީކުރެވުމުން ދިމާވާ ތަކްލީފްތަކަށް ޙައްލެއް ލިބޭނެކަމަށް ކައުންސިލުން ވިދާޅުވެއެވެ.
އުނގޫފާރު މަގު ހެދުމުގެ މަސައްކަތުގެ ދަށުން 2021 ވަނަ އަހަރު ވަނީ އުނގޫފާރު މަގުތައް ހެދުމުގެ ފުރަތަމަ ފިޔަވަހީގައި ހިމެނޭ ޢާއްމު ޚިދުމަތްތައް ހޯދުމަށް އެންމެ ގިނައިން ބޭނުންކުރަމުންދާ ރަށުގެ ބޮޑެތި މަގުތައް ޒަމާނީ ފެންވަރަށް ތަރައްޤީކޮށްފައެވެ.