ލޯނަށް އެދުނު ހުރިހާ ދަރިވަރުންނަށް ލޯނު ދެއްވުމަށް ނިންމެވިޔަސް ބަޖެޓްގެ ދަތިކަމެއް ނޯންނާނެ: މިނިސްޓަރ

ސްޓޫޑެންޓް ލޯނުގެ ޝަރުތު ހަމަވާ ހުރިހާ ދަރިވަރުންނަށް ލޯނު ދެއްވަން ނިންމާފައިވަނީ އެކަމަށް ބޭނުންވާ ފައިސާ ބަޖެޓްގެ ތެރެއިން ހަމަޖެއްްސޭނެކަމުގެ ޔަޤީންކަން އޮވެގެންކަމަށް މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހީމް ޙަސަން ވިދާޅުވެއްޖެއެވެ.

2023 ވަނަ އަހަރަށް ސަރުކާރުން ފާސްކުރެއްވި ބަޖެޓުގައި ވަނީ ދަރިވަރުން ކިޔަވަން ލޯނު ދެއްވުމަށް 216.1 މިލިޔަން ރުފިޔާ ހިމަނުއްވައިފައެވެ.

މިއަހަރު ސްޓޫޑެންޓް ލޯނަށް ހުޅުއްވާލެއްވީ 720 ދަރިވަރަކަށް ލޯނުދެއްވާ ގޮތަށެވެ. އެ ފުރުޞަތުތަކަށް 1500 އަށްވުރެ ގިނަ އެޕްލިކޭޝަން ހުށައެޅުނެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ޝަރުތު ހަމަވާ ހުރިހާ ދަރިވަރުންނަށް ލޯނު ދެއްވުމަށް ނިންމަވައިފައެވެ. އަދި ޝަރުތު ހަމަވާ 1225 ދަރިވަރުންގެ ވަގުތީ ލިސްޓް ޢާއްމުކުރައްވައިފައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން މިނިސްޓަރ އޮފް ހަޔަރަ އެޑިއުކޭޝަން ޑރ.އިބްރާހީމް ޙަސަން ވިދާޅުވީ މަަތީ ތަޢުލީމާއި ތަމްރީނަށް ސަރުކާރުން ސްޓޫޑެންޓް ލޯނު ދޫކުރައްވަނީ ވަކި މުއްދަތެއްގެ ތެރޭގައި ކިޔަވަން ފުރުމަށް ޝަރުތުކުރައްވައިފައި ކަމަށެވެ. ލޯނު ލިބޭތާ 12 މަސްދުވަހުގެ ތެރޭގައި ކިޔަވުން ފަށަންޖެހޭ ގޮތަށް ކުރިން ޝަރުތު ކަނޑައަޅާފައި އޮތްނަމަވެސް މިހާރު އެ މުއްދަތު 18 މަސްދުވަހަށް އިތުރުކުރައްވާފައިވާ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ސަރުކާރުން މިފަހަރު ހުޅުއްވައިލެއްވި ސްޓޫޑެންޓް ލޯނުގެ ފުރުޞަތުގެ ދަށުން އިތުރު ކުދިންނަށް ލޯނު ދެއްވުމަށް ނިންމެވިޔަސް އެކަމުގައި ކުރިމަތިވާނޭ މާލީ ދައްޗެއް ނެތްކަމަށެވެ. އަދި ލޯނު ފައިސާ ނުލިބިގެން އެއްވެސް ކުއްޖަކު ކިޔަވަން ނުގޮސް ހުންނާކަށް ނުޖެހޭނެ ކަމަށާއި، އަދި ފައިސާ ނުލިބިގެން ކިޔެވުން ހުއްޓާލާފައި އެނބުރި ރާއްޖެއަށް އަންނަންޖެހޭ ފަދަ ހާލަތެއްވެސް ކުއްޖަކަށް ދިމާނުވާނޭ ކަމަށެވެ.

"ތަފާސް ހިސާބު ދައްކާގޮތުން ސްޓޫޑެންޓް ލޯން ލިބޭ ދަރިވަރުންގެ ތެރެއިން ލޯނު ލިބޭ އަހަރު 60 އިންސައްތަ ކުދިން ފުރައިގެންދޭ. މިފަހަރު އެއްފަހަރާ ގިނަ ކުދިންނަށް ލޯނުގެ ފުރުޞަތު ދެއްވައިފައިވަނީ ކޭޝްފްލޯ މެނޭޖް ކުރެވޭނެކަމުގެ ޔަޤީންކަމާއެކު. އެކަން ކަށަވަރުކުރުމަށް ކަމާ ގުޅުން ހުރި ފަރާތްތަކާއެކު މަޝްވަރާތައްވެސް ކުރިން." މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހީމް ޙަސަން ވިދާޅުވިއެވެ.

ޝަރުތު ހަމަވާ ހުރިހާ ދަރިވަރުންނަށް ލޯނު ދެއްވަން ރައީސުލްޖުމްހޫރިއްޔާ ނިންމެވި ނިންމެވުމާއެކު މިފަހަރު ޕައިލެޓް ޓްރެއިނިންއަށް ހުޅުވާލެއްވި 60 ފުރުޞަތަށް ކުރިމަތިލީ ފަރާތްތަކުގެ ތެރެއިން ޝަރުޠު ހަމަވާ 479 ދަރިވަރަކަށް ވަނީ ފުރުޞަތު ލިބިފައެވެ. މިއީ ރެކޯޑް އަދަދެކެވެ.

މިއަހަރު އެމްބީބީއެސް ހެދުމަށް 133 ދަރިވަރުންނަށް އަދި ޕޯސްޓް ގްރެޖުއޭޓް މެޑިސިން ހެދުމަށް 51 ދަރިވަރުންނަށް ވަނީ ލޯނު ލިބިފައެވެ. އަދި ޕައިލެޓްކަން ކިޔަވަމުންދިޔަ 24 ދަރިވަރުންނަށް ވަނީ ކުރިން ފުރިހަމަކުރަމުން ދިޔަ ޕްރޮގްރާމް ފުރިހަމަކުރުމަށް ޓޮޕްއަޕް ލޯނު ދެއްވާފައެވެ. މީގެއިތުރުން ރާއްޖެއަށް ބޭނުންވާ ތަފާތު ދާއިރާތަކުން ޑިޕްލޮމާ ފުރިހަމަކުރުމަށް 10 ދަރިވަރުންނަށް، ބެޗްލަރސް ޑިގްރީ ފުރިހަމަކުރުމަށް 5 ދަރުވަރުންނަށް، މާސްޓަރސް ޑިގްރީއަށް ކިޔެވުމަށް އެއް ދަރިވަރަކަށް، އަދި ޕީ.އެޗް.ޑީ ފުރިހަމަކުރުމަށް 26 ދަރިވަރުންބނަށް ވަނީ ސްޓޫޑެންޓް ލޯނު ދެއްވުމަށް ނިންމަވައިފައެވެ.

ސްޓޫޑެންޓް ލޯނުގެ ވަގުތީ ލިސްޓަށް ޝަކުވާ ހުށަހެޅުމުގެ ފުރުޞަތު މިމަހުގެ 11 ވަނަ ދުވަހު 1.00 ޖެހުމާ ހަމައަށް ވަނީ ހުޅުއްވައިލައްވައިފައެވެ. ޝަކުވާ ހުށަހެޅުުގެ މުއްދަތަަށްފަހު ދާއިމީ ލިސްޓް މިމަހުގެ 22 ވަނަ ދުވަހު ޢާއްމުކުރައްވާނެއެވެ.