މުޙައްމަދު އިބްރާހީމްދީދީ އަކީ އައްޑޫއަށް އަގުހުރި ޚިދުމަތްތަކެއް ކޮށްދެއްވި ބޭފުޅެއް: ރައީސް
ދިވެހި ދައުލަތަށް ގިނަދުވަހު ޚިދުމަތް ކުރެއްވި ބޭފުޅެއް ކަމަށްވާ މުޙައްމަދު އިބްރާހީމްދީދީ (ތުއްބީގެ މުޙައްމައިދީ) އަކީ ޤައުމަށާއި އަދި ޚާއްސަކޮށް އައްޑޫއަށް އަގުހުރި ޚިދުމަތްތަކެއް ކޮށްދެއްވި ބޭފުޅެއްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
މުޙައްމަދު އިބްރާހީމް ދީދީ ނިޔާވުމާގުޅިގެން ރައީސުލްޖުމްހޫރިއްޔާ ކުރެއްވި ޓުވީޓުގައި ވަނީ މާތް لله މަރުހޫމުގެ ފުރާނައަށް ސުވަރުގޭގެ ނިޢުމަތް މިންވަރު ކުރެއްވުން އެދި ދުޢާކުރައްވާފައެވެ. އަދި މަރުހޫމުގެ ޢާއިލާއަށް އެމަނިކުފާނު ވަނީ ތަޢުޒިޔާ ދަންނަވާފައެވެ.
މުޙައްމަދު އިބްރާހީމް ދީދީ (ތުއްބީ ގެ މުޙައްމައިދީ) އަކީ ޤައުމަށާއި އަދި ހާއްސަކޮށް އައްޑޫއަށް އަގުހުރި ޚިދުމަތްތަކެއް ކޮށްދެއްވި ބޭފުޅެއް. މާތް لله މަރުހޫމުގެ ފުރާނައަށް ސުވަރުގޭގެ ނިޢުމަތް މިންވަރު ކުރައްވާށި. މަރުހޫމުގެ ޢާއިލާއަށް އަޅުގަނޑުގެ އިޚްލާޞްތެރި ތަޢުޒިޔާ ދަންނަވަން.
— Ibrahim Mohamed Solih (@ibusolih) June 9, 2023
ސ. ހިތަދޫ ބީޗްވިލާ މުޙައްމަދު އިބްރާހީމްދީދީ ވަނީ 43 އަހަރަށްވުރެ ގިނަދުވަހު، ދައުލަތަށް ޚިދުމަތް ކުރައްވާފައެވެ. މުޙައްމަދު އިބްރާހިމް ދީދީ އަކީ ޖެންޑަރ މިނިސްޓަރު އައިޝަތު މުޙައްމަދު ދީދީ އާއި ސިފައިންގެ ކުރީގެ ބްރިގޭޑިއާ ޖެނެރަލް އަދި ރައްޔިތުންގެ މަޖިލީހުގެ ހިތަދޫ މެދު ދާއިރާގެ ކުރީގެ މެންބަރު އިބްރާހީމް މުހައްމަދު ދީދީގެ ބައްޕާފުޅެވެ.
މުޙައްމަދު އިބްރާހީމްދީދީވަނީ އައްޑު އަތޮޅު ހިތަދޫ ކަތީބުކަމާއި، ހިތަދޫ ބޮޑުކަތީބުކަމާއި، އަތޮޅުވެރިޔާގެ އެހީތެރިކަމާއި، އައްޑުއަތޮޅު އަތޮޅުވެރިކަން ކުރައްވާފައެވެ. އޭގެ ފަހުން، ރާއްޖެތެރޭގެ ޚާއްޞަ އެހީތެރިޔާކަމާއި، ރާއްޖެތެރޭގެ ވަކީލުކަމުގެ މަގާމުވެސްވަނީ އަދާކުރައްވާފައެވެ.
މުޙައްމަދު އިބްރާހީމްދީދީއަކީ، އައްޑުއަތޮޅުގެ ތަރައްޤީއަށް، ޚާއްޞަކޮށް ހިތަދޫގެ ތަރައްޤީއަށް ގިނަގުނަ ޚިދުމަތްތަކެއް ކޮށްދެއްވި ބޭފުޅެކެވެ. އެގޮތުން އައްޑުއަތޮޅު ހިތަދޫ ކުޑަކަތީބުގެ މަގާމުގައި ހުންނަވައިގެން ހިތަދުއަށް އެކި ރޮނގުރޮނގުން ތަރައްޤީއާއި ތަހުޒީބު ގެނެސްދެއްވުމުގައި އިސްދައުރެއްވަނީ އަދާކުރައްވާފައެވެ. މީގެ ތެރެއިންވެސް ހިތަދޫ ގައުކެޑިއާއި ހަންކެޑެ ގުޅައިލުމަށް އެޅުއްވި ފާލަމުގެ މަސައްކަތަކީ ފާހަގަކޮށްލެވޭ މަސައްކަތެކެވެ.
މުޙައްމަދު އިބްރާހީމްދީދީ، ސަރުކާރަށް ޚިދުމަތް ކުރެއްވި މުއްދަތުގެ ތެރޭގައިވަނީ އައްޑުއަތޮޅުގައި ސަރުކާރުން އޭރު ހިންގެވި ޢުމްރާނީ، އިޤްތިޞާދީ، ތަޢުލީމީ މަޝްރޫޢުތަކުގެ ކަންތައްތައް ބެލެހެއްޓެވުމުގައި އިސްދައުރެއް އަދާކުރައްވާފައެވެ. އެގޮތުން ހިތަދޫ ބޮޑުކަތީބުކަމުގައި ހުންނެވިއިރު، ހިތަދޫގައި ޤާއިމު ކުރެވުނު ސ.އަތޮޅު ތަޢުލީމީ މަރުކަޒު ބިނާކުރެވިގެން ދިޔައީ، މުޙައްމަދު އިބްރާހީމްދީދީގެ މަސައްކަތްޕުޅުންކަން ފާހަގަކޮށްލެވެއެވެ.
މުޙައްމަދު އިބްރާހީމްދީދީ، ދައުލަތަށް ކުރެއްވި ޚިދުމަތުގެ އަގު ވަޒަންކުރައްވައި 2021 ވަނަ އަހަރު ސަރުކާރުންވަނީ ދިވެހި ދައުލަތަށް ޚިދުމަތް ކުރުމުގެ އިނާމް އަރުއްވާފައެވެ.