އަތޮޅުތެރޭގެ ސިއްޙީ ޚިދުމަތްދޭ ތަންތަން ޑިޖިޓަލްކޮށް އެތަންތަނުން ދެވޭ ޚިދުމަތުގެ ފެންވަރު ރަނގަޅުކުރުމަށްޓަކައި ބޭނުންވާ ސާމާނު 183 ތަނަކަށް ހަވާލުކުރައްވައިފިއެވެ.
އެކަމަށްޓަކައި މިއަދު ބޭއްވެވި ރަސްމިއްޔާތުގައި ރާއްޖޭގެ 5 ރީޖަނަލް ހޮސްޕިޓަލަށާއި، 15 އަތޮޅު ހޮސްޕިޓަލް އަދި 163 ޞިއްޙީ މަރުކަޒަށް އައިޓީ ސަމާނުވަނީ ހަވާލުކުރައްވާފައެވެ. މިތަކެތި ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބް ފައިޞަލް ނަޞީމްއެވެ. ޞިއްޚީ ޚިދުމަތް ދޭ ތަންތަނުގެ ފަރާތުން މިތަކެއްޗާއި ހަވާލުވެވަޑައިގަތީ އެތަންތަނުގެ އިސްވެރިންނެވެ.
އަތޮޅުތެރޭގެ ސިއްޙީ ޚިދުމަތްދޭ ތަންތަނަށް އައިޓީ ސާމާނު ހަވާލުކުރެއްވުމަށް ބޭއްވެވި ރަސްމިއްޔާތުގައި މިނިސްޓަރ އޮފް ހެލްތު އަޙްމަދު ނަޞީމް ދެއްކެވި ވާހަކަފުޅުގައި ވިދާޅުވީ ކޮންމެ ދާއިރާއަކަށް ބެލިނަމަވެސް، މަޢުލޫމާތާއި ޚިދުމަތް ފޯރުކޮށްދިނުމާ ލިބިގަތުމަށް ބާރު ދުވެލީގައި އިންޤިލާބީ ބަދަލުތައް އަންނަމުންދާކަމަށެވެ. އަދި ފެންވަރު ރަނގަޅު، ޞިއްޙީ ފަރުވާއާއި ޚިދުމަތްތައް، ފަސޭހަކަމާއެކު ރައްޔިތުންނާ ވީހާވެސް ގާތުން ފޯރުކޮށްދިނުމަށް ވާޞިލުވާންވީ އަމާޒަކީ، ޞިއްޙީ ޚިދުމަތުގެ އެންމެހާ ކަންކަން ޑިޖިޓަލް ކުރުން ކަމަށެވެ. މިނިސްޓަރ ވިދާޅުވީ ޞިއްޙީ ޚިދުމަތްތައް ޑިޖިޓަލް ކުރެވުމަކީ، މަރުކަޒުތަކާއި މުއައްސަސާތަކުގެ ފެންވަރުގައާއި ފަރުދީ ފެންވަރުގައި ގިނަގުނަ ފަސޭހަތަކެއް ލިބިގެންދާނެކަމެއްކަމަށެވެ. އަދި ޚިދުމަތްތައް ޑިޖިޓަލައިޒް ކުރުމަކީ އޭގެ ސަބަބުން ގިނަ ފައިދާތަކެއް ލިބި މިހާރު ދިމާވާ ގިނަ ގޮންޖެހުންތަކަށް ޙައްލު ލިބި، ޚިދުމަތް ފޯރުކޮށްދިނުމަށް މިހާރު ކުރާ ހޭދަ އެތައް ގޮތަކުން ކުޑަވެގެން ދާނޭ ކަމެއްކަމަށްވެސް މިނިސްޓަރ ވިދާޅުވިއެވެ.
"އެނގިވަޑައިގަންނަވާނޭ ފަދައިން، އަޅުގަނޑުމެންގެ މަރުކަޒުތަކުގެ އިދާރީ ހިންގުން ކަމުގައިވިއަސް، މުވައްޒަފުންނާ ގުޅޭ ކަންކަންކަމުގައިވިއަސް، ޞިއްޙީ މަޢުލޫމާތާއި ޞިއްޙީ ޚިދުމަތް ފޯރުކޮށް ދިނުން ކަމުގައިވިއަސް ޓެކްނޮލޮޖީގެ ބޭނުން އަޅުގަނޑުމެން މިހާރުވެސް ވަރަށް ބޮޑަށް އެބަހިފަން. ނަމަވެސް އަޅުގަނޑުމެން އަމާޒު ހިފައިގެން "ހެލްތު ސެކްޓަރ" ޑިޖިޓަލައިޒް ކުރުމަށް" މިހާރު ފަށާފައިވާ މަސައްކަތަކީ މިހާރަށްވުރެ މާފުޅާކޮށް ޓެކްނޮލޮޖީގެ ބޭނުންހިފުމަށް ހަމަޖެހިފައިވާ ޞިއްޙީ ޚިދުމަތުގެ ދާއިރާއަށް އަނެއްކާވެސް އިންޤިލާބީ ބަދަލު ގެނެސްދޭނޭ އުއްމީދީ މަސައްކަތެއް." މިނިސްޓަރ އޮފް ހެލްތު އަޙްމަދު ނަޞީމް ވިދާޅުވިއެވެ.
ހެލްތު މިނިސްޓަރ އަޙްމަދު ނަޞީމް ވިދާޅުވީ ޞިއްޙީ ދާއިރާގެ ޚިދުމަތްތައް ޑިޖިޓަލް ކުރުމަށް ކުރަންޖެހޭ އެންމެ މުހިންމު މަސައްކަތަކީ، ދާއިރާގެ އައި.ޓީ އިންފްރާސްޓަރަކްޗަރ ޤާއިމުކޮށް ތަރައްޤީކުރުންކަމަށެވެ. އަދި މިމަސައްކަތަކީ، ކުރިމަގުގައި ތަޞައްވަރު ކުރެވިފައިވާ، ޞިއްޙީ ދާއިރާ ޑިޖިޓަލައިޒް ކުރުމުގެ މުހިއްމު މަސައްކަތުގެ ބިންގާ އެޅުންކަމަށެވެ.
"މިއަދު އަތޮޅުތަކުގެ ޞިއްޙީ މަރުކަޒުތަކާއި ހޮސްޕިޓަލްތަކަށް ޙަވާލުކުރެވޭ އައި.ޓީ ސާމާނުތަކަކީ، ނިޞްބަތުން، އަދި މިހާތަނަށް ސަރުކާރުގެ އެހެން އެއްވެސް ދާއިރާއަކުން އަދި ވަކިން ޚާއްޞަކޮށް ޞިއްޙީ ދާއިރާއަށް ބަލާލިނަމަވެސް، މިގޮތުން މިހާތަނަށް ހިންގޭ އެންމެ ބޮޑު އައި.ޓީ މަޝްރޫޢު މިއަދު މި ޙަވާލުކުރެވޭ އައި.ޓީ ސާމާނުތަކަކީ، ކުރިމަގުގައި ޚިދުމަތަށް ބޭނުންވާ އެހެނިހެން ސިސްޓަމްތަކާ އެޕްލިކޭޝަންތަކަށް ބޭނުންވާނޭ ސާމާނު ހިމެނޭ ފުރިހަމަ އައި.ޓީ ޕެކޭޖެއް. " މިނިސްޓަރ އޮފް ހެލްތު އަޙްމަދު ނަޞީމް ވިދާޅުވިއެވެ.
ޞިއްޚީ ޚިދުމަތްދޭ ތަންތަނަށް ހަވާލުކުރި ތަކެތީގެ ތެރޭގައި ހިމެނެނީ 608 ކޮމްޕިއުޓަރ ސިސްޓަމާއި 44 ލެޕްޓޮޕް 500 ޓެބްލެޓާއި، 14 ވީޑިއޯ ކޮންފަރެންސް ސިސްޓަމާއި، 551 ޕްރިންޓަރެވެ.
ޞިއްޙީ ދާއިރާގެ އިންފޮމޭޝަން ކޮމިއުނިކޭޝަން ޓެކްނޮލޮޖީ ތަރައްޤީ ކުރުމަށް ކުރިއަށް ގެންދާ މަސައްކަތަކީ ރާއްޖޭގައި މިދާއިރާއިން ކުރިއަށް ގެންދާ އެންމެ ބޮޑު އެއް މަޝްރޫޢެވެ. މި މަޝްރޫޢަށް 56 މިލިއަނަށް ވުރެ ގިނަ ރުފިޔާ ޚަރަދުވާނެ ކަމަށް ހެލްތު މިނިސްޓްރީން ވިދާޅުވެއެވެ.
ހެލްތު މިނިސްޓްރީން ވިދާޅުވީ މިތަކެތީގެ ސަބަބުން ރާއްޖޭގެ ސިއްޙީ ދާއިރާ ޑިޖިޓަލައިޒްކޮށް އެއް ސިސްޓަމަކުން ގުޅާލުމަށް ކުރެވޭ މަސައްކަތަށް އިތުރު ކުރިއެރުމެއް ލިބިގެންދާނެކަމަށެވެ.