ހައުސިންގ ޑިވެލޮޕްމަންޓް ކޯރޕޭޝަން، އެޗް.ޑީ.ސީއިން ވިޔަފާރިވެރިންނަށް ޚާއްސަކޮށްގެން "އަރބަންކޯ ފޯ ބިޒްނަސް"ގެ ނަމުގައި ބޭއްވުމަށް ނިންމައިފިއެވެ.
މި އޯޕަން ޑޭ ބޭއްވުމަށް ހަމަޖެހިފައިވަނީ އެޗް.ޑީ.ސީގެ މައި އޮފީހުގެ އެގްޒިބިޝަން ސެންޓަރުގައި މާދަމާ ހެނދުނު 10:00 އިން ރޭގަނޑު 20:00 އަށެވެ.
އެޗް.ޑީ.ސީއިން ބުނީ މި ހަރަކާތުގެ އެންމެ ބޮޑު އެއް ބޭނުމަކީ އެ ކޯޕަރޭޝަންގެ ފަރާތުން ވިޔަފާރިތަކަށް ހުރި ފުރުޞަތުތައް ދައްކާލުމާއި، އިންވެސްޓަރުން ނުވަތަ ވިޔަފާރިވެރިންނަށް ފަސޭހަކަމާއެކު މި ފުރުޞަތުތަކަށް ކުރިމަތިލިމުގެ މަގުފަހިކޮށްދިނުންކަމަށެވެ.
އެގޮތުން، މިފަހަރުގެ އޯޕަންޑޭގައި ހުޅުމާލޭގައި އޮފީސް ޢިމާރާތް ޤާއިމު ކުރުމަށް ހުރި ފުރުޞަތުތަކާއި ތިލަފުށި ފޭސް 2 އިން ބިން ގަތުމަށް ހުރި ފުރުޞަތުތަކަށް ޚާއްސަކަމެއްދޭނެކަމަށް އެޗް.ޑީ.ސީއިން ބުނެއެވެ.
ހަމައެހެންމެ އެ ކޯރޕަރޭޝަންގެ ބިޒްނަސް ޑިވެލޮޕްމަންޓް ޓީމުން، ވިޔަފާރިވެރިންނަށް ހުރި ފުރުޞަތުތައް ކިޔާދިނުމާއި، ޕޯޓަލް ބޭނުން ކޮށްގެން މި ޕްރޮޖެކްޓްތަކާއި، ބިން ގަތުމަށް ބޭނުންވާ ފަރާތްތަކަށް ބިޑް ހުށަހެޅުމަށް މި ހަރަކާތުގެ ތެރެއިން އެހީތެރިކަން ފޯރުކޮށްދެވިގެން ދާނެކަމަށްވެސް އެޗް.ޑީ.ސީއިން ބުނެއެވެ.