އަމާން އުދަރެސް: ޖާގަ ތަނަވަސް އެޕާޓްމަންޓްތަކަކާއެކު ބޯހިޔާވަހިކަމަށް އުއްމީދެއް

މާލޭގެ ރައްޔިތުންނަށް ދިމާވެފައިވަ އެންމެ ބޮޑު އެއް ދައްޗަކީ ބޯހިޔާވަހިކަމުގެ ދަތިކަމެވެ. ހިތްހަމަޖެހިލައިގެން އާއިލާއާއިއެކު ދިރިއުޅެވޭނެ ބޯހިޔާވަހިކަމެއް މާލޭ ރައްޔިތުން މިހާރު ތިބީ ކެތްމަދުވެފައެވެ. ބޯހިޔާވަހިކަމުގެ މިބޮޑު މައްސަލަ ހައްލުކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ތަޞައްވުރެކެވެ.

މާލޭގައި ތޮއްޖެހުން ކުޑަކޮށް، އެންމެ ބޭނުންވެފައިވާ އާއިލާތަކަށް، އަތްފޯރާ އަގުގައި ބޯހިޔާވަހިކަން ފޯރުކޮށްދިނުމަށްޓަކައި ހުޅުމާލެ ދެވަނަ ފިޔަވަހީގައި 4000 ހައުސިންގ ޔުނިޓު ތަރައްޤީކުރުމުގެ މަސައްކަތް ސަރުކާރުން ދަނީ ކުރަމުންނެވެ. މިއީ ސަރުކާރުގެ ފަހި ދިރިއުޅުން ކޯރޕަރޭޝަނުން އިންޑިއާގެ ދެ ކުންފުންޏަކާ ޙަވާލުކޮށްގެންނެވެ.

ސަރުކާރުގެ "ގެދޮރުވެރިޔާ" ސިޔާސަތުގެ ދަށުން ހުޅުމާލޭ ދެވަނަ ފިޔަވަހީގައި ތަރައްޤީކުރާ އެ 4000 ހައުސިންގ ޔުނިޓުގެ މަސައްކަތް ކުރަމުންދަނީ އިންޑިއާގެ 2 ކުންފުނިކަމަށްވާ ޖޭ.އެމް.ސީ ޕްރޮޖެކްޓްސް ލިމިޓެޑާއި، އެން.ބީ.ސީ.ސީ ލިމިޓެޑާއި ޙަވާލުކޮށްގެންނެވެ. މި މަޝްރޫޢުގެ ދަށުން މިއިން ކޮންމެ ކުންފުންޏަކުންވެސް 2000 ހައުސިންގ ޔުނިޓް އަންނަނީ ތަރައްޤީކުރަމުންނެވެ.

މި ހައުސިންގ ޔުނިޓްތަކުގެ ތެރެއިން ޖޭ.އެމް.ސީއާއި ޙަވާލުކޮށްގެން ތަރައްޤީކުރާ ޓަވަރުތަކަށް ފަހި ދިރިއުޅުން ކޯރޕަރޭޝަނުން ދީފައިވަނީ "އަމާން އުދަރެސް" މި ނަމެވެ. އަދި އެން.ބީ.ސީ.ސީއާ ޙަވާލުކޮށްގެން ތަރައްޤީކުރާ ޓަވަރުތަކަށް ކިޔާނެ ނަންވެސް ވަރަށް އަވަހަށް ހާމަކުރާނެކަމަށް އެ ކޯރޕަރޭޝަނުން ވިދާޅުވެއެވެ.

މިފެލްޓަތަކުގައި ހިމެނެނީ 3 ކޮޓަރީގެ އެޕާޓްމަންޓާއި 2 ކޮޓަރީގެ އެޕާޓްމަންޓެވެ. ކޮނެމް އެޕާޓްމަންޓެއްވެސް ތަރައްޤީކޮށްފައިވަނީ ރައްޔިތުންނަށް ލުއިފަސޭހަ ވާނެގޮތަށް، ޖާގަ ތަނަވަސް އަދި ޒަމާނީ ފެންވަރަށެވެ. މި 4000 ހައުސިން ޔުނިޓްގެ ޑިޒައިން މަރުހަލާގައިވެސް އެންމެ ބޮޑަށް އިސްކަން ދީފައިވަނީ، އެންމެ ފުރިހަމަ އަދި ހުރިހާ ގޮތަކުންވެސް ތަނަވަސް ތަނެއް ތަރައްޤީކުރުމަށްކަމަށް ފަހި ދިރިއުޅުން ކޯރޕަރޭޝަނުން ވިދާޅުވެއެވެ.

މި 4000 ހައުސިންގ ޔުނިޓުގެ މަސައްކަތް އެކި މަރުހަލާތަކުގައި ކުރިއަށްދާއިރު، މިތަންތަން ނިމިގެންދާއިރު ހުންނާނެގޮތް ދައްކުވައިދިނުމަށް ފަހި ދިރިއުޅުން ކޯރޕަރޭޝަނުން ވަނީ "އެކްސްޕީރިއަންސް ޔުނިޓް"ގެ ގޮތުގައި 2 ޔުނިޓެއް އާއްމުންނާއި މީޑިއާއަށް ވަނީ ދައްކާލާފައެވެ. މި ޔުނިޓްތަކުން އެންމެ ޒަމާނީ ލުއިފަސޭހަތަކާއެކު އެޕާޓްމަންޓުގެ ޖާގައިގެ ތަނަވަސްކަމާއި ހިތްފަސޭހަކަން ވަރަށް ފުރިހަމައަށް ދައްކުވައިދެއެވެ.

މި ހައުސިން ޔުނިޓްތައް ތަރައްޤީކުރުމުގައި އާއްމުންގެ ސަލާމަތާއި ރައްކާތެރިކަމަށް ވަރަށް ބޮޑަށް ބަލާފައިވެއެވެ. އެގޮތުން މިތަންތަން ތަރައްޤީކުރެވިގެންދާނީ އަލިފާނުގެ ހާދިސާތަކުން ސަލާމަތްވެވޭނެ ޒަމާނީ ވަސީލަތްތަކާއިއެކުއެވެ. ކޮންމެ އެޕާޓްމަންޓެއްގެ ވަންނަ ދޮރަކީ "ފަޔަ ޕްރޫފް" ދޮރެކެވެ. މީގެ މާނައަކީ އަލިފާނުގެ ހާދިސާއެއް ހިނގައިފިނަމަ، އެދޮރުގައި އަލިފާން ހިފުމުގެ 90 މިނެޓް ފަހުން ނޫނީ އަލިފާނުގެ އަސަރު ގޭތެރޭގައި ތިބޭ މީހުންނަށް ނުކުރާނެއެވެ. އޭގެ ސަބަބުން ސަލާމަތީ ގޮތްތައް ހޯދަން ވަގުތު ލިބިގެންދާނެކަން ސަލްފިއްޔާ ވިދާޅުވިއެވެ.

މީގެއިތުރުން، މިހައުސިން ޔުނިޓްގެ ކޮންމެ ޓަވަރެއްގައި "ޑްރައި ރައިޒަރ ސިސްޓަމް" އަދި "ހޯސްރިލް ސިސްޓަމް" ޤާއިމުކުރެވޭނެއެވެ. މިސިސްޓަމްތަކުގެ ސަބަބުން އަލިފާނުގެ ހާދިސާއެއް ހިނގައިފިނަމަ އަލިފާންގަނޑު ކޮންޓްރޯލްކުރޭވެނެ މިންވަރަށް ޓޭންކުގައި ފެން ހުންނާނެއެވެ. އަދި ކޮންމެ ހައުސިން ޔުނިޓެއްގައި އަލިފާން ނިއްވާ ފުޅީގެ އިތުރުން އެލާމް ސިސްޓަމްތައްވެސް ޤާއިމްކުރެވިފައި ހުންނާނެއެވެ.

މިތަންތަނުގެ ސީދާ އަގުތައް ސަރުކާރުން އަދި ރަސްމީކޮށް ހާމަކުރައްވާފައިނުވިނަމަވެސް، މާކެޓްގައި މިވަގުތު މިފަދަ އެޕާޓްމަންޓްތައް ލިބެންހުރި އަގުތަކާ އަޅާބަލާއިރު ކުޑަވާނެކަމަށް ފަހި ދިރިއުޅުން ކޯރޕަރޭޝަނުން ވިދާޅުވެއެވެ.

މި 4000 ފްލެޓުގެ އިތުރުން، ބޯހިޔާވަހިކަމުގެ މައްސަލައަށް އަވަސް ހައްލެއް ހޯދައިދިނުމުގެގޮތުން މާލޭ ސަރަޙައްދުން 3000 ގޯތި ހިލޭ ދޫކުރުމަކީވެސް މި ސަރުކާރުގެ ވަޢުދުފުޅެކެވެ. ސަރުކާރުގެ "ގެދޮރުވެރިޔާ" ޕްރޮގްރާމުގެ ދަށުން މާލޭ ރައްޔިތުންނަށް ދޫކުރާ 3000 ގޯތީގެ ތެރެއިން 1000 ގޯތި ދޫކުރާނީ ހުޅުމާލެއިންނެވެ. ހުޅުމާލެއިން ގޯތިދޫކުރާނެ ސަރަޙައްދުތައް ސަރުކާރުން ވަނީ ކަނޑައަޅާފައެވެ. ބާކީ 2000 ގޯތި ގުޅީފަޅުން ދޫކުރާއިރު، އެކަމަށްޓަކާ ގުޅީފަޅުން ޖުމްލަ 149 ހެކްޓަރުގެ ބިން ޚާއްސަކޮށްފައިވެއެވެ.

މި ޕްރޮގްރާމުގެ ދަށުން ދޫކުރާ ގޯތީގެ އެންމެ ކުޑަ ސައިޒަކީ 1250 އަކަފޫޓެވެ. ޖޮއިންޓް އެޕްލިކޭޝަނެއްނަމަ، އިތުރަށް ބައިވެރިވާ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރުކުރެވޭނެއެވެ. އަދި 7 މީހުންނަށްވުރެ ގިނަ މީހުން ޖޮއިންޓް އެޕްލިކޭޝަނުގައި ބައިވެރިވާނަމަ، 4000 އަކަފޫޓުގެ ގޯއްޗެއް ލިބިގެންދާނެއެވެ.

މި ސަރަޙައްދުގައި ބޯހިޔާވަހިކަމުގެ ބޭނުން ޖެހިފައިވާ މިންވަރު މި 4000 ފްލެޓާއި 3000 ގޯއްޗަށް ކުރިމަތިލުމަށް އާއްމުންނަށް ހުޅުވާލެވުމާއެކު ހާމަވެގެންދިޔައެވެ. އެގޮތުން ގޯތި ހޯދުމަށް 15164 މީހުން ފޯމު ހުށަހެޅުނުއިރު ފްލެޓު ހޯދުމަށް 20697 ފޯމުވަނީ ހުށައަޅާފައެވެ. ސަރުކާރުން މިހާރު އަންނަނީ ގޯތި އަދި ފުލެޓު ލިބޭ ފަރާތްތަކުގެ ދާއިމީ ލިސްޓު އާއްމުކުރުމަށް ތައްޔާރުވަމުންނެވެ.