މިއަދުވެސް ރާއްޖޭގެ އެކި ހިސާބަށް ގުގުރުމާއެކު ވިއްސާރަކުރާނެކަމަށް ލަފާކޮށް މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން އިލްތިމާސްކުރައްވައިފިއެވެ. ރާއްޖެއަށް މިދުވަސްވަރު ކުރަމުންދަނީ ހުޅަނގުމޫސުމުގެ ވިއްސާރައެވެ.
މޫސުމާބެހޭ ޤައުމީ އިދާރާއިން ވިދާޅުވީ، ހުޅަނގުދެކުނާއި ހުޅަނގުން، އުތުރާއި މެދުރާއްޖެތެރޭގެ އަތޮޅުތަކަށް ގަޑިއަކު 10 މޭލާއި 20 މޭލާއި ދެމެދުގެ ބާރުމިނުގައި ވައިޖެހޭނެކަމަށެވެ. އަދި ދެކުނުގެ އަތޮޅުތަކަށް ގަޑިއަކު 5 މޭލާއި 15 މޭލާއި ދެމެދުގެ ބާރުމިނުގައި ވައިޖެހޭނެކަމަށެވެ. ވިލާގަނޑުގައި ގަޑިއަކު 35 މޭލަށް ވައި ގަދަވުން އެކަށީގެންވާކަމަށްވެސް އެ އިދާރާއިން ވިދާޅުވެއެވެ.
ރާއްޖޭގެ ކަނޑުތަކަށް ބަލާއިރު، ދެކުނުގެ ކަނޑުތައް އާދައިގެ ވަރަކަށް މަޑުވާނެކަމަށާއި، އެހެން ހިސާބުތަކަށް އާދައިގެ ވަރަކަށް ގަދަވާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ. އަދި ވިލާގަނޑުގައި ކަނޑުތައް ގަދަވާނެކަމަށާއި، ދެކުނުގެ ސަރަޙައްދުތަކުގައި ރާޅުގެ އުސްމިން 2 ފޫޓާއި 5 ފޫޓާއި ދެމެދު އަދި އުތުރާއި މެދުރާއްޖެތެރޭގެ ސަރަޙައްދުތަކުގައި 3 ފޫޓާއި 6 ފޫޓާއި ދެމެދު ހުންނާނެކަމަށްވެސް މޫސުމާބެހޭ ޤައުމީ އިދާރާއިން ވިދާޅުވެއެވެ.
މޫސުމާބެހޭ ޤައުމީ އިދާރާގެ ރެކޯޑްތައް ދައްކާގޮތުން ފާއިތުވި 24 ގަޑިއިރުގެ ތެރޭގައި އެންމެ ބޯކޮށް ވާރޭ ވެހުނުކަމަށް ރިކޯޑްކުރެވިފައިވަނީ އުތުރުން ހދ. ހަނިމާދޫއަށެވެ. ހަނިމާދޫއަށް 46.3 މިލިމީޓަރުގެ ވާރޭވެހިފައިވެއެވެ. ދެން އެންމެ ބޯކޮށް ވާރޭވެހުނުކަމަށް ރިކޯޑްކުރެވިފައިވަނީ ހދ. މަކުނުދޫއަށެވެ. އެރަށް 43.3 މިލިމީޓަރުގެ ވާރޭވެހިފައިވާކަމަށް ރިކޯޑްކުރެވިފައިވެއެވެ.
ޢީދު ބަންދާއި ދިމާކޮށް، ކަނޑު ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، އެމްއެންޑީއެފް ކޯސްޓްގާޑާއި މޯލްޑިވްސް ޕޮލިސް ސަރވިސް ގުޅިގެން ވެސް އަންނަނީ، ޚާއްޞަ އޮޕަރޭޝަންތަކެއް ކުރިއަށް ގެންދަމުންނެވެ.
ކޯސްޓްގާޑުން ހާމަކުރައްވާގޮތުގައި ފާއިތުވި 24 ގަޑިއިރުގެ ތެރޭގައިވެސް ކަނޑުމަތީގެ ބައެއް ހާދިސާތައް ވަނީ ހިނގާފައެވެ. އެގޮތުން އުޅަނދުން ތެޔޮ ހުސްވުމާއި، ދިޔަވުމުގެ ހާދިސާތައް ރިޕޯޓްކޮށްގެން އެހީތެރިކަން ފޯރުކޮށްދީފައިވާކަމަށް ކޯސްޓްގާޑުން ހާމަކުރައްވައެވެ. އަދި ލޯންޗަކަށް ރާޅެއް އަރާ އަޑިޔަށް ދިއުމުގެ ޙާދިސާއެއްވެސް އިއްޔެ ހިނގާފައިވެއެވެ.
އީދު ބަންދަށާއި،، އެނޫންވެސް ބޭނުންތަަކށް ކަނޑުދަތުރުފަތުކުރާއިރު، މޫސުމާއި ބެހޭ އެންމެ ފަހުގެ މަޢުލުމާތުތައް ހޯދައިގެން ދަތުރުތައް ރޭވުމަށް ކަމާ ގުޅުންހުރި އިދާރާތަކުން އިލްތިމާސްކުރައްވައެވެ.