ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހިންގާ "ބިންވެރިޔާ" ސްކީމުގެ ދަށުން ފްލެޓާއި ގޯއްޗާއި ގުޅޭ އެއްވެސް ކަމެއްގައި ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީއިން ނުގުޅާނެކަމަށް އެ ކޯރޕަރޭޝަނުން ބުނެފިއެވެ.
އެ ކޯރޕަރޭޝަނުން މިކަން ހާމަކޮށްފައި ތަފާތު ހައުސިންގ ސްކީމްތަކާ ގުޅުވާ، މަކަރާއި އޮޅުވާލުމުގެ ތެރެއިން އެކި ކަހަލަ ފޯނު ކޯލުތައް މެދުވެރިކޮށް މީހުންނަށް ލަނޑުދިނުމުގެ ކަންކަން ފަހަކަށް އައިސް އިތުރުވަމުންދާތީއެވެ. "ބިންވެރިޔާ" ސްކީމުގެ ދަށުން ގޯތި ލިބުނު ފަރާތްތަކުގެ ލިސްޓު ސަރުކާރުން ޖޫން 26 ގައި އިޢުލާންކުރައްވާފައިވާއިރު، ފްލެޓް ލިބޭ ފަރާތްތަކުގެ ލިސްޓުވެސް ވަރަށް އަވަހަށް ޢާއްމުކުރައްވާނެކަމަށް ސަރުކާރުން ވިދާޅުވެއެވެ.
އެޗް.ޑީ.ސީން ބުނީ، "ބިންވެރިޔާ ސްކީމް"ގެ ދަށުން ގޯތި ނުވަތަ ފުލެޓު ލިސްޓާއި ބެހޭ އެއްވެސް މުއާމަލާތެއް އެކޯރޕަރޭޝަންގެ ފަރާތުން ނުކުރާނެކަމަށެވެ. އަދި ސްކޭމް ކޯލް ނުވަތަ ފައިސާއާއި ޕޭމަންޓާއި ބެހޭ އެއްވެސް ލިންކެއް އެ ކޯރޕަރޭޝަނުން ނުފޮނުވާނެކަމަށެވެ.
ފަހަކަށް އައިސް ރާއްޖޭގައި އޮޅުވާލުމާއި މަކަރާއި ހީލަތުން މީހުންގެ އަތުން ބޮޑެތި ޢަދަދުތަކުން ފައިސާ ހޯދާ މައްސަލަތައް ވަނީ އިތުރުވެފައެވެ. އެގޮތުން ސަރުކާރުގެ އެކި މުއައްސަސާތަކާއި، އޮފީސްތަކާއި، ކުންފުނިތައް އަދި އަމިއްލަ ވިޔަފާރިތަކުގެ ނަން ބޭނުންކޮށްގެން މިފަދަ ސްކޭމް ކޯލްތައް ކުރުމާއި ލިންކް ފޮނުވުމުގެ މައްސަލަތައް ދޭތެރެ ދޭތެރެއިން އަންނަނީ އިތުރުވަމުންނެވެ. މިފަދަ ކަންކަމަށް އާއްމުން މިހާރަށްވުރެ ސަމާލުވެ ރައްކާތެރިވުމަށް ފުލުހުންނާއި، ކަމާބެހޭ ފަރާތްތަކުން އަންނަނީ އިރުޝާދުދެމުންނެވެ.