އައިޖީއެމްއެޗްއަށް 22 ޑޮކްޓަރުންނާއި 26 ނަރުހުން ހޯދަނީ

އިންދިރާގާނދީ މެމޯރިއަލް ހޮސްޕިޓަލް، އައި.ޖީ.އެމް.އެޗްއަށް 22 ޑޮކްޓަރުން ނުވަތަ މެޑިކަލް އޮފިސަރުންނާއި 26 ރެޖިސްޓަރޑް ނަރުހުން ހޯދުމަށް އިޢުލާންކޮށްފިއެވެ.

މިކަމާގުޅިގެން އައި.ޖީ.އެމް.އެޗް އިން ކުރި އިޢުލާންގައި ދެ ރޭންކަކުން މެޑިކަލް އޮފިސަރުންނާއި ނަރުހުން ހޯދުމަށް އިޢުލާންކޮށްފައިވެއެވެ.

އެގޮތުން ޕަބްލިކް ސަރވިސް ރޭންކް 7 ގައި ހިމެނޭ މެޑިކަލް އޮފިސަރުންގެ ވަޒީފާއަށް ހޯދާ މީހުންގެ އެންމެ އަސާސީ ޝަރުތަކީ މޯލްޑިވްސް މެޑިކަލް އެންޑް ޑެންޓަލް ކައުންސިލް ޤަބޫލުކުރާ ބޭސިކް މެޑިކަލް ޑިގްރީއެއް ހާސިލްކޮށް މޯލްޑިވްސް މެޑިކަލް އެންޑް ޑެންޓަލް ކައުންސިލް ޤަބޫލުކުރާ މެޑިކަލް އިންސްޓިޓިއުޓެއްގައި އިންޓަރންޝިޕް ފުރިހަމަކޮށްފައިވުމެވެ. އަދި ޕަބްލިކް ސަރވިސް ރޭންކް 8 ގައި ހިމެނޭ މެޑިކަލް އޮފިސަރުން މި ޝަރުތުތަކުގެ އިތުރުން މަޤާމުގެ މަސައްކަތުގެ ދާއިރާއެއްގައި 4 އަހަރު ދުވަހުގެ މަސައްކަތު ތަޖުރިބާ ލިބިފައިވުން ހިމެނެއެވެ.

ރޭންކް 7 ގައި ހިމެނޭ މެޑިކަލް އޮފިސަރަކަށް އަސާސީ މުސާރައިގެ ގޮތުގައި 18129 ރުފިޔާ އަދި މަޤާމުގެ އެލަވެންސްގެ ގޮތުގައި 10382 ރުފިޔާއާއި ޙާޒިރީ އިނާޔަތުގެ ގޮތުގައި މަސައްކަތަށް ނިކުންނަށް ކޮންމެ ދުވަހަކަށް 281 ރުފިޔާ ލިބޭނެއެވެ. އަދި ރޭންކް 8 ގައި ހިމެނޭ މެޑިލަކް އޮފިސަރަކަށް އަސާސީ މުސާރައިގެ ގޮތުގައި 20004 ރުފިޔާ އަދި މަޤާމުގެ އެލަވެންސްގެ ގޮތުގައި 11456 ރުފިޔާއާއި ޙާޒިރީ އިނާޔަތުގެ ގޮތުގައި މަސައްކަތަށް ނިކުންނަށް ކޮންމެ ދުވަހަކަށް 310 ރުފިޔާ ލިބޭނެއެވެ.

ރެޖިސްޓަރޑް ނަރުހުންގެ ގޮތުގައި މުވައްޒަފުން ހޯދުމަށްވެސް 2 ރޭންކަކުން ވަނީ އިޢުލާންކޮށްފައެވެ. އެގޮތުން ޕަބްލިކް ސަރވިސް ރޭންކުގެ 5 ގެ ނަރުހުންގެ ހުންނަންޖެހޭ އަސާސީ ޝަރުތުތަކަކީ މޯލްޑިވްސް ނަރސިންގ އެންޑް މިޑްވައިފްރީ ކައުންސިލް ޤަބޫލުކުރާ ނަރސިންގ ދާއިރާއަކުން ޤައުމީ ސަނަތުތަކުގެ އޮނިގަނޑު ލެވެލް 5 ނުވަތަ 6 ގެ ސަނަދެއް ޙާޞިލުކޮށްފައިވުމެވެ. އަދި ރޭންކް 7 ގެ ނަރުހުންގެ އަސާސީ ޝަރުތަކީ މޯލްޑިވްސް ނަރސިންގ އެންޑް މިޑްވައިފްރީ ކައުންސިލް ޤަބޫލުކުރާ ނަރސިންގ ދާއިރާއަކުން ޤައުމީ ސަނަތުތަކުގެ އޮނިގަނޑު ލެވެލް 7 ނުވަތަ 8 ގެ ސަނަދެއް ޙާޞިލުކޮށްފައިވުމެވެ.

ރޭންކް 5 ގެ ނަރުހަކަށް އަސާސީ މުސާރައިގެ ގޮތުގައި 11428 ރުފިޔާ، މަޤާމުގެ އެލަވަންސްގެގޮތުގައި 5333 ރުފިޔާ އަދި މަސައްކަތަށް ނިކުންނަށް ކޮންމެ ދުވަހަކަށް ޙާޒިރީ އިނާޔަތުގެގޮތުގައި 144 ރުފިޔާ ލިބޭނެއެވެ. ރޭންކް 7 ގެ ނަރުހަކަށް އަސާސީ މުސާރައިގެ ގޮތުގައި 13057 ރުފިޔާ، މަޤާމުގެ އެލަވަންސްގެ ގޮތުގައި 6094 ރުފިޔާ އަދި ޙާޒިރީ އެލަވެންސްގެގޮތުގައި ނިކުންނަށް ކޮންމެ ދުވަހަކަށް 165 ރުފިޔާ ލިބޭނެއެވެ.

މި ރޭންކުތަކުގެ ޑޮކްޓަރުންނާއި ނަރުހުންނަށްވެސް ސިވިލް ސަރވިސްގެ މުވައްޒަފުންނަށް ހަމަޖެހިފައިވާ އުޞޫލުން އިތުރު ގަޑީގެ މުސާރައާއި ބަންދު ދުވަސްތަކުގެ މުސާރަ ލިބޭނެއެވެ.

ޑޮކްޓަރުންނާއި ނަރުހުންގެ އިތުރުން 6 މެޑިކަލް ލެބޯރެޓަރީ ޓެކްނީޝަނުން ހޯދުމަށްވެސް އައި.ޖީ.އެމް.އެޗްއިން ވަނީ އިޢުލާންކޮށްފައެވެ. މި ހުރިހާ މަޤާމަށްވެސް މީހުން ނެގުމަށް ހަމަޖެހިފައިވަނީ ދާއިމީ މުވައްޒަފުންގެގޮތުގައެވެ. މި މަޤާމުތަކަށް ޝަޢުގުވެރިވާ ފަރާތްތަކުން މިމަހުގެ 10 ވާ ހޯމަ ދުވަހުގެ މެންދުރު 13:00 ގެ ކުރިން އެކަމަށް އެދި ހުށަހެޅުމަށް އެ ހޮސްޕިޓަލުން ވަނީ ހުޅުވާލާފައެވެ.