ވިލާ ކޮލެޖްގެ ސެޕްޓެމްބަރ އިންޓޭކަށް ހުޅުވާލައިފި، ތަފާތު 147 ކޯހެއް

ވިލާ ކޮލެޖުގެ 2023 ވަނަ އަހަރު ސެޕްޓެމްބަރ އިންޓޭކްގައި ފެށުމަށް ހަމަޖެހިފައިވާ ކޯސްތަކުގައި ބައިވެރިވުމުގެ ފުރުޞަތު ހުޅުވާލައިފިއެވެ.

މިގޮތުން ތަފާތު އެކި ދާއިރާތައް ހިމެނޭހެން ޖުމްލަ 147 ކޯހެއްގައި ބައިވެރިވުމުގެ ފުރުޞަތު ސެޕްޓެމްބަރު އިންޓޭކުގައި އެ ކޮލެޖުން ވަނީ ހުޅުވާލާފައެވެ.

މީގެ ތެރޭގައި އިންފޮރމޭޝަން ޓެކްނޮލޮޖީ، ޓީޗިންގް، ޝަރީޢާ، ލޯ، ޓޫރިޒަމް އެންޑް ހޮސްޕިޓަލިޓީ، ބިޒްނަސް މެނޭޖްމަންޓް، އޭވިއޭޝަން މެނޭޖްމެންޓް، އިންޓަނޭޝަނަލް ބިޒްނަސް، އިކޮނޮމިކްސް، އެކައުންޓިންގ އެންޑް ފައިނޭންސް، ބޭންކިންގ އެންޑް ފައިނޭންސް ފަދަ ދާއިރާތައް ހިމެނެއެވެ. އަދި ހިއުމަން ރިސޯސް، އިންޖިނިއަރިންގް، ރިސާރޗް، ނަރސިންގ، ސައިކޮލޮޖީ، ޕަބްލިކް ހެލްތް އަދި އިންޓީރިއަ އާކިޓެކްޗާ އެންޑް ޑިޒައިންފަދަ ދާއިރާތައްވެސް މީގެ ތެރޭގައި ހިމެނެއެވެ.

މި އިންޓޭކްގައި މާސްޓަރސް ފެންވަރުގެ 20 ކޯހަކާއި، ޕޯސްޓް ގްރެޖުއޭޓް ޑިޕްލޮމާ އަދި ޕޯސްޓު ޕޯސްޓް ގްރެޖުއޭޓް ސެޓްފިކެޓް ފެންވަރުގެ 9 ކޯހަކާއި، ޑިގްރީ ފެންވަރުގެ 41 ކޯހެއް ހިންގުމަށް ހަމަޖެހިފައިވެއެވެ. އަދި ޑިޕްލޮމާ ފެންވަރުގެ 29 ކޯހަކާއި، ފައުންޑޭޝަން ފެންވަރުގެ 17 ކޯހަކާއި، އަދި ސެޓްފިކެޓް 3 ފެންވަރުގެ 17 ކޯހަކާއި، ސެޓްފިކެޓް ލެވެލް 2 ގެ 1 ކޯސް ފެށުމަށް ހަމަޖެހިފައިވާކަމަށް ވިލާ ކޮލެޖުން މަޢުލޫމާތުދެއެވެ.

މި ޕްރޮގްރާމްތަކުގެ ތެރޭގައި ހިމެނޭ ބެޗްލަރ އޮފް ކަލިނަރީ މެނޭޖެމަންޓް، ބެޗްލަރ އޮގް މާސް ކޮމިއުނިކޭޝަންސް، ބެޗްލަރ އޮފް އިންޓަރނޭޝަނަލް ހޮސްޕިޓަލިޓޮ މެނޭޖްމަންޓް، މާސްޓަރ އޮފް އިންޓަނޭޝަނަލް ހޮސްޕިޓަލިޓީ މެނޭޖްމަންޓް، މާސްޓަރ އޮފް ކޮމިއުނިކޭޝަން އަކީ މެލޭޝިއާގެ ޓެއިލަރސް ޔުނިވަރސިޓީގެ ޕްރޮގްރާމްތަކެކެވެ. މިޕްރާމްތަކުގައި ކިޔަވާ ދަރިވަރުންނަށް ކޯހުގެ ބައެއް ވިލާ ކޮލެޖުގައި ފުރިހަމަ ކުރުމަށްފަހު، ބާކީ ބައި ބޭނުންވެއްޖެ ހިނދެއްގައި މެލޭޝިއާގައި ފުރިހަމަ ކުރުމުގެ ފުރުޞަތު ވެސް ވަނީ ހުޅުވިފައެވެ.

ވިލާ ކޮލެޖުން ބުނީ ސެޕްޓެމްބަރ އިންޓޭކުގައި ހުޅުވާލެވޭ ކޯސްތަކުގެ ތެރޭގައި އޮންލައިން އަދި ފޭސް ޓު ފޭސް ކޮށް ކިޔެވޭ ކޯސްތައް ހިމެނޭކަމަށެވެ. އަދި މާލޭގައި ހުންނަ ކިއު.އައި ކެމްޕަހުގެ އިތުރުން ވިލާކޮލެޖްގެ ނައިފަރު ކެމްޕަސް، ގަން ކެމްޕަސް، މަހިބަދޫ ކެމްޕަސް، ހިތަދޫ ކެމްޕަސް އަދި ކުޅުދުއްފުށީ ކެމްޕަހުގައި ވެސް ކޯސްތައް ފެށުމަށްވަނީ ހަމަޖެހިފައެވެ.

މި ކޯސްތަކުގައި ބައިވެރިވާން އެދޭ ފަރާތްތަކުން ކޯހުގައި ބައިވެރިވުމަށް ފޯމު ހުށަހެޅުމަށް 13 އޯގަސްޓް 2023 ގެ ނިޔަލަށް ވަނީ ފުރުޞަތު ހުޅުވާލާފައެވެ. މި ކޯސްތަކުގެ ކިޔެވުން، ސެޕްޓެމްބަރ މަހުގެ ފަހު ހަފްތާ ތެރޭގައި ފަށާނެކަމަށް ވިލާ ކޮލެޖުން ބުނެއެވެ.