ކުދި ވިޔަފާރިތަކަށް އަމާޒުކޮށްގެން ބާއްވާ ލީން ސްޓާރޓްއަޕް މޯލްޑިވްސްގައި ބައިވެރިވުމުގެ ފުރުޞަތު ހުޅުވާލައިފި

ދިރާގާއި ސްޕާރކްހަބް ގުޅިގެން ބާއްވާ "ލީން ސްޓާރޓްއަޕް މޯލްޑިވްސް 2023" ވަރކްޝޮޕްގައި ރަޖިސްޓްރީވުމުގެ ފުރުޞަތު ހުޅުވާލައިފިއެވެ. މި ވަރކްޝޮޕް ބޭއްވުމަށް ހަމަޖެހިފައިވަނީ 14 ން 16 ޖުލައި 2023ގެ ނިޔަލަށެވެ.

ލީން ސްޓާރޓްއަޕް މޯލްޑިވްސް އަކީ އުއްމީދީ ވިޔަފާރިވެރިންނާއި އިނޮވޭޓަރުންނަށް ސްޓާރޓްއަޕްތައް ބިނާކުރުމަށް ނުވަތަ އިނޮވޭޝަން ހިންގުމަށް ބޭނުންވާ ޢިލްމާއި ވަޞީލަތްތަކާއި ވިސްނުމަށް އަހުލުވެރިކުރުމަށް ފަރުމާކޮށްފައިވާ އިންޓެންސިވް ސްޓާރޓްއަޕް ބޫޓްކޭމްޕެކެވެ. މި ވަރކްޝޮޕަކީ "ލީން ސްޓާރޓްއަޕް" ނަމަކަށް ކިޔާ މެތަޑޯލޮޖީގެ މައްޗަށް ބިނާކޮށް ފަރުމާކޮށްފައިވާ ވަރކްޝޮޕެއްކަމަށް ދިރާގުން ބުނެއެވެ.

3 ދުވަހުގެ މުއްދަތަކަށް ކުރިއަށްގެންދާ މި ބޫޓްކޭމްޕްގެ ތެރޭގައި ލީން ސްޓާރޓްއަޕް ކެންވަސް ބޭނުންކޮށްގެން ވިޔަފާރީގެ ޚިޔާލުތައް ތަރައްޤީކޮށް އިތުރަށް ފުރިހަމަ ކުރުމަށް ޢަމަލީ ހަރަކާތްތަކާއި، ގްރޫޕް ހަރަކާތްތަކާއި، ތަޖުރިބާކާރުންގެ ސެޝަންތައް ބައިވެރިންނަށް ކިޔައިދެވިގެންދާނެއެވެ. އަދި ދެމެހެއްޓެނިވި ވިޔަފާރިއެއް ބިނާކުރުމަށްޓަކައި އެނގެންޖެހޭ އަސާސީ ކަންތައްތަކާއި، ކަސްޓަމަރުން ދެނެގަނެ ހޯދުމުގެ މަރުހަލާއާބެހޭ އެކި ވަޞީލަތްތަކާއި އުކުޅުތައްވެސް ބައިވެރިންނަށް މި ވަރކްޝޮޕްއިން އެނގިގެންދާނެކަމަށް ދިރާގުން ބުނެއެވެ.

ދިރާގާއި ސްޕާކްހަބް ގުޅިގެން ލޯކަލް ސްޓާޓްއަޕްތަކަށް އެހީތެރިކަން ފޯރުކޮށްދީ، އަލަށް ފަށައިގަންނަ ސްޓާޓްއަޕްތައް ދެމެހެއްޓެނިވިގޮތެއްގައި ކުރިއަށްގެންދިއުމަށް ދިރާގުން އަންނަނީ އެހީތެރިކަން ފޯރުކޮށްދެމުންނެވެ.