ރައީސް ޞާލިޙުގެ ކެމްޕޭން ދަތުރުތައް ފަށްޓަވައިފި، ކެމްޕޭން ރަސްމީކޮށް ލޯންޗުކުރުން މިރޭ ފޯކައިދޫގައި

އަންނަ ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވެރިކަން ކުރާ މައި ޕާޓީ އެމް.ޑީ.ޕީގެ ފަރާތުން ވާދަކުރައްވާ އެޕާޓީގެ ރިޔާސީ ކެނޑިޑޭޓް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ކެމްޕެއިން ދަތުރުތައް ރަސްމީކޮށް ފަށްޓަވައިފިއެވެ.

ރިޔާސީ އިންތިޚާބަށް ކެމްޕޭން ކުރެއްވުމުގެ ގޮތުން އެމަނިކުފާނު އެންމެ ފުރަތަމަ ދަތުރު ފެށްޓެވީ ށ. އަތޮޅަށެވެ. މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި އެމް.ޑީ.ޕީގެ އިސް ފަރާތްތަކާއި، އަންނަ ރިޔާސީ އިންތިޚާބަށް އެމަނިކުފާނާއެކު ކޯލިޝަން ހަދާފައިވާ ޢަދާލަތު ޕާޓީއާއި މޯލްޑިވްސް ޑިވެލޮޕްމަންޓް އެލަޔަންސް، އެމްޑީއޭގެ ލީޑަރުންވެސް ބައިވެރިވެވަޑައިގަންނަވައެވެ.

ރައީސުލްޖުމްހޫރިއްޔާގެ މި ދަތުރުފުޅުގެ ތެރެއިން އެންމެ ފުރަތަމަ މަންޒިލެއްގެގޮތުގައި ވަޑައިގަތީ ށ. ކޮމަންޑޫއަށެވެ. ކޮމަންޑޫއަށް ވަޑައިގަތީ މިއަދު ހެނދުނުގެ ވަގުތެއްގައެވެ. އެރަށަށް ވަޑައިގަތުމުން އެމަނިކުފާނާއި އެމަނިކުފާނުގެ އަރިޙުގައި ވަޑައިގެންނެވި ވަފްދަށް ކޮމަންޑޫ ރައްޔިތުންގެ ފަރާތުން ވަނީ ޚޫނު މަރުޚަބާއެއް ކިޔާފައެވެ. ކޮމަންޑޫއަށް ވަޑައިގެން ރައީސް ވަނީ އެމަނިކުފާނުގެ ސަޕޯޓަރުންނާއި ބައްދަލުކުރައްވާ، މި ސަރުކާރުގެ ސިޔާސަތުތަކާއި ތަރައްޤީގެ މަޝްރޫޢުތަކާއި، އެމަނިކުފާނު ގެންގުޅުއްވާ ތަޞައްވުރާއި ގުޅޭގޮތުން ވާހަކަފުޅުދައްކަވާފައެވެ.

މި ދަތުރުފުޅުގެ ތެރެއިން ކޮމަންޑޫއާއި އެ އަތޮޅު މަރޮށީގެ އިތުރުން، ނޫމަރާ އަދި ފޯކައިދޫއަށް ރައީސުލްޖުމްހޫރިއްޔާ ވަޑައިގަތުމަށް ވަނީ ހަމަޖެހިފައެވެ. އަންނަ ރިޔާސީ އިންތިޚާބަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ކެމްޕޭން ރަސްމީކޮށް ލޯންޗްކުރުން މިރޭ އޮންނާނެއެވެ. މި ޖަލްސާ އޮންނާނީ ށ. ފޯކައިދޫގައެވެ.

ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވާނެ ކެނޑިޑޭޓެއް ކަނޑައަޅުއްވާފައިވަނީ އެޕާޓީގެ ތެރޭގައި ބޭއްވު ރިޔާސީ ޕްރައިމަރީއަކުންނެވެ. މިއީ މިފަހަރުގެ ރިޔާސީ އިންތިޚާބުގައި އެތެރޭގެ ޕްރައިމަރީއަކުން ރިޔާސީ ކެނޑިޑޭޓަކު ކަނޑައެޅި ފުރަތަމަ ޕާޓީވެސް މެއެވެ. ރިޔާސީ ޕްރައިމަރީއަށްފަހު ކެމްޕެއިން ހަރަކާތްތައް އެމްޑީޕީން ދަނީ މާލެއާއި އަތޮޅު ތެރޭގެ ރަށްތަކުގައި ކުރިއަށް ގެންދަމުންނެވެ. މިދަތުރުތަކުގެ ބޭނުމަކީ ރިޔާސީ އިންތިޚާބަށް އެމްޑީޕީން އެކުލަވާލާ މެނިފެސްޓޯއަށް ބޭނުންވާ މައުލޫމާތުތައް އެއްކުރުމާއި، ރަށްރަށުގައި ހުރި ކަންބޮޑުވުންތައް ސަރުކާރާއި ހަމައަށް ގެނެސް ދިނުމެވެ.

ރިޔާސީ އިންތިޚާބުގެ ކުރިން ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން ކެމްޕޭން ހަރަކާތްތައް ކުރިއަށްގެންދެވުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ޢަމާޒެކެވެ. އެމްޑީޕީން ރިޔާސީ އިންތިޚާބުގައި ރައްޔިތުންނަށް ހުށަހަޅާ ވައުދުތަކާއި، ކޮށްދޭނެ ކަންކަމުގެ މައްޗަށް ބިނާކޮށް އެކުލަވާލާ މެނިފެސްޓޯގެ މަސައްކަތްވެސް މިހާރު އޮތީ ނިމުމަކާއި ގާތްވެފައެވެ. އެގޮތުން ބޭނުންވާ ހުރިހާ މަޢުލޫމާތެއް އެއްކުރެވި މިހާރު ކުރަމުންދަނީ މެނިފެސްޓޯއެއްގެ ސިފައިގައި އެކުލަވާލުމުގެ މަސައްކަތްކަމަށާއި، މެނިފެސްޓޯ ވެގެންދާނީ ކޯލިޝަން މެނިފެސްޓޯއަކަށްކަމަށްވެސް އެމް.ޑީ.ޕީން ބުނެފައިވެއެވެ.