އިސްލާމްދީނާމެދު ނަފްރަތުގެ ޢަމަލުތައް ހުއްޓުވުމަށް ޔޫއެންއެޗްއާރްސީއަށް ހުށަހެޅި ޤަރާރު ފާސްކޮށްފި

އިސްލާމްދީނާމެދު ނަފްރަތު އުފެދޭ އަދި ތަފާތުކުރުންތަކާއި ހަމަނުޖެހުމަށް ހިތްވަރުދޭ ޢަމަލުތައް ހުއްޓުވުމަށް އޯގަނައިޒޭޝަން އޮފް އިސްލާމިކް ކޯޕަރޭޝަން، އޯ.އައި.ސީ އިން އދ.ގެ އިންސާނީ ޙައްޤުތަކާބެހޭ މަޖިލީހަށް ހުށަހެޅި ޤަރާރު ފާސްވެއްޖެއެވެ. އޯ.އައި.ސީގެ މެމްބަރު ޤައުމެއްގެ ހައިޘިއްޔަތުން ދިވެހިރާއްޖެއިން ވޯޓުލާފައިވަނީ މިޤަރާރާ އެއްކޮޅަށެވެ.

ސްވިޑެންގެ އިތުރުން ދުނިޔޭގެ އެކި ކަންކޮޅުތަކުގައި ވިދިވިދިގެން ހިނގަމުންދާ ކީރިތި ޤުރުއާނުގެ މުޞްޙަފް އެންދުމުގެ ހާދިޘާތަކާ ގުޅިގެން މިކަން އިތުރަށް ތަކުރާރުވިޔަނުދިނުމަށްޓަކައި އެޅިދާނެ ފިޔަވަޅުތަކާ ގުޅޭގޮތުން މަޝްވަރާކުރުމަށްޓަކައި އޯ.އައި.ސީގެ މައި މަރުކަޒުގައި 2 ޖުލައި 2023 ވަނަ ދުވަހު އެޖަމްޢިއްޔާގެ އެގްޒެކެޓިވް ކޮމިޓީގެ އޯޕަން-އެންޑެޑް ކުއްލި ބައްދަލުވުމެއް ވަނީ ބާއްވާފައެވެ.

މި ބައްދަލުވުމުގައި އޯ.އައި.ސީގެ މެމްބަރު ޤައުމުތަކުން ވަނީ މި މައްސަލަ ބައިނަލްއަޤްވާމީ ދުނިޔޭގެ ސަމާލުކަމަށް ގެނައުމުގެ ގޮތުން މިހާރު ހިނގަމުންދާ އދ. ގެ އިންސާނީ ޙައްޤުތަކާ ބެހޭ މަޖިލީހުގެ 53 ވަނަ ބައްދަލުވުމަށް ޤަރާރެއް ހުށަހަޅައި، މިކަމާމެދު ކުއްލި މަޝްވަރާ ބައްދަލުވުމެއް ކުރިއަށް ގެންދިއުމަށް ހުށަހެޅުމަށް އެއްބަސްވެފައެވެ.

އެގޮތުން އޯ.އައި.ސީގެ އެދުމުގެ މަތިން، އދ. ގެ އިންސާނީ ޙައްޤުތަކާ ބެހޭ މަޖިލީހުން ވަނީ ކީރިތި ޤުރުއާނުގެ މުޞްޙަފު އެންދުމުގެ ހާދިޘާތަކާ ގުޅިގެން އިތުރަށް މަޝްވަރާކުރުމަށްޓަކައި 11 ޖުލައި 2023 ވަނަ ދުވަހު އެމަޖިލީހުގެ 53 ވަނަ ބައްދަލުވުމުގެ ތެރެއިން އަރޖެންޓް ޑިބޭޓް އެއް ބާއްވާފައެވެ. މި ޑިބޭޓްގައި ދިވެހިރާއްޖެ ތަމްޞީލުކުރައްވާފައިވަނީ ދިވެހިރާއްޖެއިން ޖެނީވާގައި ހުންނަ އދ. ގެ އޮފީސްތަކަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އާސިމް އަޙްމަދެވެ.

At the Urgent Debate at #HRC53 on the desecration of the Holy Quran Amb. @asim_mv condemned this abhorrent act & stated that acts of Islamophobia undermine all efforts to uphold the values of tolerance, & called for global solidarity to promote peace & coexistence. #MDVatHRC pic.twitter.com/q2G7vMJgaz

— Maldives Mission GVA (@MDVinGeneva) July 11, 2023

މިޑިބޭޓްގައި ދިވެހިރާއްޖޭގެ ސަރުކާރުގެ ފަރާތުން ދާއިމީ މަންދޫބު ދެއްވި ޚިތާބުގައި އެމަނިކުފާނު ވަނީ ކީރިތި ޤުރުއާނުގެ މުޞްޙަފު އެންދުން އެންމެ ހަރުކަށި ޢިބާރާތުން ކުށްވެރިކޮށް، އެފަދަ ޢަމަލުތަކުގެ ސަބަބުން އިޖުތިމާޢީ ފޭރާމަށް ކުރާ ނޭދެވޭ އަސަރުތަކުގެ މައްޗަށް އަލިއަޅުއްވާފައެވެ. އަދި މިފަދަ ޢަމަލުތަކަކީ ޚިޔާލު ފާޅުކުރުމުގެ ޙައްޤުގެ ދަށުން ބަލައިގަނެވޭނެ ޢަމަލުތަކެއް ނޫންކަމަށާއި މިފަދަ ޢަމަލުތަކުގެ ސަބަބުން އިސްލާމް ދީނާ މެދު ބިރުވެރިކަމާއި ނަފުރަތު އުފެދޭކަން ފާހަގަކުރައްވާފައެވެ. އަދި މުޖުތަމަޢުގެ ހަމަޖެހުމާއި މަސަލަސްކަން ޤާއިމުކުރުމަށް މިފަދަ ޢަމަލުތައް ނިމުމަކަށް ގެނައުމަށް ގޮވާލައްވާފައެވެ.

ދީނާމެދު ނަފްރަތު އުފެދޭ އަދި ތަފާތުކުރުންތަކާއި ހަމަނުޖެހުމަށް ހިއްވަރުދޭ ޢަމަލުތައް ހުއްޓުވުމުގެ ނިޔަތުގައި އޯ.އައި.ސީ އިން ވަނީ އިސްވެދެންނެވުނު ޑިބޭޓްގެ ތެރެއިން ޤަރާރެއްވެސް ހުށަހަޅާފައެވެ. އ.ދ. ގެ އިންސާނީ ޙައްޤުތަކާ ބެހޭ މަޖިލީހުގެ 28 މެމްބަރު ޤައުމެއްގެ ތާޢީދުލިބި އެމަޖިލީހުގެ ބޮޑު އަޣުލަބިއްޔަތަކުން މިޤަރާރު ވަނީ ފާސްވެފައެވެ.