އެމްއާރުއެމްގެ ރިޔާސީ ޕްރައިމަރީގައި ވާދަކުރަން ފާރިސް ނަން ހުށަހަޅުއްވައިފި

އެމްއާރުއެމްގެ ރިޔާސީ ޕްރައިމަރީގައި ވާދަކުރަން އެ ޕާޓީގެ ރައީސް. އަހުމަދު ފާރިސް މައުމޫން ފޯމް ހުށަހަޅުއްވައިފިއެވެ.

އެމްއާރުއެމްއިން ރިޔާސީ އިންތިހާބުގައި ވާދަކުރުމަށް ނިންމައި، ޕާޓީގެ ޕްރައިމަރީގައި ވާދަކުރުމަށް ހުޅުވާލީ މިދިޔަ އަންގާރަދުވަހުއެވެ.

އެމްއާރުއެމްއިން ބުނީ ކުރިއަށް އޮތް ރިޔާސީ އިންތިޚާބުގައި ވާދަ ކުރާނެ ކެނޑިޑޭޓެއް ކަނޑައެޅުމަށް ބާއްވާ ޕްރައިމަރީގައި ވާދަކުރެއްވުމަށް، އެ ޕާޓީގެ ރައީސް ފާރިސް މައުމޫން ވާދަކުރެއްވުމަށް މިއަދު ފޯމް ހުށަހަޅުއްވާފައިވާކަމަށެވެ. ފާރިސްގެ އިތުރުން އެހެން ބޭފުޅަކު ނަން ހުށަހަޅުއްވާފައިވާކަމެއް އެމްއާރުއެމްއިން ހާމައެއް ނުކުރެއެވެ.

އެމްއާރުއެމްއިން ވަނީ މިއަދު ހަވީރު 4:00 ޖެހުމާއި ހަމައަށް ޕްރައިމަރީގައި ވާދަކުރަން ފޯމް ހުށަހެޅުމުގެ ފުރުސަތު ހުޅުވާލާފައެވެ. އަދި ޕްރައިމަރީގައި ވާދަކުރުމަށް ނަން ހުށަހަޅުއްވާފައިވާ ފަރާތްތަކުގެ ނަންތައް މާދަމާ އިއުލާންކުރުން މާދަމާ ބޭއްވުމަށް އެ ޕާޓީން ވަނީ ކަނޑައަޅާފައިވެއެވެ.

އެމްއާރުއެމްއިން ބުނީ ރިޔާސީ ޓިކެޓް ދިނުމަށް ޕްރައިމަރީއެއް ބާއްވަންޖެހިއްޖެނަމަ، ޕްރައިމަރީ އޮންނަނީ އަންނަ އަންގާރަދުވަހު އޮންލައިންކޮށްކަމަށެވެ.

އެމްއާރުއެމްގެ އިތުރުން، އެހެން ރިޔާސީ ޕްރައިމަރީގެ މަސައްކަތް މިވަގުތު ކުރިއަށްދަނީ އަލަށް އުފެއްދި ދަ ޑިމޮކްރެޓްސް ޕާޓީންނެނެވެ. އެ ޕާޓީގެ ޕްރައިމަރީ އަންނަ ހުކުރު ދުވަހު ބޭއްވުމަށް ވަނީ ހަމަޖެހިފައެވެ.

އެމްއާރުއެމްއާއި ދަ ޑިމޮކްރެޓްސް ޕާޓީ ފިޔަވައި ރިޔާސީ އިންތިހާބުގައި ވާދަކުރުމަށް ނިންމާފައިވާ އެހެން ޕާޓީތަކުން ވަނީ ރިޔާސީ ކެނޑިޑޭޓުން އިއުލާންކޮށްފައެވެ.