ޑިމޮކްރެޓްސްގެ 94 އިންސައްތަ މެމްބަރުންގެ ތާއީދު އިލްޔާސްއަށް
-
- ވޯޓްގައި ބައިވެރި 94 އިންސައްތަ މީހުން ބުނީ ފެންނަކަމަށް
-
- ނުފެންނަ ކަމަަށް ބުނީ 153 މެމްބަރުން
ދަ ޑިމޮކްރެޓްސްގެ ރިޔާސީ ކެނޑިޑޭޓަކަށް ރައްޔިތުން މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ކަނޑައެޅުމަށް އެޕާޓީގެ 94 އިންސައްތަ މީހުން ތާއީދުކޮށްފިއެވެ.
އަންނަ ރިޔާސީ އިންތިޚާބަށް ޑިމޮކްރެޓްސްއިން ނެރޭ ކެނޑިޑޭޓެއް ކަނޑައެޅުމަށޤ ރިޔާސީ ޕްރައިމެރީ ބާއްވަން ހުޅުވާލުމުން އެކަމަށް ޝައުއގުވެރިކަން ފާޅުކުރެއްވީ ހަމައެކަނި އިލްޔާސް ލަބީބްއެވެ. އެ ޕާޓީގެ އަސާސީ ގައިވައިދުގައިވާ ގޮތުން އެންމެ ކެނޑޑިޑޭޓަކު ކުރިމަތިލައިފިނަމަ ޕާޓީގެ މެމްބަރުންގެ 10 އިންސައްތަ ތާއީދު ލިބެންޖެހެއެވެ.
މިއަދު މެންދުރު 2 ކުން އިރުއޮއްސި 6 އަކަށް ކުރިޔަށް ދިޔަ އިންތިޚާބުގައި ޕާޓީގެ ރަޖިސްޓްރީގައި ތިބި 4100 މެމްބަރުންގެ ތެރެއިން 3208 މެމްބަރުން ވަނީ ވޯޓް ދީފައެވެ.
މި އިންތިޚާބުގެ ވަގުތީ ނަތީޖާ ދައްކާގޮތުން އިލްޔާސް ރިޔާސީ ކެނޑިޑޭޓަކަށް ކަނޑައެޅުމަށް ފެންނަކަމަށް 3041 މީހުން ވަނީ ވޯޓް ދީފިއެވެ. ނުފެންނަކަމަށް ވޯޓްދީފައިވަނީ 153 މީހުންނެވެ. އަދި 9 ވޯޓެއް ބާތިލުވެފައިވާކަމަށްވެސް ވަގުތީ ނަތިޖާއިން ދައްކައެވެ.
ރާއްޖޭގެ ހުރިހާ ސަރަހަދެއްގައި ވޯތްކުން ކުރިޔަށް ދިޔަ އިރު އޮންލައިންކޮށްވެސް ވޯޓްލުން ކުރިޔަށް ގެންގޮސްފައިވާކަމަށް ޑިމޮކްރެޓްސްއިން ބުނެއެވެ. ޕާޓީގެ ޗެއަރޕާސަން މީގެކުރިން ވިދާޅުވެފައިވަނީ މިއަދު އެޕާޓީއަށް ސޮއިކުރާ މީހުންނަށްވެސް ވޯޓްލުމުގެ ފުރުސަތު އޮންނާނެކަމަށެވެ.