ވިސާގެ ލުއިފަސޭހައާއެކު ޖަޕާނާއެކު ވިޔަފާރިއާއި އިޤްތިޞާދީ ގުޅުން އިތުރު ހަރުފަތަކަށް ގެންދެވޭނެ: ޝާހިދު

ދިވެހިރާއްޖެއާއި ޖަޕާނާއި ދެމެދު ވެވުނު ވިސާގެ ލުއިފަސޭހައާއެކު ޖަޕާނާއެކު ވިޔަފާރިއާއި އިޤްތިޞާދީ ގުޅުން އިތުރު ހަރުފަތަކަށް ގެންދެވޭނެކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.

ފޮރިން މިނިސްޓަރ ޝާހިދު މިހެން ވިދާޅުވީ، ޖަޕާނުގެ ފޮރިން މިނިސްޓަރ ހަޔާޝީ ޔޮޝިމާސާ ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ދެ ޤައުމުގެ ދެމެދު ބަދަލުކުރެވުނު އެއްބަސްވުންތަކަށްފަހު، ދެ ޤައުމުގެ ފޮރިން މިނިސްޓަރުން ގުޅިގެން މީޑިއާތަކަށް ދެއްވި ބަޔާނުގައެވެ. މިދަތުރުފުޅުގެ ތެރެއިން ރާއްޖެއާއި ޖަޕާނާއި ދެމެދު ބޭއްވުނު މަތީ ފަންތީގެ މަޝްވަރާ ބައްދަލުވުމާއި ދެ ޤައުމުގެ ދެމެދު އެއްބަސްވުންތައް ބަދަލުކުރުމުގެ ރަސްމިއްޔާތު ބާއްވާފައިވަނީ މިއަދު ހެނދުނު ފޮރިން މިނިސްޓްރީގައެވެ.

ދެ ޤައުމުގެ ދެމެދު މިއަދު ބަދަލުކުރެވުނު އެއްބަސްވުންތަކުގެ ތެރޭގައި ދިވެހި ސަރުކާރާއި ޖަޕާން ސަރުކާރާ ދެމެދު ޑިޕްލޮމެޓިކް އަދި އޮފިޝަލް ޕާސްޕޯޓްތަކަށް ދެޤައުމުން ވެސް 90 ދުވަހުގެ މުއްދަތަކަށް ވިސާ އާ ނުލައި އެތެރެވުމާއި ގުޅޭ އެއްބަސްވުން ހިމެނެއެވެ. އަދި ރާއްޖެއަށް އިންސާނީ ވަޞީލަތްތައް ތަރައްޤީކުރުމުގެ ދާއިރާއިން އެހީތެރިވުމުގެގޮތުން ޖަޕާނުން ކުރިއަށްގެންދާ "ޕްރޮޖެކްޓް ފޮރ ހިއުމަން ރިސޯސް ޑިވެލޮޕްމަންޓް ސްކޮލަރޝިޕް" ޕްރޮގްރާމް އަންނަ އަހަރުވެސް ކުރިއަށްގެންދިއުމާއި ގުޅޭ އެއްބަސްވުންވެސް ހިމެނެއެވެ.

މި ސްކޮލަރޝިޕަކީ ޖަޕާނު ސަރުކާރުން ހުރިހާ ޚަރަދެއްކުރާ ގޮތަށް ހިންގާ ޕްރޮގްރާމެކެވެ. މި ޕްރޮގްރާމުގެ ދަށުން ރާއްޖޭގެ 10 ދަރިވަރަކު މިވަގުތުވެސް ޖަޕާނުގައި އަންނަނީ މަތީ ތަޢުލީމު ޙާޞިލުކުރަމުންނެވެ.

ރާއްޖޭގެ ފަރާތުން މި ދެ އެއްބަސްވުން ބަދަލުކުރެއްވީ ފޮރިން މިނިސްޓްރީގެ ސްޓޭޓް މިނިސްޓަރ އަޙްމަދު ޚަލީލެވެ. އަދި ޖަޕާނުގެ ފަރާތުން އެއްބަސްވުންތައް ބަދަލުކުރެއްވީ، ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރިއެވެ.

މި އެއްބަސްވުންތައް ބަދަލުކުރެއްވުމަށްފަހު ދެ ޤައުމުގެ ފޮރިން މިނިސްޓަރުން ދެއްވި ގުޅިފައިވާ ބަޔާނުގައި ފޮރިން މިނިސްޓަރ ޢަބްދުﷲ ޝާހިދު ވަނީ މިއީ ޖަޕާނުގެ ފޮރިން މިނިސްޓަރަކު ރާއްޖެ ވަޑައިގެންނެވި ދެވަނަ ފަހަރުކަން ފާހަގަކުރައްވާ، ދެއްވި ދައުވަތު ޤަބޫލުފުޅުކުރައްވާ ރާއްޖެއަށް ވަޑައިގަތުމާއި ގުޅިގެން އެމަނިކުފާނަށް މަރުޚަބާ ދަންނަވާފައެވެ. އަދި ޖަޕާނަކީ ރާއްޖޭގެ ޒަމާންވީ ގާތް ރަޙުމަތްތެރިއެއްކަން ފާހަގަކުރައްވާ، ރާއްޖޭގެ އިިޖްތިމާޢީ އިޤްތިޞާދީ އަދި ޢުމްރާނީ ތަރައްޤީއަށް ފާއިތުވި އަހަރުތަކުގައި ޖަޕާނު ސަރުކާރުން ވެދެއްވާފައިވާ އެހީތެރިކަން މިނިސްޓަރ ޝާހިދު ފާހަގަކުރެއްވިއެވެ.

ދެ ޤައުމުގެ ދެމެދު މަޝްވަރާކުރެވުނު މުހިންމު ކަންކަމުގެ މައްޗަށް އަލިއަޅުއްވާލައްވާ މިނިސްޓަރ ވިދާޅުވީ، ކަނޑުތަކުގެ ސަލާމަތާއި ރައްކާތެރިކަމުގެ ދާއިރާއިންނާއި، މޫސުމީ ބަދަލުތަކާއި، އެނޫންވެސް ބައިނަލްއަޤްވާމީ މަޝްރަހުގައި ދެ ޤައުމުގެ މަސްލަޙަތު ހިމެނޭ ކަންކަމުގައި ޤަވާއިދުން ދެ ޤައުމުގެ ދެމެދު މަޝްވަރާތައް ބައްވާ، އެއްބާރުލުން ދިނުމާއި ގުޅޭގޮތުން މުހިންމު މަޝްވަރާތަކެއް މި ބައްދަލުވުމުގައި ކުރެވުނު ކަމަށެވެ.

މިނިސްޓަރ ޝާހިދު ވިދާޅުވީ، ދެ ޤައުމުގެ ދެމެދު މިއަދު މި ބަދަލުކުރެވުނު އެއްބަސްވުންތަކަކީ ދެ ޤައުމުގެ ގުޅުން އިތުރު ހަރުފަތަކަށް ގެންދިއުމަށް އެޅުނު މުހިންމު ފިޔަވަޅެއްކަމަށެވެ.

ވަކިން ޚާއްސަކޮށް މިއީ ވިޔަފާރިއާއި އިޤްތިޞާދީ މުޢާމަލާތްތައް ދެ ޤައުމުގެ ދެމެދު އިތުރުކުރުމަށް ކުރިއަށްއެޅޭ މުހިންމު ފިޔަވަޅެއްކަމަށް މިނިސްޓަރ ވިދާޅުވިއެވެ. އަދި ކައިރި މުސްތަޤުބަލެއްގައި އާދައިގެ ޕާސްޕޯޓުގައި ދަތުރުކުރާ ދެ ޤައުމުގެ ރައްޔިތުންނަށްވެސް ވިސާގެ ލުއިފަސޭހަކަން ލިބުމަކީ ކުރެވޭ އުއްމީދެއްކަމަށް އެމަނިކުފާނު ވިދާޅުވިއެވެ.

މި ރަސްމިއްޔާތުގައި ޖަޕާނުގެ ފޮރިން މިނިސްޓަރ ހަޔާޝީ ޔޮޝިމާސާ ދެއްކެވި ވާހަކަފުޅުގައި 1960 ގެ އަހަރުތަކުން ފެށިގެންވެސް މަސްވެރިކަމާއި ފަތުރުވެރިކަމުގެ ދާއިރާއިން ދެ ޤައުމުގެ ދެމެދު ގުޅުން ބަދަހިކުރުމަށް ކުރެވުނު މަސައްކަތްތަކުގެ މައްޗަށް މިނިސްޓަރ އަޅިއަޅުއްވާލެއްވެވިއެވެ. ވަކިން ޚާއްސަކޮށް މޫސުމީ ބަދަލުތަކާއި ތިމާވެއްޓަށް ލިބޭ ގެއްލުންތައް ކުޑަކުރުމުގެ ދާއިރާއިންނާއި، ރާއްޖޭގެ އަތޮޅުތަކުގެ ތަޢުލީމީ ނިޒާމު ހަރުދަނާކޮށް ކުރިއެރުވުމަށް ދެ ޤައުމުގެ ދެމެދު ޚާއްސަ މަސައްކަތްތަކެއް ފާއިތުވި އަހަރުތަކުގެ ތެރޭގައި ކޮށްފައިވާކަން މިނިސްޓަރ ފާހަގަކުރެއްވިއެވެ.

ޖަޕާނުގެ ފޮރިން މިނިސްޓަރުގެ ވާހަކަފުޅުގައިވެސް ވަނީ ދެ ޤައުމުގެ ދެމެދު ބަދަލުކުރެއްވުނު އެއްބަސްވުންތަކުގެ މައްޗަށް އަލިއަޅުއްވާލައްވާފައެވެ. އަދި އާދައިގެ ޕާސްޕޯޓުގައިވެސް ދަތުރުކުރާ ފަރާތްތަކަށް ވިސާގެ ލުއިފަސޭހަކަން ދިނުމަށް މަސައްކަތްކޮށްދެއްވާނެކަމަށެވެ.

ރާއްޖޭގެ ކުރިއެރުމާއި ތަރައްޤީއަށް ޖަޕާނު ސަރުކާރުގެ ފުރިހަމަ އެއްބާރުލުމާއި އެހީތެރިކަން ލިބިގެންދާނެކަމުގެ ޔަޤީންކަން ދެއްވާކަމަށްވެސް ޖަޕާނުގެ ފޮރިން މިނިސްޓަރ ވިދާޅުވިއެވެ.

ޖަޕާނުގެ ފޮރިން މިނިސްޓަރ ރާއްޖެއަށް މި ކުރައްވާ ދަތުރުފުޅަކީ ރާއްޖޭގެ ފޮރިން މިނިސްޓަރ ޢަބްދުالله ޝާހިދުގެ ދައުވަތަކަށް ކުރައްވާ ދެ ދުވަހުގެ ރަސްމީ ދަތުރުފުޅެކެވެ. ދިވެހިރާއްޖެއިން ޖަޕާނާއެކު ޚާރިޖީ ގުޅުން ޤާއިމުކޮށްފައިވަނީ 14 ނޮވެމްބަރު 1967 ގައެވެ. ދެ ޤައުމުގެ ގުޅުމަށް މިއަހަރަށް 56 އަހަރު ފުރޭނެއެވެ.