ޔާމީންގެ މައްސަލައިގައި މާދަމާ 3:00ގެ ކުރިން އިލެކްޝަނުން ޖަވާބުދާރީވާނެ

ރިޔާސީ އިންތިޚާބުގައި ވާދަކުރުމަށް ޕީޕީއެމް-ޕީއެންސީ ކޯލިޝަނުން ކަނޑައަޅާފައިވާ ރައީސް ޢަބްދުﷲ ޔާމީންގެ ކެނޑިޑަސީއާ ގުޅޭގޮތުން، ސުޕްރީމް ކޯޓަށް ހުށަހަޅާފައިވާ މައްސަލައިގައި އިލެކްޝަންސް ކޮމިޝަނުން ޖަވާބުދާރީވެވަޑައިގަތުމަށް، ސުޕްރީމް ކޯޓުން އަންގަވައިފިއެވެ.

އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ ރައީސް ޔާމީންގެ ކެނޑިޑަސީއާ ގުޅޭގޮތުން، ރައީސް ޔާމީންގެ ފަރާތްޕުޅުން، ދިވެހިރާއްޖޭގެ ސުޕްރީމް ކޯޓަށް ހުށަހަޅުއްވާފައިވާ މައްސަލައިގައި އިލެކްޝަންސް ކޮމިޝަނުން ޖަވާބުދާރީވުމަށް، ސުޕްރީމް ކޯޓުން މިއަދު، އަންގަވާފައިވާ ކަމަށެވެ. އަދި އިލެކްޝަންސް ކޮމިޝަނުން މާދަމާ މެންދުރުފަހު 3:00ގެ ކުރިން، ލިއުމުން ޖަވާބު ފޮނުވާނެ ކަމަށް ހަބީބު ވިދާޅުވިއެވެ.

ރައީސް ޔާމީން ގެ ކެންޑިޑެސީ އާ ގުޅޭގޮތުން، ރައީސް ޔާމީންގެ ފަރާތްޕުޅުން، ދިވެހިރާއްޖޭގެ ސުޕްރީމް ކޯޓަށް ހުށަހަޅުއްވާފައިވާ މައްސަލައިގައި އީސީ އިން ޖަވާބުދާރީވުމަށް، ސުޕްރީމް ކޯޓުން މިއަދުވަނީ، އީސީ އަށް އަންގަވާފައި.
މާދަމާ މެންދުރުފަހު 3:00 ގެ ކުރިން، ޖަވާބު ފޯމުން،…

— Ismail Habeeb (@IsmailHabeeb) August 2, 2023

ރިޔާސީ އިންތިޚާބުގައި ވާދަކުރެއްވުމަށް ރައީސް ޔާމީންގެ ކެނޑިޑަސީ ބަލައިނުގަތުމަށް ނިންމީ ރައީސުލްޖުމްހޫރިއްޔާކަމަށް ވާދަކުރުމަށް ގާނޫނޫ އަސާސީގައި ބުނާ ޝަރަތު ރައީސް ޔާމީންގެ ކިބައިގައި މިވަގުތު ފުރިހަމަ ނުވާތީއެވެ.

އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެނޑިޑެސީއާއި މެދު ސުވާލު އުފެއްދިއްޖެ ނަމަ އެމައްސަލަ ހުށައެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މި ފަދަ މައްސަލަތައް ނިންމަންވާނީ ސުޕްރީމްކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި ސުޕްރީމްކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައިވަނީ ބަޔާންކޮށްފައިވެއެވެ.