އަލިފުށި ޓިވެޓް ސެންޓަރުން އަންނަމަހު ކޯސްތައް ފަށަނީ، ކޯހަށް އެދުމަށް ހުޅުވާލައިފި

ރ.އަލިފުށީގައި ސަރުކާރުން ތަރައްޤީކުރައްވާ ޓިވެޓް ސެންޓަރުގައި ކިޔަވަން ބޭނުންވާ މީހުންނަށް ސެޕްޓެމްބަރު އިންޓޭކަށް ފުރުސަތު ހުޅުވާލައިފިއެވެ.

މިނިސްޓްރީން އޮފް ހަޔަރ އެޑިއުކޭޝަން ވިދާޅުވީ އަލިފުށި ޓިވެޓް ސެންޓަރުގައި ސެޕްޓެމްބަރު މަހު 10 ކޯހެއް ފެށުމަށް ނިންމަވާފައިވާކަމަށާއި އެ ކޯަސްތަކަށް އެދުމުގެ ފުރުޞަތު ހުޅުވާލައްވާފައިވާކަމަށެވެ. މިސެންޓަރުގައި ކުރިއަށްގެންދިޔުމަށް ހަމަޖެހިފައިވަނީ ފައިބަރު ބޯޓު ބިލްޑިންއާއި، އޮފީސް މެނޭޖުމަންޓު އެންޑު އެޑްމިނިސްޓްރޭޝަން ދާއިރާގެ ކޯސްތަކުގެ އިތުރަށް އިންފޮމޭޝަން ޓެކްނޮލޮޖީ ދާއިރާއިން ލެވެލް 3 އިން ފެށިގެން އެޑްވާންސް އަދި ޑިޕްލޮމާ ފެންވަރުގެ ކޯސްތަކެވެ.

ސަރުކާރުގެ ހިލޭ އެހީގެ ދަށުން ކިޔަވައިދޭ މިކޯސްތަކުގައި އޮންލައިންކޮށް ބައިވެރިވެވޭނެއެވެ. މިކޯސްތަކަށް އެދުމުގެ ފުރުޞަތު މިމަހުގެ 20 ވަނަ ދުވަހުގެ ނިއަލަށްވަނީ ހުޅުވާލައްވާފައެވެ.

ސެޕްޓެމްބަރުގައި ފަށާ ކޯސްތަކުގެ އިތުރުން މިއަހަރު ތެރޭގައި އިލެކްޓްރިކަލް އެންޑް އިލެކްޓްރޯނިކްސް އިންޖިނިއަރިންއާއި، މެރިން މެކޭނިކްސް އަދި އޮޓޯމޯޓިވް ރިޕެއާގެ އިތުރުން ވެލްޑިންއާއި، އެއަރކޮންޑިޝަނިން އެންޑް ރެފްރިޖެރޭޝަނާއި ފަތުރުވެރިކަމުގެ ދާއިރާއިން ތަފާތު ކޯސްތައް ފެށުމަށް ވެސް ވަނީ ހަމަޖެހިފައެވެ.

ހަޔަރ އެޑިއުކޭޝަން މިނިސްޓްރީން ވިދާޅުވީ އެހުރިހާ ކޯސްތަކާއި މިނިސްޓްރީން ކުރިއަށް ގެންދާ ސްޓޫޑެންޓު ލޯނު ސްކީމްތަކާއި ސްކޮލަރޝިޕުތަކުގެ މައުލޫމާތު ދެއްވުމަށް ޚާއްސަކޮށް މިމަހު ފަހުކޮޅު ކެރިއާ ގައިޑެންސް އޯޕަންޑޭއެއް ބޭއްވެވުމަށް ހަމަޖެހިފައިވާކަމަށެވެ.

ރާއްޖޭގެ އެކި ކަންކޮޅުތަކަށް އަމާޒުކޮށްގެން މަތީތައުލީމާއި ތަމްރީނު ދޭ މަރުކަޒުތައް ބިނާކޮށް ރައްޔިތުންނަށް ފަސޭހައި ކިޔެވުމުގެ ފުރުސަތު ފަހިކޮށްދިނުމުގެ ގޮތުން ރ. އަލިފުށީގައި ގާއިމު ކުރާ ޓިވެޓު ސެންޓަރުގެ މަސައްކަތް މިހާރު ވަނީ ނިމުމަކާ ގާތުގައި ކަމަށް މިނިސްޓްރީން ވިދާޅުވެއެވެ.

އަތޮޅުތެރެއަށް މަތީ ތަޢުލީމް ފުޅާކުރުމުގެ މަސައްކަތުގެ ދަށުން ސަރުކާރުން އަންނަނީ އެކި ސަރަޙައްދުތަކުގައި ޖޫނިއަރ ކޮލެޖްތަކާއި ޓިވެޓް ސެންޓަރުތައް ތަރައްޤީ ކުރައްވަމުންނެވެ.