ތިން މެންބަރެއްގެ ނަން އިއްވެވުމަށްފަހު މަޖިލިސް ނިންމާލައިފި

ރައްޔިތުންގެ މަޖިލީހުގެ މިއަދުގެ ޖަލްސާ ހޫނުވެ ތިންމެންބަރެއްގެ ނަން އިއްވެވުމަށްފަހު މަޖިލިސް ނިންމާލައިފިއެވެ. މިއަދުގެ ޖަލްސާ ކުރިއަށް ސިޔައީ ކުޑަ ވަގުތުކޮޅަށެވެ.

ރައްޔިތުންގެ މަޖިލީހުގެ މިއަހަރުގެ ފަހު ދައުރުގެ ޖަލްސާތައް ފެށީ މިއަދުއެވެ. މިއަދުގެ ޖަލްސާއަށް އެޖެންޑާކޮށްފައިވަނީަ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއ،ި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތެއް ކަނޑައެޅުމަށެވެ.

ނަމަވެސް މަޖިސް ފެށުމަށްފަހު ތަޅުން ހޫނުވީ، ދަ ޑިމޮކްރެޓްސްއާއި ގުޅިވަޑައިގެންނެވި ބައެއް މެންބަރުންގެ ސިޓީ މަޖިލީހަށް ލިބުމުންކަމަށް މަޖިލީހުގެ ރިޔާސަތުގައި އިންނެވި ރައީސް މުޙައްމަދު ނަޝީދު ވިދާޅުވުމާއި ގުޅިގެންނެވެ.

މަޖިލިސް ފެއްޓެވުމަށްފަހުން ރައީސް ނަޝީދު ވިދާޅުވީ، އެމްޑީޕީން ވަކިވެވަޑައިގެން ދަ ޑިމޮކްރެޓްސްއާއި ގުޅިވަޑައިގެންނެވި މެންބަރުންގެ ތެރެއިން މިހާތަނަށް އެކަން މަޖިލީހަށް އަންގަވާފައިވަނީ ތިން މެންބަރުންކަމަށެވެ. ބާކީ ތިެއްބެވި މެންބަރުން ޕާޓީ ބަދަލުކުރެއްވިކަން އަންގާ ސިޓީ މަޖިލީހަށް ފޮނުއްވާފައިނުވާތީ އެ ސިޓީ ފޮނުއްވެވުމަށް ރައީސް ނަޝީދު އެދިވަޑައިގެންނެވިއެވެ.


މިއާއެކު މެންބަރުން އެކަމާ ހިތްޕުޅުހަމަޖެހިވަޑައިނުގެން އަޑުގަދަ ކުރައްވަން ފެއްޓެވުމުން ރައީސް ނަޝިދު ވަނީ ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ އާއި ކެލާ ދާއިރާގެ މެންބަރު އިބްރާހީމް ޝަރީފާއި، ތިނަދު އުތުރު ދާއިރާގެ މެންބަރު ޢަބްދުލް މުޣުނީގެ ނަން އިއްވަވާ ތަޅުން ދޫކުރައްވާ ވަޑައިގަތުމަށް އެދިވަޑައިގެންފައެވެ.

އެ މެންބަރުންގެ ނަން އިއްވެވިނަމަވެސް އެ މެންބަދރުން ގެންދެވީ ތަޅުން ދޫކުރައްވާ ވަޑައިގަތުމަށް ދެކޮޅު ހައްދަވަމުން މަޖިލިސް ވަނީ މެދުކަނޑާލާފައެވެ.