އެމެރިކާގެ ދެކުނުގައިވާ ފްލޮރިޑާ ސްޓޭޓްގައި ކަޅު ނަސްލުގެ ތިން މީހުންގެ ގަޔަށް ބަޑިޖަހައި މަރައިލައިފިއެވެ. މި ހާދިސާ ހިނގާފައި ވަނީ ޖެކްސަންވިލްގައި ހުންނަ ފިހާރައެއްގެ ތެރޭގައެވެ. މަރައިލާފައި ވަނީ ދެ ފިރިހެނުންނާއި އަންހެނެކެވެ. މި އަމަލު ހިންގާފައި ވަނީ ދޮން ނަސްލުގެ ފިރިހެނެކެވެ.
ޖެކްސަންވިލްގެ ފުލުހުންގެ އިދާރާގެ އިސް އޮފިޝަލެއް ކަމުގައިވާ ޓީ.ކޭ. ވޯޓަރސް ވިދާޅުވީ މި އަމަލު ހިނގި މީހާ "ޑޮލަރ ޖެނެރަލް" ފިހާރައަށް ވަދެފައި ވަނީ މާސްކެއް އަޅައިގެން ކަމަށާއި، އޭނާގެ އަތުގައި އޮޓޮމެޓިކް ބަޑިއަކާއި ފިސްތޯލައެއް އޮތް ކަމުގައެވެ. އަދި، ފިހާރައަށް ވަނުމަށް ފަހު ކަޅު ނަސްލުގެ ތިން މީހުންގެ ގަޔަށް ބަޑިޖަހައި މަރައިލާފައިވާ ކަމުގައެވެ.
"މިއީ، ކަޅު ނަސްލުގެ މީހުންނަށް އޮތް ނަފްރަތެއްގެ ސަބަބުން ހިންގާފައިވާ ޖަރީމާއެއް،" ވޯޓަރސް ވިދާޅުވިއެވެ. މި އަމަލު ހިންގުމުގައި މާސްކު އަޅައިގެން ހުރި ދޮން މީހާއަށް އިތުރު މީހެއްގެ އެހީތެރިކަން ލިބިފައިވާ ކަމަށް ނުބެލެވޭ ކަމުގައި ވެސް އޭނާ ވިދާޅުވިއެވެ. ބަޑިޖެހުމުގެ ހާދިސާ ހިނގިތާ ކުޑަ ވަގުތުކޮޅެއްގެ ތެރޭގައި ފުލުހުން ވަނީ އެ ތަނަށް ހާޒިރުވެފައެވެ. އަދި، މި އަމަލު ހިންގި މީހާ ހައްޔަރުކުރަން މަސައްކަތް ކުރުމުން އޭނާ ވަނީ އަމިއްލައަށް ފުރާނަ ނަގައިލައިގެން މަރުވެފައެވެ.
މިއީ، ކަޅު ނަސްލުގެ މީހުންނަށް އަމާޒުކޮށްގެން ކުރިއާލާ ރާވައިގެން ދީފައިވާ ހަމަލައެއް ކަމަށާއި، މި ކަމުގެ ފުރިހަމަ ތަހުޤީޤެއް ފަށާފައިވާ ކަމުގައި ޖެކްސަންވިލްގައި ހުންނަ ފެޑެރަލް ބިޔުރޯ އޮފް އިންވެސްޓިގޭޝަން (އެފް.ބީ.އައި)ގެ އިސް އޮފިޝަލެއް ކަމުގައިވާ ޝެރީ އޮންކްސް ވިދާޅުވިއެވެ. އަދި، މިއީ ޖެކްސަންވިލްގެ މުޅި މުޖުތަމަޢާ ދެކޮޅަށް ދީފައިވާ ހަމަލައެއްގެ ގޮތުގައި އޭނާ ވަނީ ސިފަ ކުރައްވާފައެވެ.
ފްލޮރިޑާގެ ގަވަރުނަރު ރޮން ޑިސެންޓިސް ވެސް ވަނީ މި ހަމަލާ އެންމެ ހަރުކަށި އިބާރާތުން ކުށްވެރި ކުރައްވާފައެވެ. މިއީ، އެއްވެސް ހާލެއްގައި ބަލައިގަނެވޭނެ އަމަލެއް ނޫން ކަމުގައި ވެސް އޭނާ ވިދާޅުވިއެވެ. އޭނާއަކީ 2024 ވަނަ އަހަރު ބާއްވާ ރިޔާސީ އިންތިޚާބުގައި ރިޕަބްލިކަން ޕާޓީގެ ޓިކެޓް ހޯދަން ވާދަކުރައްވާ ކެނޑިޑޭޓެކެވެ.
އޮގަސްޓު 26 ވަނަ ދުވަހު ވެސް އެމެރިކާގެ ބޮސްޓަންގައި މި ފަދަ ހާދިސާއެއް ހިނގާފައިވެއެވެ. ބަޑިން ދިން ހަމަލާތަކާ ގުޅިގެން ޒަޚަމުވި ހަތް މީހަކަށް ފަރުވާދީފައިވާ ކަމުގައި ބޮސްޓޮންގެ އޮފިޝަލުން ވިދާޅުވެއެވެ. އަދި، އޮގަސްޓު 25 ވަނަ ދުވަހު ޗިކާގޯގައި ދިން ބަޑީގެ ހަމަލަތަކެއްގައި ދެ އަންހެނަކު ވަނީ ޒަޚަމުވެފައެވެ. އެ ދުވަހު އޮކްލަހޯމާގެ ސްކޫލެއްގައި ދިން ބަޑީގެ ހަމަލަތަކެއްގައި 16 އަހަރުގެ ކުއްޖަކު މަރުވެ، އިތުރު ހަތަރު ކުދިން ވަނީ ޒަޚަމުވެފައެވެ.